ABAROMA 8
8
Okhumenya khulwa obunyali bwa Roho Omutakatifu
1Khulweshio abo abamenya mubulala nende Yesu Kristo shibalakhalachilwa eshiina tawe. 2Shichila lilako elia Roho, elikhureeleranga ifwe obulamu mu Kristo Yesu, liayakholile isie okhuba omulekhuule okhurula mwilako liobwonooni nende okhufwa. 3Nyasaye yakholile aka Amalako kakhaywa okhukhola, khulwa obulemu bwomundu. Nyasaye yafukula obwonooni mumelo yomundu khulwa okhuruma Omwanawe mwene, owetsa mumelo yomundu yobwonooni, khulwa okhurusiaho obwonooni. 4Nyasaye yakhola kano kho mbu aka Amalako kenyanga akali habwene kosilibwe elala mwifwe abamenyanga okhulondana nende imelo ya Roho, halali imelo eyomubili tawe. 5Abo abamenyanga okhulondana nende imelo yabwe yomubili bachoominjia amapaaro kabwe khukeimelo eyomubili yenyanga mbu bakhole. Nebutswa abo abamenyanga okhulondana nende Roho bachoominjia amapaaro kabwe khu aka Roho yenyanga mbu bakhole. 6Okhuchomia amapaaroko khu akeimelo yomubili nokhufwa, nebutswa okhuchoomia amapaaroko khuka Roho khureranga obulamu nende omulembe. 7Kho omundu ouchoominjia amapaaroke khu akeimelo yomubili nomusuku wa Nyasaye, shichila shialondanga amalako ka Nyasaye tawe, ne shianyala okhukalonda kata nahatutu tawe. 8Ne abo abalondanga imelo yabwe yomubili shibanyala okhuchamisia Nyasaye tawe.
9Nebutswa inywe shimumenyanga shinga olwa imelo yenywe yomubili yimumanyia okhumenya ta, habula mumenyanga shinga olwa Roho amumanyinjia okhumenya, kata kario Roho wa Nyasaye amenyanga mwinywe. Omundu yesi oulali nende Roho wa Kristo muye ta, shiali owa Kristo tawe. 10Nebutswa Kristo naba namenya mwinywe, kata emibili chienywe nichiba nichifwa khulwa obwonooni, Roho wenywe naye alaba obulamu, shichila mwamala okhulunjisibwa nende Nyasaye. 11#1 Abakor. 3:16Nikaba mbu, Roho wa Nyasaye, owalamusia Yesu okhurula mukhufwa, amenyanga mwinywe, kho owalamusia Kristo okhurula mukhufwa alahaana khandi obulamu khumibili chienywe echifwitsanga okhubirira mu Rohowe oumenyanga mwinywe.
12Khulweshio baana befwe, khuli nomulimo, nebutswa shikhuli mbu khumenyanga okhulondana nende imelo yefwe yomubili tawe. 13Okhuba nimuba nimumenyanga okhulondana nende imelo yenywe eyomubili, kho toto mulafwa. Nebutswa nikaba mbu, okhubirira mu Roho, mwira ebikhole bienywe biobwonooni, kho mulabaho abalamu. 14Abo abemililungwa nende Roho wa Nyasaye, nabaana ba Nyasaye. 15#Abagal. 4:5-7#Mrk. 14:36; Abagal. 4:6Okhuba Roho, owa Nyasaye yamuhelesia shiamukholanga abasumba noho abarii ta, habula amukholanga okhuba abaana ba Nyasaye, mana mubunyali bwa Roho oyo khulanjilisia nikhuboola khuri, “Aba.” Eshisina mbu, “Papa wanje.” 16Roho wa Nyasaye omwene asanjilananga nemioyo chiefwe mukhurumbula mbu, khuli abaana ba Nyasaye. 17Kho olwa khuli abaanabe, khwakhanyoole tsikhabi etsia yabishila abandube, mana khulinyoola halala nende Kristo obulaame obwa Nyasaye yamubiishila, shichila nikhwakhasanjilana nende Kristo mukhunyakhanakhwe, khulisanjilana ninaye khandi muluyalilwe.
