ABAROMA 4

Obusuubili bwa Aburahamu neshilolelo eshilayi khwifwe

1Kho khuboole shiina khu Aburahamu kuuka woluyia lwefwe? Nishiina eshia yalola? 2Okhuba nikakhabele mbu yakholwa omulunjishi khulwa ebikholebie, yakhabeele neshindu eshia yekheyitsialilekhwo. Nebutswa shianyala okhwiyitsiala imbeli wa Nyasaye tawe. 3#Obucha. 15:6; Abagal. 3:6Amahandiko kaboolanga kari, “Aburahamu yasuubila Nyasaye, ne khulwa busuubilibwe, Nyasaye yamufuchilila okhuba omulunjishi.” 4Omundu oukhola emilimo arungungwa omurungo; kho omurungokwe okwo shikubukulungwa shinga eshihaanwa ta, habula shinga omurungo okwa akhoyeele okhunyoola. 5Nebutswa omundu owileeta khubusuubilibwe, ahalali khubikholebie ta, khandi nasuubila mu Nyasaye oulunjisinjia abonooni, yekhola okhuba omulunjishi. 6Shino nishio eshisina shiamakhuwa ka Daudi, olwa yaboola khumwikhoyo kwomundu wa Nyasaye afuchilila okhuba omulunjishi, ne nalahenjile khubikhole biomundu oyo ta, yaboola ari,

7 # Tsits. 32:1,2 “Nabeikhabi abo aba Nyasaye aleshela obumayanu bwabwe,

abo ababeela obwonooni bwabwe!

8Noweikhabi omundu owa Omwami alamubasiliakhwo obwonoonibwe ta!”

9Kho ikhabi eya Daudi yaboolakhwo yino yili khubashebwa bonyene noho? Tawe. Yili kata khu abo abalashebwa ta; shichila khuboolile khukahandikwa mbu; “Aburahamu yasuubila Nyasaye ne khulwa obusuubilibwe, Nyasaye yamufuchilila okhuba omulunjishi.” 10Kano kekholekha liina? Karanjilila imbeli wokhushebwa khwa Aburahamu, noho kekholekha olunyuma? Karanjilila okhwikholekha. 11#Obucha. 17:10Aburahamu yashebwa olunyuma, ne okhushebwakhwe khwali eshilolelo mbu, khulwa obusuubilibwe, Nyasaye yamufuchilila okhuba omulunjishi nashili kata okhushebwa. Kho Aburahamu niye samwana owa abo boosi abasuubila mu Nyasaye, nibakholwa abalunjishi, kata nibashili okhushebwa. 12Khandi niye samwana owa abo abashebwa, habula shikhuli okhushebwa khwonyene butswa ta, habula okhumeeta khukhushebwa bamenya obulamu bwobusuubili obwa papa wefwe Aburahamu yamenya nashili okhushebwa.

Obusuubisie bwa Nyasaye bunyoolekhanga okhubirira mubusuubili

13 # Obucha. 17:4-6; 22:17,18; Abagal. 3:29 Olwa Nyasaye yasuubisia Aburahamu nende abolwibulolwe mbu, eshialo shia Kanani shiakhabe eshishie, Nyasaye shiyamusuubisia ario, shichila mbu Aburahamu yalonda amalako ta, habula yasuubisia ario, shichila Aburahamu yasuubila mana Nyasaye namufuchilila okhuba omulunjishi. 14#Abagal. 3:18Okhuba nikakhaba mbu, obusuubisie bwa Nyasaye nobwa abo abalondanga amalako, kho obusuubili bwabandu, bwakhaba obukhaya butswa. Nabwo obusuubisie bwa Nyasaye buba nibubula inganga. 15Amalako kareeranga liruma lia Nyasaye. Nebutswa aha amalako kabula, obukhayi bwamalako shibuliho ta. 16#Abagal. 3:7Kho obusuubisie obwo bweleeta khubusuubili, kho mbu obusuubisie obwo bube eshihaanwa eshia Nyasaye eshiabutswa khubolwibulo lwa Aburahamu boosi shishili butswa eshihaanwa khwabo abalondanga amalako bonyene ta, habula kata khwabo abasuubila shinga Aburahamu yasuubila. Okhuba Aburahamu niye sefwe fwesi, 17#Obucha. 17:5shinga olwa Amahandiko kaboolanga mbu, “Ekhukholile iwe okhuba samwana Amahanga amanji.” Kho obusuubisie buno nobulayi imbeli wa Nyasaye, owa Aburahamu yasubilamwo oulamusinjia abafu, khandi owa likhuwalie likholanga ebilaliho ta okhubaho. 18#Obucha. 15:5Aburahamu yasuubila khandi naba nobunaayi, kata olwa eshifune shiobunaayi shilaliho ta, kho niyekhola, “Samwana Amahanga amanji.” Shinga butswa amalako kaboolanga mbu, “Olwibulolwo lulaba olunji shinga tsing'ining'ini.” 19#Obucha. 17:17Yali ahambi owemiyika eshikhumi shilala (100), nebutswa obusuubilibwe shibwatitiyakhwo kata olwa yapaara khubulamu bwomubilikwe okwali nikwahwamwo amaani ta, noho kata olwa yamanya mbu, Sara nomukofu shianyala okhwibula tawe. 20Yatsiililila okhusuubila, nalakanakania mumwoyokwe obusuubisie bwa Nyasaye ta. Obusuubilibwe bwamwitsusiamwo amaani, mana niyetsoomia Nyasaye. 21Yamanyila elala mbu, Nyasaye alahesia koosi akayamusuubisia. 22Niko akachila Aburahamu, khulwa okhubirira mubusuubili, “Nyasaye yamufuchilila okhuba omulunjishi.” 23Amakhuwa kano mbu, “Yafuchililwa mbu nomulunjishi,” shikahandichilwa ye yenyene tawe. 24Kahandichilwa ifwe fwesi abakhoyile okhufuchililwa okhuba abalunjishi, abasuubililanga muye, owalamusia Yesu, ouli Omwami wefwe okhurula mukhufwa. 25#Isa. 53:4,5Yahanwa mbu afwe khulwa obwonooni bwefwe, ne nalamusibwa khulwa okhukhukhola ifwe okhuba abalunjishi imbeli wa Nyasaye.

Currently Selected:

ABAROMA 4: OLUDC

Highlight

Copy