LUKA 6
6
Lireebo khukeinyanga eya Isabato
(Mat. 12:1-8; Mrk. 2:23-28)
1 #
Okhuk. 23:25
Khunyanga yindi eya Isabato, Yesu yali nabiranga mumikunda chieingano. Mana abeechibe nibachaaka okhwamula ingano, nibachikhulukunya mumakhono kabwe nibalia. 2Ne Abafarisayo bandi nibareeba bari, “Mbushiina nimukholanga akomusilo khunyanga eya Isabato?” 3Naye Yesu nabakalusia ari, “Mushili okhusomakhwo aka Daudi yakhola, olwa ye nende aba yali ninabo bali inzala ta? 4#Abal. 24:9#1 Sam. 21:1-6Daudi yenjila munzu ya Nyasaye, nabukula emikaate chiokhuhaanila Nyasaye, ne naliakhwo khandi nahelesiakhwo aba yali ninabo. Ne kwali omusilo omundu yesi yesi okhuliakhwo, okhuba abesaaliisi bonyene nibo abalitsanga emikaate echio.” 5Yesu namalilisia okhuboola ari, “Omwana womundu niye omwami owa Isabato.”
Yesu ahonia omundu owomukhono kwafwokoya
(Mat. 12:9-14; Mrk. 3:1-6)
6Khunyanga yindi eya Isabato, Yesu yatsia niyenjila musinagogi niyechesia. Omundu yalimwo owomukhonokwe omusaatsa kwali nikwafwokoya. 7Abandi khubechesia bamalako nende Abafarisayo, benya okhunyoola eshifune shiokhwinjilila Yesu, kho nibamureka mbu, balole naba nahonia khunyanga eya Isabato. 8Nebutswa Yesu yamanya amayililisio kabwe mana naboolela owomukhono kwafwokoya oyo ari, “Buukha witse osinjile hakari hano.” Omundu oyo nasinjila niyetsa ewa Yesu yali. 9Mana Yesu nabareeba ari, “Nomusilo okhukhola amalayi khunyanga eya Isabato noho okhukhola amabi, okhuhonia obulamu noho okhwira?” 10Mana Yesu nabahenga boosi eyi nende eyi, ne naboolela owomukhono kwafwokoya oyo ari, “Nyiila omukhonokwo.” Naye nakhola ario, ne omukhonokwe nikukololokha nikukalukha habwene. 11Nabo nibamusinyishila muno, nibaboolelana abeene khubeene eshiabakhamukholela.
Yesu yaahula abarume ekhumi nababili
(Mat. 10:1-4; Mrk. 3:13-19)
12Mutsinyanga etsio, Yesu yarula natsia khushikulu okhusaaya, ne nahongayo eshilo shiosi nasaayanga. 13Mana olwa bwashia, yalanga abeechibe, ne niyaahula okhurula mubo ekhumi nababili, abayamala alanje mbu, abarume. 14Yaahula Simoni, owayakulikha mbu Petero, Andereya omusiani wabwe Petero, Yakobo, Yohana, Filipo, Batsolomayo, 15Matayo, Tomasi, Yakobo omwana wa Alufayo, Simoni owalangwa mbu Omuziloti, 16Yuda omwana wa Yakobo nende Yuda Isikarioti, owamala abe omukhobi.
Yesu yechesia abandu nende okhubahonia
(Mat. 4:23-25)
17Ne olwa Yesu yali niyeshile okhurula khushikulu nende abarume abo, yasinjila hashikuri nali nomukanda omukhongo kwabeechibe. Omukanda omukhongo kwabandu kwaliho okhurula Yuda yoosi, nende okhurula Yerusalemu, nende amataala kokhuluchinga lwa Tiro nende Sidoni. 18Ne bali nibetsile okhumurecheresia nende okhuhonibwa obulwale bwabwe. Ne abanyasibungwa nebishieno boosi betsa mbu abahonie. 19Kho abomukanda boosi nibateema okhumutiilakhwo, okhuba obunyali bwarulanga muye nibubahonia boosi.
Aketsikhabi nende Akamasila
(Mat. 5:1-12)
20Mana Yesu nahenga khubeechibe ne naboola ari,
“Muli abeikhabi inywe abamanani,
okhuba obwami bwa Nyasaye nobwenywe!
21“Muli abeikhabi inywe abali inzala bulano,
okhuba mulekusibwa!
Muli abeikhabi inywe abalila amasika bulano,
okhuba mulatsekha!
22 #
1 Pet. 4:14
“Muli abeikhabi inywe olwa abandu bamusila, nibamuloba, nibamunyeka khandi nibaboola mbu, muli ababi khulwa Omwana womundu! 23#2 Akak. 36:16; Ebikh. 7:52Mutsaatsahale nimwikhoya olwa kano kekholekha khwinywe, okhuba omurungo kwenywe kwomwikulu nomukhongo. Okhuba abakuuka babwe bakholela abalakusi malala tsana ako.
24“Nebutswa muli mushilaamo shiobubi inywe abali abayinda bulano,
okhuba mumalile okhunyoola obuhuluushi bwenywe.
25“Muli mushilaamo shiobubi inywe abekuure bulano,
okhuba inzala yilimuluma!
Muli mushilaamo shiobubi inywe abatsekha bulano,
okhuba muliikhuula nimulila amasika!
26“Muli mushilaamo shiobubi inywe, olwa abandu boosi bamwitsoomia,
okhuba abakuuka babwe baboola amakhuwa
malala tsana ako khubalakusi abobubeeyi.
