LUKA 7
7
Yesu ahonia omukhalabani womusesia Omuroma
(Mat. 8:5-13)
1Olwa Yesu yali namalile okhuboolela abandu amakhuwa ako koosi, yatsia Kaperinaumu. 2Ebweneyo, Omusesia Omuroma yaliyo owali nomukhalabaniwe owa yali niyaheela muno. Ne omukhalabani oyo yali nalwala nali ahambi okhufwa. 3Olwa omusesia oyo yahulila yifuma ya Yesu, yaruma abakhulundu ba Abayahudi okhumusaaya mbu, yetse ahonie omukhalabaniwe oyo. 4Ne olwa boola ewa Yesu yali, bamusaaya muno nibaboola bari, “Omundu uno akhoyeele obukhoonyibwo, 5okhuba yaheela abandu befwe khandi yakhumbashila ifwe Isinagogi.”
6Mana Yesu natsia ninabo. Ne olwa yali nali ahambi okhuula, omusesia oyo yaruma abetsabe bandi okhumuboolela mbu, “Omwami, shiolanyakhana ta. Isie shiendi oukhoyile iwe okhwinjila munzu mwanje tawe. 7Kata isie omwene shiekhoyile okhwitsa khwiwe tawe. Nebutswa boolakhwo butswa likhuwa, ne omukhalabani wanje alahona. 8Okhuba isie, siesi endi omundu owarebwa hasi woburuchi, ne siesi endi nende abelihe abali hasi wanje. Emboolelanga mulala endi, ‘Tsia,’ ne atsia. Khandi emboolela oundi endi, ‘Yitsa,’ ne yetsa. Ne nemboolela omukhabani wanje endi, ‘Khola lino,’ naye alikhola.”
9Olwa Yesu yahulila amakhuwa ako yahuka muno, nashiukhana naboolela abomukanda okwali nikumulondangakhwo ari, “Emuboolela mbu, eshili okhulolakhwo omundu owobusuubili shinga buno, kata mu Isiraeli mwosi tawe.”
10Ne abali nibarumilwe abo, olwa bachelela munzu yomusesia oyo, banyoola omukhalabaniwe nahonile.
Yesu alamusia omwana womukhasi omulekhwa
11Olunyumakhwo, Yesu yatsia mwitookho elilangwa mbu, Naini. Ne abeechibe halala nende omukanda omukhongo batsia ninaye. 12Ne olwa yoola butswa mushilibwa shielitookho elo, abandu barulamwo nibachinjile omulambo. Omulambo okwo kwali kwomusiani omutelwa, owa nyina yali omulekhwa. Ne abandu abanji abomwitookho elo bali nibali nomukhasi oyo. 13Olwa Omwami yamulola yamulolela tsimbabasi, ne namuboolela ari, “Shiolekhuula ta.” 14Mana nasita ahambi natiila khwisanduku liomulambo, ne abali nibalichinjile nibasinjila. Yesu naboola ari, “Omusiani! Ekhulaka mbu, obuushe.” 15Mana omufu oyo nalamukha niyekhala, ne nachaaka okhuboola. Mana Yesu namuhaana khunyina.
16Boosi nibatiilwa noburi obunji, nibetsoomia Nyasaye nibaboola bari, “Omulakusi omukhongo yebuushile mwifwe!” Khandi bari, “Nyasaye yetsile okhuhonia abandube!” 17Ifuma eyo niyitswana mu Yudea mwosi nende mubialo birondokhaneho biosi.
Abarumwa okhurula khu Yohana Omubatiisi
(Mat. 11:2-19)
18Abeechi ba Yohana nibaboolela Yohana amakhuwa ako koosi. Mana Yohana nalanga babili abokhubechibe, 19nabaruma khu Omwami mbu, bamureebe bari, “Iwe niwe omwenoyo ouletsa noho khulindilile oundi?” 20Olwa Abeechi babili abo boola khu Yesu bamuboolela bari, “Yohana Omubatiisi akhurumile khwiwe mbu khukhureebe khuri, ‘Iwe niwe omweneyo ouletsa, noho khulindilile oundi?’ ” 21Mushise shiene eshio Yesu yahonia abandu abanji abali nobulwale nende olumbe, nende ebishieno, ne abanji abali ababofu, yabahonia nibachaaka okhulola khandi. 22#Isa. 35:5,6; Isa. 61:1Mana nakalusia abarumwa ba Yohana abo nababoolela ari, “Kalushe muboolele Yohana akamuluutsi nende akamuhuliile mbu, ababofu banyalilungwa okhulola, abetsindieku bachendanga, abobuchele basiiyungwa, abekala amarwi bahulilanga, abafu balamusibungwa, ne abamanani bayaalilungwa Amakhuwa Amalayi. 23Noweikhabi omundu oulalikhwo nende okhukanakania khwisie tawe!”
