ABAROMA 7
7
Eshilolelo okhurulana khu akomundeekho
1Baana befwe, toto mwene mumanyile aka enzenya okhuboola, shichila inywe mwesi mwamanya amalako. Amalako karukanga omundu olwa aba nashili omulamu. 2Mumanyile mbu, omukhasi owateshibwa abetsanga niyabohwa namalako khumusaatsawe, lwomusaatsa oyo aba nashiliho mwoyo, nebutswa omusaatsawe oyo naba nafwa, ne omukhasi oyo aba omulekhuule okhurula khumalako akomusaatsawe. 3Nebutswa omukhasi oyo naba natsia khumusaatsa undi, ne omusaatsawe nashiliho mwoyo, kho alalangwa omuheyi. Nebutswa omusaatsawe nafwa, omukhasi oyo nomulekhuule okhurula khumalako, ne nateshela omusaatsa undi shiaba naheyanga tawe. 4Nolwa kali kario khwinywe baana befwe. Okhulondana namalako, inywe mwesi khandi mwafwa, shichila muli eshitonye shiomubili kwa Kristo. Bulano muli aba oyo owalamusibwa okhurula mukhufwa kho mbu khube abakhalabani ba Nyasaye. 5Okhuba olwa khwamenyanga mumelo yefwe yoburulanda, obwikombi bwobwonooni obwabusibwa namalako bwakholanga emilimo mumibili chiefwe, mana koosi akakhwakhola kamalilishila mukhufwa. 6Nebutswa bulano, Nyasaye yakhukhola abalekhuule okhurula khumalako, shichila fwesi khwahulwa okhurula khu akali nikakhukhola okhuba ababohe. Kho shikhushikhalabanilanga Nyasaye khulwa okhulonda amalako akahandikwa ta, habula munjila imbia eya Roho.
Amalako nende obwonooni
7 #
Okhur. 20:17; Okhuk. 5:21 Kho khwakhaboola shiina bulano? Amalako katsana nobwonooni noho? Kata nahatuutu tawe. Amalako kalabula okhubaho shindakhamanyile obwonooni tawe. Amalako kalabula okhuboola mbu, “Olekomba ta.” Shindakhamanyile mbu obwikombi nishiina tawe. 8Habula okhubirira mwilako elo, obwonooni bwanyoola obwiyangu bwokhubuusia mwisie obwikombi bwetsimbia tsiosi. Amalako nikabulaho, obwonooni neshindu eshiamala okhufwa. 9Isie omwene ndali omulamu amalako nikabulaho, nebutswa olwa amalako ketsa, nabwo obwonooni nibubuukha, 10nasi nefwa. Nako amalako akali nikakhoyile okhureera obulamu, khwisie kandereera okhufwa. 11#Obucha. 3:13Obwonooni bwanyoola obwiyangu bwabwo okhubirira mumalako, bwangatia mana nibunzira.
12Kho Amalako ka Musa namatakatifu, khandi amalachilisio namatakatifu, akobulunjishi khandi amalayi. 13Ne kano kamanyisia mbu, akali amalayi kandereere isie okhufwa noho? Kata nahatuutu ta! Obwonooni nibwo obwareera okhufwa nibwikhoonyelanga akali amalayi. Obwonooni bwandereera okhufwa kho mbu imelo yabwo eyoburulanda yimanyishe. Khulweshio okhubirira mumalachilisio ako, obwonooni bulolosibungwa okhuba obubi kata okhushilakhwo.
Obulwani buli mumundu
14Khumanyile mbu Amalako nakeshiroho; nebutswa isie endi oweimelo eyomubili, owakusibwa okhuba omusumba wobwonooni. 15#Abagal. 5:17Shiemanyilisinjia akekholanga tawe; shichila shiekholanga aka enzenya ta, habula ekholanga akandalenya okhukhola tawe. 16Kho olwa ekholanga akandalenya okhukhola ta, kano kamanyinjia mbu, efuchililanga mbu Amalako kali habwene. 17Kho shiendi isie omwene oukholanga amakhuwa ako ta, habula nobwonooni obumenyanga mwisie. 18Emanyile mbu amalayi shikamenyanga mwisie ouli omundu namundu butswa tawe. Ndikombanga okhukhola amalayi, nebutswa shienyalilungwa okhukakhola tawe. 19Shikholanga amalayi aka enzenya okhukhola tawe, ekholanga amabi aka ndalenya okhukhola tawe. 20Nikaba mbu, ekholanga aka ndalenyanga okhukhola ta, kano kamanyinjia mbu, shiendi nisie oukakholanga ta, habula nobwonooni obumenyanga mwisie.
21Kho enyoolanga mbu, lilako lino likholanga emilimo, mbu olwa ndeenya okhukhola amalayi, enyoolanga nenzahule okhukhola amabi. 22Imelo yanje yomukari yisangalilanga Amalako ka Nyasaye. 23Nebutswa endolanga lilako lindi eliahukhaane nilikhola emilimo mubiungo bianje, nilwo lilako elilwananga lilako eliomwoyo kwanje kufuchililanga. Liikholanga okhuba omubohe khwilako liobwonooni elikholanga emilimo mumubili kwanje. 24Kho nekhole shiina isie? Niwiina oulahonokosia okhurula khumubili kuno okunzimililanga okhutsia mukhufwa? 25Ekhupilanga Nyasaye orio, oukholanga kano okhubirira mu Omwami wefwe Yesu Kristo!
Khulweshio, isie omwene mumwoyo kwanje ekhalabanilanga lilako lia Nyasaye, nebutswa imelo yanje eyomubili yikhalabanilanga lilako eliobwonooni.
Currently Selected:
ABAROMA 7: OLUDC
Highlight
Share
Copy
Want to have your highlights saved across all your devices? Sign up or sign in
