ABAROMA 6

Kristo akhukhola okhuba abalamu

1Kho bulano khuboole shiina? Khutsililile okhukhola obwonooni kho mbu obukoosia bwa Nyasaye bumeeteshe noho? 2Kata nahatuutu tawe! Okhulondokhana nobwonoonin ifwe khwamala okhufwa, kho khwakhatsiililila khurie okhukhola obwonooni tsana khandi? 3Toto mwene mumanyile mbu, olwa khwabatisiibwa nikhulimasibwa nende Kristo Yesu, khwalimasibwa khandi mukhufwakhwe. 4#Abakol. 2:12Khulwa okhubatiisibwa khwefwe, khwayabilwa nende Kristo mana nikhusanjilana mukhufwakhwe, kho mbu shinga olwa Kristo yalamusibwa okhurula mubafu khulwa eshikhole shioluyali shia samwana, nolwa fwesi khandi khukhoyile okhumenya obulamu obuyia khurio.

5Okhuba khwalimasibwa ninaye mukhufwakhwe, kho khumanyile toto mbu khulimasibwa ninaye mukhulamukhakhwe.

6Khandi khumanyile mbu; imelo yefwe yakhale yabambwa halala nende Kristo khumusalaba, kho mbu omubili kwefwe kwobwonooni kusasibwe, kho khuleshe okhuba khandi ababohe mubunyali bwobwonooni tawe. 7Okhuba lwomundu afwitsanga akholungwa okhuba omulekhuule okhurula mubunyali bwobwonooni. 8Kho olwa khwamala okhufwa nende Kristo, khusuubilanga mbu khwakhamenye ninaye khandi. 9Khumanyile mbu Kristo yalamusibwa okhurula mukhufwa, ne shialifwa khandi tawe. Kho okhufwa nakhwo shikhulikhwo nobunyali khandi khuye tawe. 10Khulweshio khulwa okhuba yafwa, obwonooni shibulikhwo nobunyali khuye tawe; ne bulano amenyanga obulamubwe mubusanjilani nende Nyasaye. 11Munjila ndala eyo, okhuula mwesi mwipaarekhwo abeene shinga abafu okhulondana nobwonooni, nebutswa Kristo yamuhelesiye obulamu, ne mumenyanga khulwa Nyasaye.

12Kho mulafuchilila okhurukwa nobwonooni mana buchile mulonde obwikombi bwenywe tawe. 13Kata mulahaanekhwo eshiungo shienywe shiosi shiosi khubwonooni, kho mbu shikhoonyelwe khulwa obumayanu tawe. Habula mwihaane abeene khu Nyasaye, shinga abandu abalamusibwe okhurula mukhufwa nimureerwa mubulamu, mana mwihaanile elala khu Nyasaye, khulwa okhwikhonyelwa munjila eyobulunjishi. 14Obwonooni bulamuruka khandi tawe; shichila shimuli hasi wamalako ka Musa ta, habula muli hasi wobukoosia bwa Nyasaye.

Khuli abasumba abokhukhola akobulunjishi

15Kho bulano khukhole shina? Khukhole obwonooni shichila shikhuli hasi wa amalako ka Musa ta, habula hasi wobukoosia bwa Nyasaye? Kata nahatuutu tawe! 16Toto mumanyile obulayi mbu, nimwihaana abeene okhuba abahulili khumundu nalebe, kho muli abasumba bomundu tsana oyo. Kho muli abasumba bobwonooni obureeranga olufu, noho muli abahulili, obukhukholanga okhuba abalunjishi. 17Nebutswa khupile Nyasaye orio! Okhuba kata nimwali abasumba abobwonooni khushise shindi, mwahulile nimulonda nomwoyo kwosi obwatoto buli mumechesio aka mwahebwa. 18Mwakholwa abalekhuule okhurula mubwonooni, ne nimwikhola abasumba bobulunjishi. 19(Emboola mululimi lwomundu namundu khulwa okhubeela obuteshele bwenywe bwoburulanda.) Eshise shindi inywe mwehaana abeene okhuba abasumba beshifwabwi nende obumayanu, khulwa okhukhola obumayanu. Munjila ndala eyo, bulano okhuula mwihaanile elala abeene shinga abasumba bobulunjishi, khulwa okhukhola amakhuwa amatakatifu.

20Olwa mwali abasumba bobwonooni, shimwali abakhalunjisiibwe okhukhola akachamisia Nyasaye tawe. 21Neinganga shiina eya mwanyoola khulwa okhukhola amakhuwa akamufwimbinjia emirwe bulano? Amakhuwa shinga ako kareeranga olufu. 22Nebutswa bulano mwamala okhulekhuulwa okhurula mubwonooni, muli abasumba ba Nyasaye. Inganga yenywe eya muli ninayo bulano nobulamu obutakatifu, ne obulayi bwabwo nobulamu bweinziayo. 23Shichila omurungo kwobwonooni nolufu, nebutswa eshihaanwa shiabutswa eshia Nyasaye nobulamu obulahwaho ta mubusanjilani nende Kristo Omwami wefwe.

Currently Selected:

ABAROMA 6: OLUDC

Highlight

Copy