Khwakhanyoole oluyali
18 #
Obuch. 3:5,6 Emanyile toto mbu, obusandibwi bwakhunyoolanga bulano shibwakhachelasibwe kata nahatuutu khuluyali olwitsa okhufwimbulilwa ifwe tawe. 19Ebilonje biosi ebia Nyasaye bilindililanga nobunaayi khulwa Nyasaye okhulolesia abaanabe. 20#Obucha. 3:17-19Shichila ebilonje biosi biakhalachilwa eshiina nibisasia lichoomo liabio, ne shikhwali okhwenya khwabio ebiene ta, nebutswa Nyasaye yenya mbu kabe kario. Nebutswa obunaayi bwaliho, 21mbu ebilonje ebiene biakhekhole ebilekhuule inyanga yindi okhurula mubusumba bwabio obubolanga, mana bisanjilana muluyali lwobulekhuule bwabaana ba Nyasaye. 22Shichila khumanyile mbu, okhuula olwa leelo ebilonje biosi bishenyanga nobutsunwi shinga omukhasi oulumwa inzibula. 23#2 Abakor. 5:2-4Nebutswa shinebiloonje bionyene ebishenyanga ta, kata ifwe abali nende Roho shinga eshihaanwa shiambeli khubihaanwa bia Nyasaye, fwesi khandi khushenyanga mumioyo chiefwe nikhulindilila Nyasaye okhukhukhola abaanabe khandi okhukhola emibili chiefwe okhuba emilekhuule. 24Khwahonibwa khulwa obunaayi, nebutswa nikhwakhalola eshia khunaayanga, kho shibwakhaba obunaayi toto tawe. Okhuba niwiina ounaayanga mushindu eshia alolanga? 25Nebutswa nikhwakhanaaya mushindu eshia khulalolanga ta, khushiliindilila nobwisimilisi. 26Munjila tsana eyo Roho yesi yetsanga okhukhukhoonya ifwe, kata olwakhuli abateshele khurio. Shichila shikhumanyile shinga olwa khukhoyile okhusaaya tawe. Roho omwene ashenyanga nakhusabila khu Nyasaye mumakhuwa akalanyala okhwinoosibwa tawe. 27Naye Nyasaye oulolanga akali mumioyo chiefwe, amanyile aka Roho oyo apaaranga, shichila Roho asabanga khu Nyasaye khulwa abandube okhulondana nende akokhwenyakhwe.
28Khumanyile mbu Nyasaye mubindu biosi akholanga halala nende abo abamuheela, abayalanga okhulondana nelichoomolie. 29Abo aba Nyasaye yamala okhwahula, nabayinia mubandi mbu babe shinga Omwanawe, kho mbu Omwanawe oyo abe omwikulanda mubaana babwe abanji. 30Kho aba Nyasaye yaahula, yabayabalanga, ne abayalanga, yabakhola okhuba abalunjishi, khandi nasanjilana ninabo muluyalilwe.
Obuheeli bwa Nyasaye mu Yesu Kristo
31Kho khuboole shiina mumakhuwa kano koosi? Nyasaye naba nakhuterera, niwiina owakhaba omusuku wefwe? 32Nyasaye oulaaloba okhuhaana omwanawe mwene ta, habula yamuhaana khulwefwe fwesi, shialakhuhelesia butswa ebindu biosi? 33Niwiina owakhenjilila abandu abaahule ba Nyasaye? Nyasaye mwene abakholanga okhubula eshikha. 34Kho niwiina ounyala okhubakhalachila eshiina? Yesu Kristo owafwa, mana nalamusibwa, ne ali khumukhono musaatsa kwa Nyasaye, niye oukhusabilanga khu Nyasaye. 35Kho bulano nishiina eshiakhanyala okhukhwahukhasia okhurula khubuheeli bwa Kristo? Kanyala okhuba amanyakhano, noho amatinyu, noho obusandibwi, noho inzala, noho obutakha, noho amasila, noho okhufwa? 36#Tsits. 44:22Shinga olwa Amahandiko kaboolanga mbu,
“Khulwa iwe khuli mumasila akokhufwa ebise biosi,
khukholungwa shinga amakondi akatsia okhusinzwa.”
37Nebutswa mumakhuwa kano koosi, khuli nobuhuli obwitsule okhubirira mu oyo owakhuheela ifwe! 38Okhuba emanyile toto mbu, shibulaho eshinyala okhukhwahukhasia okhurula khubuheelibwe, kata okhufwa noho obulamu; kata abamalaika noho abaruchi bandi abomwikulu noho abobunyali; kata ebiliho bulano noho ebitsa okhubaho olunyuma, 39kata eshiomwikulu noho eshili mushialo, shibulaho eshindu shiosi shiosi mubilonje eshinyala okhukhurusia khubuheeli bwa Nyasaye obuli obwefwe okhubirira mu Yesu Kristo Omwami wefwe.
Currently Selected:
ABAROMA 8: OLUDC
Highlight
Share
Copy
Want to have your highlights saved across all your devices? Sign up or sign in
