KI KAM 11

U Petros u pynshai balei u leit sha ki Jentil

1Te ki apostol bad ki parabangeit kiba la don ha Judia ki la ïohsngew ba ki Jentil ruh ki la lah pdiang ïa ka ktien U Blei. 2Bad haba u Petros u la wan kiew sha Jerusalem, kita kiba na ka jingotsher ki la ïasaid bad u, 3ki da ong, “Me la leit sha ki briew kiba khlem otsher, bad me la bam ryngkat bad ki.” 4#Ki Kam. 10:1-48.Hynrei, u Petros u la sdang, bad u la batai ha ki ter ter, u da ong, 5“Nga la don ha ka shnong Joppa ba nga dang duwai; te ha ka jinglong rngai nga la ïohi ïa ka jingithuhpaw, ïa uwei u khiew ba u hiar kum ka jingsiang bakhraw, ba la pynhiar na bneng da ki sawdong; bad ka la poi haduh ha nga; 6sha kaba haba nga la khmih shaiñ, nga la pyrkhat bad nga la ïohi ïa ki mrad ba saw kjat jong ka khyndew, bad ïa ki mrad khlaw, bad ïa ki kynja bapar, bad ïa ki sim ka bneng de. 7Bad nga la ïohsngew ruh ka ktien kaba ong ha nga, ‘To ïeng joit, ko Petros, to pynïap, to bam ruh.’ 8Hynrei, nga la ong, ‘Ym kumta A Trai; namar kaei kaei ruh kaba sang lane ka bymkhuid kam ju rung mynno mynno ruh shapoh ka shyntur jong nga.’ 9Te ka ktien ka la kren ha nga sa shi wat pat na bneng, ‘Ïa kaba U Blei u la pynkhuid, wat ñiew sang ma me.’ 10Te la leh haduh lai sien ïa kane; ynda kumta, la ring noh pat ïa kita baroh sha bneng. 11Ha khmih ruh, kumne kumne lai ngut ki briew ki la ïaïeng ha khmat kata ka ïing ha kaba ngi la don, ba la phah ïa ki na Kaisaria sha nga. 12Bad U Mynsiem u la hukum ïa nga ban leit ryngkat bad ki, khlem da sngew-artatien; bad kine ki hynriew ngut ki parabangeit ruh ki la ïawan lem bad nga, bad ngi la ïaleit ruh shapoh ka ïing uta u briew. 13U ruh u la ïathuh ha ngi kumno ba u la ïohi ïa u angel ba u da ïeng ha ka ïing jong u, bad ba u da ong, ‘To phah sha Joppa, bad khot ïa u Simon, ïa uba la sin “Petros” 14u ban kren ki ktien ha me, da kiba yn pynim ïa me, ma me bad ka ïing jong me baroh ruh.’ 15Te katba nga la sdang ban kren, U Mynsiem Bakhuid u la hap ha ki, kumjuh kumba ha ngi hi ha kaba mynnyngkong: 16#Ki Kam. 1:5.te nga la kynmaw ïa kata ka jingong U Trai, kumno ba u la ong, ‘U Ïoannis shisha u la pynbaptis da ka um, hynrei, yn pynbaptis ïa phi da U Mynsiem Bakhuid.’ 17Lada U Blei te u la ai ha ki ïa kajuh ka jingai, kum kaba u la ai ha ngi ruh, mynba ngi la ngeit ha U Jisu Khrist uba U Trai, nga long uei ba ngan lah ban ïaleh pyrshah ïa U Blei?” 18Te haba ki la ïohsngew ïa kine kiei kiei, ki la ïasngap jar, bad ki la ïa-pyndonburom ïa U Blei, ki da ong, “Kumta te ha ki Jentil ruh U Blei u la ai ïa ka jingkylla-ka-bamut sha ka jingim.”

Ka Balang ha Antiok

19 # Ki Kam. 8:1-4. Kita te ïa kiba la pynsakma kylleng namar kata ka jingjynjar kaba la mih hadien u Stephan, ki la leit poi haduh Phoiniki, bad Kypros, bad Antiok de, ki da ïalap ïa kata ka ktien hano hano ruh em, hynrei, tang ha ki Jiw hi. 20Hynrei, la don na ki, ki briew kiba na Kypros, bad na Kyrini, kiba haba ki la poi sha Antiok, ki la kren ha ki Grik ruh, ki da ïalap ïa U Jisu uba U Trai. 21Bad ka kti U Trai ka la long lem bad ki, bad bun byllien kiba la ngeit ki la wan phai sha U Trai. 22Te ka jingbna shaphang jong ki, ka la poi sha ki shkor jong ka balang kaba ha Jerusalem, bad ki la ïaphah ïa u Barnabas ban leit haduh Antiok; 23uba haba u la poi, bad ba u la ïohi ïa ka jingaiei ka jong U Blei, u la sngewkmen, bad u la kyntu ïa ki baroh, ba da ka jingthmu skhem ka dohnud kin snoh ha U Trai: 24naba u la long u briew u babha, bad uba dap da U Mynsiem Bakhuid, bad da ka jingngeit. Te shibun u paidbah la pynïasoh ha U Trai. 25Te u la leit noh sha Tarsos ban wad ïa u Saul, bad ynda u la shem ïa u, u la ïalam ïa u sha Antiok. 26Ka la jia ruh ba baroh shi snem ki la ïaseng lem bad kata ka balang, bad ki la ïahikai ïa shibun u paidbah. Bad la khot “Khristan” ïa ki synran nyngkong eh ha Antiok.

27Te ha kine ki sngi, ki la wan hiar ki nongïathuhlypa na Jerusalem sha Antiok. 28#Ki Kam. 21:10.Te uwei na ki, uba kyrteng “u Agabos” u la ïeng joit, bad u la ïathuhlypa da U Mynsiem, ba ka 'nemsniew bakhraw kan sa long ha ka pyrthei baroh, kaba la jia ruh ha ki sngi u Klaudios. 29Te kita ki synran, uwei pa uwei na ki katba u don la ka bor, ki la ïathmu skhem ban phah ka jingïarap ha ki parabangeit kiba shong ha Judia: 30ïa kata ruh ki la leh, ki da phah lam ïa ka, sha ki tymmen basan da ka kti u Barnabas bad u Saul.

Currently Selected:

KI KAM 11: KHB

Highlight

Copy