KI KAM 14

U Paul bad u Barnabas ha Ikoniom

1Ka la jia te ha Ikoniom, ba ki la rung lang hapoh ka synagog jong ki Jiw, bad ki la ïalap ha kata ka rukom katba u paidbah byllien ki Jiw ruh bad ki Grik ki la ngeit. 2Hynrei, kita ki Jiw ki bymngeit, ki la pynkhih buk ïa ki mynsiem jong ki Jentil, bad ki la pynsniew jingmut ïa ki pyrshah ïa kita ki parabangeit. 3Namar kata, ki la shong kham slem hangta, ki da kren shlur ha U Trai, uba phla pynskhem ïa ka ktien ka jingaiei jong u, da kaba u ai ban leh ki dak khyllah bad ki jingphylla da ki kti jong ki. 4Hynrei, u paidbah kata ka shnong u la ïakad ar liang; shi bynta ki la ïashah sha ki Jiw, bad shi bynta sha ki apostol. 5Te haba la tur pyrshah da kita ki Jentil ruh bad da ki Jiw, lem bad ki nongsynshar jong ki, ban lehbeiñ, bad ban lynthem maw ïa ki, 6ki la tip ïa kata, bad ki la ïaphet sha ki shnong jong ka Lykaonia, sha Lystra bad Derbi, bad kylleng kata ka ri; 7hangta ruh ki la ïalap ïa ka gospel.

La lynthem maw ïa u Paul ha Lystra

8Te ha Lystra la don uwei u briew uba shu shong, ba u khlem bor ha ki kjat, u ba-dkoh naduh ka kpoh ka kmie jong u, u bym ju lah ïaid. 9Une u la ïohsngew ïa u Paul ba u kren; uba haba u la khmih shaiñ ïa u, bad ba u la ïohi ba u don ka jingngeit ïa ka ban ïoh khiah, 10u la ong da ka ktien bajam, “To ïeng beit da la ki kjat.” Te u la rynsied bad u la ïaid. 11Te haba kita ki paidbah ki la ïohi ïa kaba u Paul u la leh, ki la pynjam ïa la ka ktien, ki da ong ha ka ktien Lykaonia, “Ki blei ki la wan hiar ha ngi ha ka dur briew.” 12Te ki la ïakhot ïa u Barnabas, “Jupiter”, bad ïa u Paul, “Merkuri”, namar ba u long u nongkren ba kham rangbah. 13Bad u lyngdoh u Jupiter, uba ka ïingmane jong u ka don ha khmat kata ka shnong, haba u la wallam ïa ki masi dab bad ïa ki pansngiat syntiew ha ki khyrdop, u la mut ban kñia lem bad kita ki paidbah. 14Hynrei, haba kita ki apostol – u Barnabas bad u Paul – ki la ïohsngew ïa kata, ki la kad la ki jaiñkup, bad ki la ïarynsied kynsan hapdeng uta u paidbah, ki da pyrta, 15#Eks. 20:11; Salm. 146:6.ki da ong ruh, “Ko rangbah, balei phi leh ïa kine kiei kiei ruh! Ngi ruh ngi long tang ki briew kiba kum phi hi, bad ngi ïathuhkhana babha ha phi ba phin phai noh na kine ki jingmane thala sha U Blei u ba-im, uba la thaw ïa ka bneng, bad ïa ka khyndew, bad ïa ka duriaw, bad ïa kiei kiei baroh kiba don ha ki. 16Ha kita ki pateng bynriew kiba la leit noh, u la shah ïa ki jaid bynriew baroh ban ïaid ha ki lynti la ki jong hi: 17la kumta ruh, um shym la iehnoh ïa lade khlem sakhi, ba u da leh ïa ka babha, bad u la ai ha phi na bneng ïa u slap, bad ïa ki aïom basei soh, u da pyndap ïa ki dohnud jong phi da ka jingbam bad ka jingkmen.” 18Te da kine ki jingong, da kaba eh ki la ïa-pynpep noh ïa kita ki paidbah na ka ban kñia ha ki.

19 # 2 Kor. 11:25. Hynrei, la poi hangta ki Jiw na Antiok bad na Ikoniom, kiba haba ki la ïakhroh ïa kita ki paidbah, ki la ïalynthem maw ïa u Paul bad ki la ïaring noh ïa u shabar kata ka shnong, ba ki da tharai ba u la lah ïap. 20Hynrei, haba kita ki synran ki la ïeng tawiar ïa u, u la khie joit, bad u la leit shapoh kata ka shnong. Te ha kaba lashai u la leit noh lem bad u Barnabas sha Derbi. 21Te ynda ki la lah ïalap ïa ka gospel ha kata ka shnong, bad ba ki la ïa-pynlong bun synran, ki la ïaleit phai pat sha Lystra, bad sha Ikoniom bad sha Antiok, 22ki da pynskhem ïa ki mynsiem jong ki synran, da kaba sneng ïa ki ban ïaineh ha kata ka jingngeit, bad ba ka dei ïa ngi ban bsut shapoh ka hima U Blei lyngba shibun ki jynjar. 23Te ynda ki la thung ha ki, ki tymmen basan ha la ka balang balang baroh, bad ba ki la ïaduwai lem bad ka jingshah jingit, ki la ïa-aiti ïa ki ha U Trai ha uba ki la lah ngeit.

Ka jingwan phai sha Antiok

24Te haba ki la ïaleit lyngba ïa ka Pisidia, ki la ïapoi ha Pamphilia. 25Bad ynda ki la ïalap ïa ka ktien ha Perga, ki la ïaleit hiar noh sha Attalia; 26nangta ruh ki la ïaleit noh da ka lieng sha Antiok, na kaba la lah aiti noh ïa ki ha ka jingaiei jong U Blei ïa kata ka kam ïa kaba ki la lah ïa-pyndep noh. 27Ynda ki la lah ïapoi te, bad ba ki la lah ïalum lang ïa kata ka balang, ki la ïathuh naduh haduh ïa kiei kiei ruh kiba U Blei u la lah leh da ki, bad kumno ba u la lah plie wang ha ki Jentil ïa ka jingkhang ka jingngeit. 28Bad ki la ïashong ym khyndiat por lem bad kita ki synran.

Currently Selected:

KI KAM 14: KHB

Highlight

Copy