KI KAM 13

La jied ïa u Paul bad u Barnabas ban leit sha ki Jentil

1Te la don ha Antiok, ha ka balang kaba la don hangta, ki nongïathuhlypa bad ki nonghikai, u Barnabas, bad u Simeon ïa uba la khot “Niger”, bad u Loukios uba na Kyrini, bad u Manain u para ba la ïoh jingbsa lem bad u Herod u Tetrark, bad u Saul de. 2Te katba ki la shakri ïa U Trai, bad ba ki la shah jingit, U Mynsiem Bakhuid u la ong, “To pynkyrpang ha nga ïa u Barnabas bad ïa u Saul sha kata ka kam sha kaba nga la khot ïa ki.” 3Te haba ki la ïashah jingit bad duwai, bad ba ki la buh ïa la ki kti ha ki, ki la phah noh ïa ki.

Ki Apostol ha Kypros

4Ki te haba la phah noh ïa ki da U Mynsiem Bakhuid, ki la ïaleit hiar sha Selukia, bad nangta ki la ïaleit da ka lieng sha Kypros. 5Te mynba ki la don ha Salamis, ki la ïalap ïa ka ktien U Blei ha ki synagog ki Jiw: te ki la ïadon ruh u Ïoannis kum u nongïarap jong ki. 6Te haba ki la lah ïa-ïaid lyngba ïa kata ka 'dewlynnong baroh kawei haduh Paphos, ki la shem ïa uwei u nongleh byrtong, u nongïathuhlypa balamler, u Jiw, uba kyrteng “u Bar-Jisu”; 7uba la don lem bad u Serjios Paulos, u lyngskor, u briew u bashemphang; une, haba u la khot ha u ïa u Barnabas bad u Saul, u la kwah ban ïohsngew ïa ka ktien U Blei. 8Hynrei, uta u Elimas u nongleh byrtong (naba kumta la batai ïa ka kyrteng jong u), u la ïaleh pyrshah ïa ki, u da pyrshang ban pynphai noh ïa uta u lyngskor na kata ka jingngeit. 9Hynrei u Saul, ïa uba la khot “Paul” ruh, uba la dap da U Mynsiem Bakhuid, u la peit shaiñ ha u, 10#Hos. 14:9.bad u la ong, “A uba dap da ka buit arsap suda, bad da ka buit bymman suda, me u khun u Soitan, me u nongshun ka hok baroh, men ym wai shuh ban pynbakla ïa ki lynti babeit jong U Trai? 11Mynta te ha khmih, ka kti U Trai ka long halor jong me, bad men sa matlah, khlem da ïohi ïa ka sngi katto katne por.” Te shisyndon la hap ha u, u lyoh bad ka jingdum; te u la leit kylleng u da wad ïa ki ban btin ïa u na ka kti. 12Te uta u lyngskor, haba u la ïohi ïa kaba la leh, u la ngeit, u da sngewkyndit namar kata ka jinghikai jong U Trai.

