KI KAM 15

Ka jingïashem lang ha Jerusalem

1 # Leb. 12:3; Gal. 2:1-10. Te la don ki briew kiba la wan hiar na Judia, bad ki la hikai ïa ki parabangeit, ki ong, “Lymda otsher ïa phi kat kum ka niam ka rukom u Moses, phim lah ban ïohlait im.” 2Te ynda u Paul bad u Barnabas ki la ïa-pyneh bad ki la ïasaid bad ki ym khyndiat, ki parabangeit ki la ïakut ba u Paul bad u Barnabas, bad kiwei de na ki, kin leit kiew sha Jerusalem ha ki apostol bad ki tymmen basan shaphang kane ka jingïasaid. 3Ki, namar kata, haba la leit on lynti ïa ki da kata ka balang, ki la ïaleit lyngba ïa ka Phoiniki bad ka Samaria, ki da ïathuh ïa ka jingkylla jong ki Jentil, bad ki la pynlong ka jingkmen bakhraw ha ki parabangeit baroh. 4Ynda ki la poi te ha Jerusalem, la pdiang ïa ki da ka balang, bad da ki apostol, bad da ki tymmen basan de; te ki la ïathuh naduh haduh ïa kiei kiei ruh ba U Blei u la lah leh da ki. 5Hynrei, la ïeng kiba na ki kynja Pharisi kiba la ngeit, ki da ong, “Ka dei ban otsher ïa ki, bad ban hukum ïa ki ban sumar ïa ka hukum u Moses.”

6Te ki apostol bad ki tymmen basan ki la ïalum lang ïa ka ban ïapyrkhat shaphang kane ka kam. 7#Ki Kam. 10:1-43.Te ynda la long bun ka jingïasaid, u Petros u la ïeng joit, bad u la ong ha ki: “Ko parabangeit, phi, phi tip kumno ba la kham slem mynta U Blei u la jied hapdeng jong phi, ba ki Jentil da ka shyntur jong nga kin ïohsngew ïa ka ktien ka gospel, bad ba kin ngeit. 8#Ki Kam. 10:44; 2:4.U Blei ruh, uba tip ïa ka dohnud, u la phla babha ïa ki, da kaba u la ai ha ki, ïa U Mynsiem Bakhuid, kumba u la leh ha ngi ruh: 9te um shym la pynïapher ei ei ruh hapdeng jong ngi bad jong ki, ba u da pynkhuid ïa ki dohnud jong ki da ka jingngeit. 10Te mynta, balei phi ïatynjuh ïa U Blei, ba phin buh ka lyngkor ha ka ryndang kita ki synran, ïa kaba ki kpa jong ngi lymne ma ngi ngim ju lah ban bah? 11Hynrei, ngi ngeit ba da ka jingaiei ka jong U Trai Jisu, yn pynim ïa ngi ha kajuh ka rukom, kum ma ki ruh.”

12Te u paidlang baroh u la sngap jar, bad ki la ïashahshkor ruh ïa u Barnabas bad u Paul katba ki ïathuh ïa kiba katno ki dak khyllah bad ki jingphylla ba U Blei u la lah leh hapdeng ki Jentil da ki. 13Te ynda ki la lah sngap jar, u Jakob u la ïathuh, u da ong, “Ko parabangeit, to sngew ïa nga. 14U Simeon u la ïathuh kumno ha kaba nyngkong ba U Blei u la leit khmih ïa ki Jentil, ban shim na ki u paidlang ïa ka kyrteng jong u. 15Bad kane ka ïadei bad kita ki ktien jong ki nongïathuhlypa; kumba la thoh:

16 # Amo. 9:11-12; Jer. 12:15; Isa. 45:21. “ ‘Hadien kine kiei kiei

ngan wan phai pat

bad ngan tei pat

ïa Ka Tabernakl u Dabid

kaba la kyllon noh,

bad ngan tei pat

ïa kiba jot jong ka

bad ngan pynïeng pat ïa ka,

17ba ki basah na ki briew

kin ïoh wad ïa U Trai,

bad kita ki Jentil baroh keiñ

ha kiba la buh

ïa ka kyrteng jong nga,’

ong U Trai,

18uba pyntip

ïa kine kiei kiei ruh

naduh ka basdang ka pyrthei.

19“Naba kumta, ka jingkut jingmut jong nga ka long, ban ym pynkhuslai shuh ïa kiba napdeng ki Jentil kiba phai sha U Blei, 20#Eks. 34:15-17; Leb. 18:6-23; 17:10-16.hynrei, ba ngin thoh sha ki, ba kin kyndiah noh na ki jingbit-tngit ki bleithaw, bad na kaba klim, bad na kaba la khyrwait, bad na ka snam de; 21namar u Moses na mynhyndai eh, u la don man la ka shnong kita kiba ïalap ïa u, da kaba ki pule ïa u ha ki synagog man ka sngi Sabbaton.”

