ABAROMA 5

Okhukholwa abalunjishi imbeli wa Nyasaye

1Bulano, olwa khumalile okhukholwa abalunjishi imbeli wa Nyasaye okhubirira mubusuubili, khuli nomulembe nende Nyasaye okhubirira mu Omwami wefwe Yesu Kristo. 2Khulwa obusuubili bwefwe, Yesu Kristo yakhurelire mubukoosia bwa Nyasaye obwa khumenyangamwo bulano. Khwiyitsialanga khulwa obunaayi obwakhuli ninabwo khulwa okhusanjilana muluyali lwa Nyasaye! 3Khandi khwiyitsialilanga amatinyu kefwe, okhuba khumanyile mbu, amatinyu kebulanga obwisimilisi, 4nabwo obwisimilisi bwibulanga akokhwenya khwa Nyasaye, nako akokhwenyakhwe kareeranga obunaayi. 5Obunaayi buno nobweinganga khwifwe, shichila Nyasaye yatsukha butsukha obuheelibwe mumioyo chiefwe okhubirira mu Roho Omutakatifu, ouli eshihaanwa shia Nyasaye khwifwe.

6Okhuba olwa khwali nikhushili abalenyalila ta, Kristo yafwila abonooni olwa ebise ebia Nyasaye yenya kekholeshe biola. 7Nebutswa nobutinyi omundu okhufwila omundu omulunjishi. Haundi yakhabaho oweikholo inyumu owakhafwila omundu omulayi. 8Nebutswa Nyasaye yakhumanyia shinga olwa yakhuheela, okhuba Kristo yakhufwila olwa khwali nikhushili abonooni! 9Khulwa okhufwakhwe khumusalaba ifwe bulano khwakholwa abalunjishi imbeli wa Nyasaye. Kho kali habwene mbu, khulahonibwa okhurula khwiruma lia Nyasaye. 10Khwali abasuku ba Nyasaye, nebutswa yakhukhola abetsabe okhubirira mukhufwa khwomwanawe. Ne bulano olwa khuli abetsa ba Nyasaye, nakatoto mbu khulahonibwa khulwa obulamu bwa Kristo. 11Nebutswa shikali ako konyene ta; khwikhoyanga khulwa okhubela aka Nyasaye yakhukholelaokhubirira mu Yesu Kristo, owakhukholile bulano okhuba abetsa ba Nyasaye.

Adamu nende Kristo

12 # Obucha. 3:6; Obuch. 2:24 Obwonooni bwetsa mushialo okhubirira mumundu mulala; ne obwonoonibwe bwareera lifwa. Khulweshio, lifwa liasalaana nilitswana khubandu boosi, shichila abandu boosi bamala okhwonoona. 13Obwonooni bwaliho amalako nikashili okhuhaanwa; nebutswa eha amalako kalali ta, obwonooni shibubalikhanga tawe. 14Nebutswa okhurula mutsinyanga tsia Adamu okhuula khu etsia Musa olufu lwaruka abandu boosi, kata khwabo abalayonoona ta, shinga olwa Adamu yonoona naloba okhulonda amalako aka Nyasaye.

Adamu yali eshilolelo eshia oyo owali nali okhwitsa. 15Nebutswa babili bano shibafwanana ta, shichila eshihaanwa shia Nyasaye eshiobukoosia shishili shinga obwonooni bwa Adamu tawe. Kali toto mbu abandu abanji bafwa khulwa okhubela obwonooni obwomundu mulala oyo. Nebutswa obukoosia bwa Nyasaye nobunji okhushila, nolwa kali khu eshihaanwashie eshiobukoosia khubandu abanji okhubirira mubukoosia obwomundu mulala oyo ouli Yesu Kristo. 16Ne obwahukhani buliho hakari weshihaanwa shia Nyasaye nende obwonooni bwomundu mulala oyo. Olunyuma lwobwonooni tsana obwo, Nyasaye yakhalachila, “Abali neshikha.” Nebutswa olunyuma lwobwonooni obunji, Nyasaye yahaana eshihaanwa, eshia, “Ababula eshikha!” 17Kali habwene mbu, okhubirira mubwonooni bwomundu mulala, lifwa liachaaka okhuruka okhubirira mumundu mulala oyo. Nebutswa akomundu mulala ouli Yesu Kristo yakhola, namakhongo okhushila. Kho boosi abanyoola obukoosia bwa Nyasaye obukhongo khandi abakholwa okhuba abalunjishi baliruka mubulamu okhubirira mumundu mulala ouli Yesu Kristo.

18Khulweshio, shinga eshionoono shilala shiakhalachila abandu boosi eshiina, munjila ndala eyo eshikhole shilala eshiobulunjishi shikholanga abandu boosi okhuba abalekhuule mana shibahelesia obulamu. 19Khandi shinga abandu boosi bakholwa abonooni khulwa okhubela obukhayi obwomundu mulala, munjila ndala eyo Nyasaye alunjisinjia abandu boosi khulwa okhubela obuhulili obwomundu mulala ouli Yesu Kristo. 20Amalako karerwaho kho mbu obwonooni bumeeteshe; nebutswa aha obwonooni bwameetekha, obukoosia bwa Nyasaye bwemeeta okhushilakhwo. 21Khulwa okhubela obwonooni bwaruka nobunyali bwokhwufwa, nolwa obukoosia bwa Nyasaye burukanga nobulunjishi nibukhwinjisia mubulamu obulahwaho ta, okhubirira mu Yesu Kristo, Omwami wefwe.

Currently Selected:

ABAROMA 5: OLUDC

Highlight

Copy