U Paul bad u Barnabas ha Antiok jong ka Pisidia

13Te u Paul bad ki lok jong u ki la mih noh da ka lieng na Paphos, bad ki la ïapoi sha Perga ha Pamphilia; u Ïoannis te haba u la ïakhlad na ki, u la leit phai pat sha Jerusalem. 14Hynrei, ma ki, haba ki la ïaleit noh na Perga, ki la ïapoi ha Antiok jong ka Pisidia; te ki la ïaleit hapoh ka synagog ha ka sngi Sabbaton, bad ki la ïashong. 15Te ynda la lah kaba pule ïa Ka Hukum bad Ki Nongïathuhlypa, ki nongsynshar ka synagog ki la ïaphah ha ki, ki da ong, “Ko para, lada phi don kano kano ka ktien sneng ïa u paidbah, to kren.” 16Ynda kumta, u Paul u la ïeng joit, bad haba u la kaweh da la ka kti, u la ong, “Ko rangbah Israel bad phi kiba sheptieng ïa U Blei, to sngew. 17#Eks. 1:7; 6:1,6; 12:51.U Blei jong une u paidlang Israel, u la jied ïa ki kpa jong ngi; bad u la pynkyntiew ïa une u paidlang mynba ki la shong basa ha ka ri Ijipt, bad da ka ksang'ti badonbor u la ïalam noh ïa ki na ka. 18#Jkñ. 14:34; Deu. 1:31.Te kumba sawphew snem u la ïaishah ïa ki jingleh jong ki ha kata ka ri khlaw. 19#Deu. 7:1; Jos. 14:1.Bad haba u la lah pynjot ïa ki hynñiew ki jaid bynriew ha ka ri Kanaan, u la ai ha ki, ïa ka ri jong ki ban long ka jingïoh kynti, kumba sawspah sanphew snem. 20#Nbshr. 2:16; 1 Sam. 3:20.Te hadien kine kiei kiei, u la ai ki nongbishar ha ki, haduh u Samuel u nongïathuhlypa. 21#1 Sam. 8:5; 10:21.Bad hadien kata, ki la ïapan ban ïoh syiem: te U Blei u la ai ha ki, ïa u Saul u khun u Kish, u briew na ka jaid Benjamin, jin sawphew snem. 22#1 Sam. 13:14; 16:12; Salm. 89:20; Isa. 44:28.Te ynda u la pynduh syiem ïa u, u la pynmih ïa u Dabid ban long u syiem jong ki, ïa uba u la phla ruh bad u la ong, ‘Nga la shem ïa u Dabid u khun u Jesse, u briew uba kum ka dohnud jong nga, u ban leh ïa ka mon jong nga baroh.’ 23Na u symbai jong une u briew, U Blei, katba kum ka jingkular, u la pynmih ha ki Israel ïa U Nongpynim, U Jisu keiñ, 24#Mrk. 1:1-4; Luk. 3:3.mynba u Ïoannis u la ïalap nyngkong ha shuwa kata ka jingwan jong U, ïa ka jingbaptis ka jingkylla-ka-bamut ha u paidbah Israel baroh. 25#Ïoan. 1:20; Mat. 3:11; Mrk. 1:7; Luk. 3:16; Ïoan. 1:27.Te katba u Ïoannis u dang pyndep ïa la ka jingphet, u la ong, ‘Phi tharai ba nga long uei? Ngam long uta; hynrei, ha khmih, don uba wan nadien jong nga, wat ïa ki juti ki kjat jong U ngam long uba bit nam ïa ka ban loit noh.’

26 # Salm. 107:20. “Ko para, ki khun ki ksiew u Abraham, bad kita kiba sheptieng ïa U Blei hapdeng jong phi, ha ngi keiñ la phah ïa ka ktien jong kane ka jingpynim. 27Namar kita kiba shong ha Jerusalem, bad ki nongsynshar jong ki, naba kim shym la ithuh ïa une, lymne ïa ki ktien jong ki nongïathuhlypa ïa kiba ju pule man la ka sngi Sabbaton, ki la ïa-pyndep noh ïa ki da kaba ïa-pynrem ïa U. 28#Mat. 27:22,23; Mrk. 15:13,14; Luk. 23:21-23; Ïoan. 19:15.Bad la kim shym la shem ka daw ban ïap, ki la ïakyrpad pynban ïa u Pilat ba yn pynïap noh ïa U. 29#Mat. 27:57-61; Mrk. 15:42-47; Luk. 23:50-56; Ïoan. 19:38-42.Bad haba ki la lah pyndep ïa kiei kiei baroh kiba la thoh shaphang jong U, ki la ïa-pynhiar ïa U na u dieng, bad ki la buh ïa U ha ka jingtep. 30Hynrei, U Blei u la pynmih pat ïa U na ki baïap. 31#Ki Kam. 1:3.Bad la ïohi ïa U bun sngi da kita kiba la ïawan kiew lem bad U na Galilaïa sha Jerusalem; kiba long mynta ki nongphla jong U ha u paidbah. 32Bad ngi wallam ha phi ïa ka khubor babha, kata ka jingkular ba la kular ha ki kpa, kumno ba U Blei u la pyndep noh ïa kata ha ki khun jong ngi, ha kaba u la pynmih pat ïa U Jisu. 33#Salm. 2:7.Kumba la thoh ruh ha ka Salm ka ba-ar;

“ ‘Me long U Khun jong nga,

ha kane ka sngi

nga la pynkha ïa me.’