Okhuheela abasuku
(Mat. 5:38-48; 7:12a)
27“Nebutswa emuboolela inywe abambulilisinjia mbu, muheele abasuku benywe, nimubakholela amalayi abamusila. 28Mubalaamile ikhabi abamulaama eshilaamo shiobubi, nimubasaayila abamunyeka. 29Oukhupaama oluseya lulala, mushiukhasilie khandi olundi, ne oyo oukhunuula likootilio, lekha abukule kata lishaatilio khandi. 30Buli mundu oukhusaba eshindu omuhelesie, ne lwoundi abukula emianduchio olamubanza mbu akhukalusilie tawe. 31#Tob. 4:15; Mat. 7:12Mubakholelenje butswa abashienywe akamwikoomba mbu boosi bamukholele inywe.
32“Kho nimuba nimuheela abamuheela inywe bonyene, ni nganga shiina eya mwakhanyoola? Okhuba kata abonooni baheelanga ababaheela. 33Kho nimuba nimukhola amalayi khu abamukholelanga inywe amalayi bonyene, eshiakhachila mwanyoola tsikhabi nishiina? Okhuba kata abonooni bosi bakholanga bario! 34Khandi nimuba nimuhosia abamusuubilanga mbu, balamukalusilia injelesio bonyene, eshiakhachila mwanyoola tsikhabi nishiina? Shichila kata abonooni bosi bahosinjia abonooni bashiabwe, kho mbu babakalusilie eshia babahosiye eshio. 35#Sira 4:10,11Nebutswa inywe muheele abasuku benywe khandi mubakholelenje amalayi. Muhosie nimulalindilila okhukalusilibwa tawe, ne mulaba nomurungo omukhongo, kho mbu mube abaana ba Nyasaye Omukhongo Muno. Okhuba ye nowetsimbabasi khubalamukalusilinjia orio ta, nende khubamayanu. 36Mube abetsimbabasi shinga olwa Senywe ali owetsimbabasi.
Akokhukhalachila abashienywe eshiina
(Mat. 7:1-5)
37“Shimulakhalachile abashienywe eshiina ta, naye Nyasaye shialamukhalachila inywe eshiina tawe. Mubeele abashienywe, naye Nyasaye yesi alamubeela inywe. 38Helesinjie abashienywe, naye Nyasaye yesi alamuhelesia. Mulanyoola toto eshichelo eshitsuule, eshiikaarwe khandi eshisungusilwe nishisundukha hasi. Okhuba eshichelo shiene eshiamuchelelangamwo abashienywe, nishio eshia mwesi mulachelelwamwo khandi.”
39 #
Mat. 15:14
Mana khandi Yesu nababoolela oluchelo luno ari, “Omundu omubofu shianyala okhwimilila omubofu washie injila tawe. Namwimilila nibakwa mubwina boosi babili. 40#Mat. 10:24,25; Yoh. 13:16; 15:20Abulaho omwechi oushila omwechesiawe, nebutswa olunyuma lwokhweka, buli omwechi abetsanga shinga omwechesiawe.
41“Eshichila iwe nolola akhakokha akhali mumoni yowashio, ne nolalola eshirundu eshili mumoniyo omwene nishiina? 42Kata wakhaboolela orie owashio mbu, ‘Owashianje, lekha ekhuyinie akhakokha akhali mumoniyo,’ ne iwe omwene shionyala okhulola eshirundu eshili mumoniyo omwene ta? Oli omwikaati, ranjilila mbeli oyinie eshirundu eshili mumoniyo, ne olanyalilwa okhulola obulayi, lwoyinia akhakokha akhali mumoni yowashio.
Omusaala nende ebiamo biakwo
(Mat. 7:16-20; 12:33-35)
43“Omusaala omulayi shikwamanga ebiamo ebibi tawe. Khandi omusaala omubi shikwamanga ebiamo ebilayi tawe. 44#Mat. 12:33Buli omusaala kumanyishilanga khubiamo biakwo okwene, shionyala okhunoka amakhuyu okhurula khubisisia tawe. Kata shionyala okhunoka emitsabibu okhurula khumarakalu tawe. 45#Mat. 12:34Omundu omulayi arusinjia amalayi komwibishilolie liomumwoyokwe, naye omundu omubi arusinjia amabi komwibishilolie liamakhuwa amabi. Okhuba omundu aboolanga aketsuule mumwoyokwe.
Inzu eyombakhwa khulwanda nende eyombakhwa khumuyeshe
(Mat. 7:24-27)
46“Eshichilanga nimunanga mbu, ‘Omwami, Omwami,’ ne nimulakhola akemuboolelanga ta, nishiina? 47Omundu yesi yesi owitsa khwisie nahulila amakhuwa kanje khandi nakakhola, 48ali shinga omundu owaranjilila okhuyaba hasi ne niyombokha omuse kweinzuye khulwanda. Ne lwomuyembo kwamaatsi kwetsa, kwakhupa khunzu eyo, nebutswa shikwachireesia tawe, shichila yali niyombakhwa obulayi niyaralila. 49Nebutswa omundu yesi yesi ouhulilanga amakhuwa kanje, ne nalakakhola ta, ali shinga omundu owombakha inzuye nalaranjiliile okhuyaba hasi niyombakha omuse kwayo tawe. Ne lwomuyembo kwamaatsi kwetsa nikukhupa khunzu eyo, kwachikwisia hasi habwene nahabwene, ne niyisasikha muno.”
Currently Selected:
LUKA 6: OLUDC
Highlight
Share
Copy
Want to have your highlights saved across all your devices? Sign up or sign in