Ka shithi sha ki Balang Jentil

22Ynda kumta, ka la ibit ïa ki apostol bad ïa ki tymmen basan, lem bad baroh kawei ka balang, ban jied ki rangbah napdeng jong ki bad ban phah ïa ki sha Antiok lem bad u Paul bad u Barnabas; kata ka long, ïa u Judas ïa uba sin “Barsabbas”, bad ïa u Silas, ki rangbah baïalam phrang hapdeng kita ki parabangeit. 23Te ki la thoh lem bad ki kumne:

“Ki apostol bad ki tymmen basan, ha kita ki parabangeit kiba na ki Jentil ha Antiok bad Syria bad Kilikia de, Khublei. 24Namar kumba ngi la ïohsngew, ba don kiba la leit noh na ngi kiba la ïapynkhuslai ïa phi da ki ktien, da kaba pynsuhsat ïa ki mynsiem jong phi, ha kiba ngim shym la ai hukum kumno kumno ruh, 25ka la ibit ïa ngi, haba ngi la ïakut jingmut kawei, ban jied ki rangbah bad ban phah ïa ki ha phi lem bad kita kiba ieit jong ngi, u Barnabas bad u Paul, 26ki briew kiba la kheiñduh ïa la ka jingim na ka bynta ka kyrteng U Trai jong ngi U Jisu Khrist. 27Namar kata, ngi la ïaphah noh ïa u Judas bad u Silas, kiba da la ka shyntur jong ki hi kin ïathuh ha phi ïa kita kijuh kiei kiei ruh. 28Naba ka la ibit ïa U Mynsiem Bakhuid, bad ïa ngi, ban ym pynkit halor jong phi ka jingkit kaba kham khia nalor kine kiei kiei ruh kiba donkam; 29ba phin kyndiah noh na kiei kiei ba la kñia ïa ki bleithaw, bad na ka snam, bad na kiei kiei kiba la khyrwait, bad na kiba klim. Na kine, lada phi sumar kyndong ïa lade, phin man bha keiñ. Khublei.”

30Kumta, kita, ynda la pyllait noh ïa ki, ki la ïapoi sha Antiok; te ynda ki la ïalum lang ïa u paidlang, ki la ïa-ai noh ïa kata ka shithi. 31Bad haba ki la lah pule ïa ka, ki la ïasngewkmen namar kata ka jingpyntngen. 32U Judas te bad u Silas, ba ki long hi ki nongïathuhlypa ruh, ki la ïakyntu ïa ki parabangeit da shibun ki ktien, bad ki la pynskhem ïa ki. 33Te ynda ki la ïaishong kham slem, la pyllait noh ïa ki da kaba suk na kita ki parabangeit sha kita kiba la lah phah ïa ki. 34Hynrei, ka la ibit ïa u Silas ban dang sah shuh hangta. 35U Paul te bad u Barnabas ki la ïashong ha Antiok, ki da ïahikai bad ki da ïalap ïa ka ktien U Trai, lem bad shibun kiwei kiwei ruh.

U Paul bad u Barnabas ki ïakhlad lok noh

36Te ynda khyndiat sngi, u Paul u la ong ha u Barnabas, “Ïa ngin ïaleit phai pat mynta, ba ngin ïakhmih ïa kita ki parabangeit ha man la ka shnong ha kaba ngi la ïalap ïa ka ktien U Trai, kumno ki ïalong.” 37Te u Barnabas u la imon ban shim lok lem ïa u Ïoannis ruh, ïa uba khot “Markos”, 38#Ki Kam. 13:13.hynrei, u Paul um sngewdei ban shim lok lem ïa une, uba la kynriah noh na ki na Pamphilia, bad u bym shym la leit lem bad ki sha kata ka kam. 39Kumta te la mih ka jingïasaid kaba jur haduh ba ki la ïakhlad lok noh; kumta, u Barnabas haba u la shim ha u ïa u Markos, u la leit mih noh da ka lieng sha Kypros, 40hynrei, u Paul u la jied ïa u Silas bad u la leit noh ynda la aiti noh ïa u ha ka jingaiei jong U Trai da kita ki parabangeit. 41Bad u la leit lyngba ïa ka Syria bad ka Kilikia, u da pynskhem ïa kita ki balang.

Currently Selected:

KI KAM 15: KHB

Highlight

Copy