34 # Isa. 55:3. “Te shaphang ba u la pynmih pat ïa U na ki baïap, ban ym leit phai shuh sha kaba pyut, u la kren kumne:

“ ‘Ngan ai ha phi

ïa kita ki jingaiei bakhuid

bad baskhem jong u Dabid.’

35 # Salm. 16:10. “Namar u ong ruh ha kawei pat ka Salm:

“ ‘Men ym shah ïa U Bakhuid

jong me

ban shem ïa kaba pyut.’

36“Namar, u Dabid ynda u la lah shakri ïa ka mon U Blei ha la ka jong ka pateng bynriew, u la ïohthiah noh, bad la pynbuh lang ïa u bad ki kpa jong u; bad u la shem ïa kaba pyut, 37hynrei, une, ïa uba U Blei u la pynmih pat, um shym la shem ïa kaba pyut. 38Namar kata, to tip phi, A ki para, ba da une u briew keiñ, ïa kaba map ki pop la ïalap ha phi: 39bad da une, ba pynksan ïa u briew baroh uba ngeit, na kiei kiei baroh na kiba phim lah ban ïoh ksan da ka hukum u Moses. 40Namar kata, to sumar ïoh kan jia ha phi, kata ïa kaba la kren ha Ki Nongïathuhlypa:

41 # Hab. 1:5. “ ‘Ha khmih,

A phi ki nongibeiñ,

to sngewphylla ruh,

bad to jah noh jar ruh;

naba nga, nga leh ïa ka jingleh

ha ki sngi jong phi,

ka jingleh keiñ

kaba phin ym ngeit

da kumno kumno ruh,

wat lada uno uno ruh

u batai ïa ka ha phi.’ ”

42Te katba ki ïamih noh, ki la ïakyrpad ba yn ïoh ïalap ha ki, ïa kine ki ktien ha ka sngi Sabbaton kaba bud. 43Te haba la pynwai noh ïa kata ka jingïaseng synagog, shibun ki Jiw bad kiba la kylla niam ki bariewblei ki la ïabud ïa u Paul bad u Barnabas; kiba, haba ki ïakren ha ki, ki la kyntu ïa ki ban ïaineh ha ka jingaiei jong U Blei.

44Te ha ka sngi Sabbaton kaba bud, la jan baroh shi shnong ki la ïalang ban ïohsngew ïa ka ktien U Blei. 45Hynrei, haba ki Jiw ki la ïohi ïa kita ki paidbah, la pyndap ïa ki da ka jingpihuiñ; bad ki la ïasaid pyrshah ïa kita kiei kiei ruh ba la kren da u Paul, bad ki la ïakrenbeiñ ruh. 46Ynda kumta, u Paul bad u Barnabas ki la kren shlur, bad ki la ong, “La donkam ban ïalap ha phi nyngkong ïa ka ktien U Blei; hynrei, namar ba phi kyntait noh ïa ka, bad ba phi rai ïa lade ki bymbit ïa ka jingim bymjukut, ha khmih, ngi phai noh sha ki Jentil. 47#Isa. 42:6; 49:6.Naba kumta, U Trai u la hukum ïa ngi, u da ong:

“Nga la buh ïa me

ban long ka jingshai

ïa ki Jentil,

ba men long ka jingpynim

shaduh ka bakut

ka pyrthei.”

48Te haba ki Jentil ki la ïohsngew ïa kane, ki la sngewkmen, bad ki la pyndonburom ïa ka ktien U Blei, bad kat kiba la thung sha ka jingim bymjukut, ki la ngeit; 49te la pynphriang ïa ka ktien U Trai kylleng sawdong kata ka ri baroh. 50Hynrei, kita ki Jiw ki la ïa-pynshoi ïa ki kynthei ki bariewblei ki bakhraw batri, bad ïa ki rangbah jong kata ka shnong, bad ki la ïapynkhih ka jinglehbeiñ ïa u Paul bad u Barnabas, bad ki la beh noh ïa ki na ki phang jong ki. 51#Mat. 10:14; Mrk. 6:11; Luk. 9:5; 10:11.Hynrei, ki la ïakynther noh ïa ka 'dewmet na ki kjat jong ki sha ki, bad ki la poi sha Ikoniom. 52Te la pyndap ïa kita ki synran da ka jingkmen, bad da U Mynsiem Bakhuid.

Currently Selected:

KI KAM 13: KHB

Highlight

Copy