24Olwa abarumwa ba Yohana bali nibenyooshe, Yesu yachaaka okhuboolela abemikanda khuka Yohana ari, “Nishiina eshia mwatsia mushitsiimi okhulola? Mwatsia okhulola olusi olureesibwa nomuyeka noho? 25Nishiina eshia mwatsia okhulola? Mwatsia okhulola omundu owifwalile tsingubo tsiobukusi? Lole, abandu abefwalanga bario nibamenya shinga abayinda, babetsanga mutsinzu tsiabaruchi! 26Kho nishiina eshia mwatsia okhulola? Mwatsia okhulola omulakusi noho? Emuboolela toto mbu, owamwatsia okhulola ashila omulakusi muno. 27#Mal. 3:1Okhuba Yohana niye omwenoyo owa Amahandiko kaboola mbu, Nyasaye yaboola ari, ‘Ndalaruma omurume wanje aranjilile okhutsia imbeliwo khulwokhukaasia injilayo.’ 28Emuboolela mbu, abulaho omundu namundu khubandu bano, ouli omukhongo okhushila Yohana tawe. Nebutswa ouli omutiiti muno Mubwami bwa Nyasaye nomukhongo muno okhushila ye.”
29 #
Mat. 21:32; Luka 3:12 Olwa obandu boosi nende abasololi bobushuru bahulila amakhuwa ako, betsoomia obulunjishi bwa Nyasaye muno, ne nibo aba Yohana yali nabatiisiiye. 30Habula Abafarisayo nende abechesia bamalako baloba akokhwenya khwa Nyasaye, akali nikabakhoyeele, mana nibaloba mbu Yohana shiababatiisia tawe.
31Mana Yesu natsiililila okhuboola ari, “Nenjelaasie abandu abolwibulo luno nende shiina? Bali shinga shiina? 32Bali shinga abaana abekhaale mushiiro khandi abalangananga nibaboolelana bari, ‘Khumukhupiile tsinyimbo tsielilele, nimulashina ta! Khwikhuulile nimulalila amasika ta!’ 33Yohana Omubatiisi yetsa nahonga inzala, khandi nalanywakhwo idivai ta, ne nimuboola muri, ‘Ali neshishieno!’ 34Bulano Omwana womundu yetsile, ne nalia khandi nanywa, ne muboola muri, ‘Lolekhwo omundu uno! Nomulangu khandi nomumesi. Nomwitsa wabasololi bobushuru khandi omwitsa wabonooni!’ 35Kata kario obuchesi bwa Nyasaye bumanyikhanga shinga olwa buli obwatieli khu abo ababufuchililanga.”
Yesu nali munzu ya Simoni Omufarisayo
36Omufarisayo undi yalanga Yesu okhulia ninaye. Mana Yesu natsia munzuye niyekhala niyerechekha okhulia eshiokhulia. 37#Mat. 26:7; Mrk. 14:3; Yoh. 12:3Ne lola, omukhasi yali mwitaala elo omwonooni. Olwa yahulila mbu, Yesu yali nalitsanga munzu eya Omufarisayo oyo, yabukula amafura keshing'ari niketsuule mushimuka, 38ne nasinjila emukongo wa Yesu, habilenjebie, nalilanga amasika; mana nachaaka okhunyisia ebilenje bia Yesu namasikake, nabieya neliswilie, nabitsunzuuna, ne nabitsushilila amafura keshing'ari ako. 39Ne olwa Omufarisayo owali nalanjile Yesu oyo yalola ario, yaboola mumwoyokwe ari, “Omundu uno niyakhabeele mbu toto nomulakusi, yakhamanyile shinga lwomukhasi oumutiilangakhwo uno ali, okhuba omukhasi uno nomwonooni.”
40Mana Yesu namukalusia naboola ari, “Simoni, liliho likhuwa elienzenya okhukhuboolela.” Simoni namukalusia ari, “Omwechesia, mboolela.”
41Yesu naboola ari, “Baliho abandu babili nelikofi liomundu ouhosinjia amapesa. Mulala yali nelikofi lia tsidinari ebikhumi biraano (500), naye oundi yali nelikofi elia tsidinari amakhumi karano (50). 42Ne olwa bali nibakhayilwe okhurunga, yabaleshela boosi babili. Kho khubabili abo, noulena owa mwene mapesa alaheela muno okhushilakhwo oundi?”
43Simoni nakalusia naboola ari, “Isie embara mbu, oyo owaleshelwa likofi likhongo.” Yesu namuboolela ari, “Oli habwene.” 44Mana Yesu nashiukhana nahenga ewa omukhasi oyo yali, ne naboolela Simoni ari, “Ololanga omukhasi uno? Enzinjiile munzuyo, ne shiumbelesiyekhwo amaatsi kokhwosia ebilenje bianje ta, nebutswa ye yanzosiye ebilenje bianje namasikake, khandi nabieya neliswilie. 45Shiunzinjisiiye niunzunzuuna ta, nebutswa ye ashitsiilililanga okhutsunzuuna ebilenje bianje okhurula olwa enzinjile munzu muno. 46Shiunzushiliilekhwo amafura khurumwe kwanje ta, nebutswa ye yambashile amafura khubilenje bianje. 47Khulweshio emuboolela mbu, alesheelwe obwonoonibwe obunji, okhuba alolesiye obuheeli obunji. Nebutswa oulesheelwe ebwonooni butiiti, alolesiye butswa obuheeli butiiti.”
48Mana Yesu naboolela omukhasi oyo ari, “Olesheelwe obwonoonibwo.” 49Mana aba yali ninabo khumeesa nibachaaka okhureebana abeene khu beene bari; “Uno nimundu shiina ouleshelanga kata abandu obwonooni?” 50Naye Yesu naboolela omukhasi oyo ari, “Obusuubilibwo bukhuhoniye, tsia nomulembe.”
Currently Selected:
LUKA 7: OLUDC
Highlight
Share
Copy
Want to have your highlights saved across all your devices? Sign up or sign in