LUKA 5
5
Yesu alanga abeechibe bambeli
(Mat. 4:18-22; Mrk. 1:16-20)
1 #
Mat. 13:1,2; Mrk. 3:9,10; 4:1 Inyanga yindi, olwa Yesu yali nasinjiile khuluchinga lweinyanza ya Genesareti, omukanda omukhongo kwabandu kwali nikumubotokhaane nibarechelesinjia likhuwa lia Nyasaye. 2Yesu yalola amaaro kabili nikasinjisiibwe khuluchinga lweinyanza. Ne abanaabi betsinyeni beene bali nibali khulukuku niboosinjia tsikhanda tsiabwe. 3Mana Yesu niyenjila muliaro elala khuko, eliali lia Simoni, ne namuboolela mbu, alisitiekhwo munyanza hatiiti okhurula khuluchinga. Kho Yesu niyekhala muliaro elo, ne niyechesia abemikanda abo. 4Ne olwa yamala okhwechesia, yaboolela Simoni ari, “Sitiakhwo eliaro elo mulusiba mana iwe nende abashio mufuubemwo tsikhanda tsienywe kho mbu, mutiile tsinyeni.”
5 #
Yoh. 21:3
Naye Simoni namukalusia ari, “Omwami, khunyakhaane eshilo shiosi, nikhulanyoolakhwo eshindu shiosi shiosi tawe! Ne okhuba mbu oboolile orio, ndalafuuba tsikhanda mulusiba.” 6#Yoh. 21:6Ne olwa bali nibafuubile tsikhanda etsio mumaatsi, batiila tsinyeni tsinyinji nitsiba ahambi okhurandula tsikhanda etsio. 7Kho nibalanga abashiabwe abali muliaro lindi mbu, betse babakhoonye. Nabo nibetsa nibetsusia tsinyeni mumaaro kabwe koosi ne nikaba ahambi okhwiyinikha. .
8Ne olwa Simoni Petero yalolakhwo akali nikekholeeshe, yasikama imbeli wa Yesu bwangu, ne namuboolela ari, “Omwami, ndekha embe, okhuba isie endi omwonooni!”
9Yaboola ario shichila ye nende abashie aba yali ninabo bahuka muno, okhuba bali nibatiilile tsinyeni tsinyinji muno. 10Kata Yakobo nende Yohana abaana ba Zebedayo, abanaabanga tsinyeni halala nende Simoni, boosi bahuka muno. Mana Yesu naboolela Simoni ari, “Shiolaria ta, shichila okhuchaaka inyanga yino, olaba omunaabi wabandu.”
11Ne olwa bali nibareere amaaro kabwe khuluchinga, balekha buli shindu, nibalonda khu Yesu.
Yesu ahonia omundu wobuchele
(Mat. 8:1-4; Mrk. 1:40-45)
12Olwa Yesu yali nali mwitaala lindi, omundu wobuchele bwali nibwamala omubili kwosi yetsa. Ne olwa yalola Yesu, yamwinamila namusaaya ari, “Omwami, noba nochama, onyala okhusiiya!”
13Mana Yesu nanyiila omukhonokwe, ne namutiilakhwo, naboola ari, “Enjamile mbu osiiyishe!” Habwene nahabwene obuchele obwo nibumurulakhwo. 14#Abal. 14:1-32Yesu namukaania ari, “Shiolaboolelakhwo omundu yesi yesi amakhuwa kano ta, habula otsie khumwisaaliisi akhuhenjelesie obulayi; ne khulwokhumanyia abandu boosi mbu ohonibwe, ohaane eshihaanwa shia Musa yalaka.”
15Nebutswa amakhuwa ka Yesu kameeta okhutswanibwa hosi hosi, nachio emikanda chiabandu emikhongo nichikhung'ana okhumurecheresia nende okhuhonibwa obuteshele bwabwe. 16Naye narula yenyene, natsia mushitsiimi hamabiswi okhusaaya.
Yesu ahonia omundu wali niyafwokoya
(Mat. 9:1-8; Mrk. 2:1-12)
17Khunyanga yindi, Yesu yali niyechesinjia abandu, ne Abafarisayo bandi nende abechesia bamalako bali nibekhaaleho, abali nibarulile mubuli litaala mulukongo lwa Galilaya, mu Yudea nende mu Yerusalemu. Ne Yesu yali nobunyali okhurula khu OMWAMI Nyasaye, obwokhuhonia abalwale. 18Mana abandu bandi nibetsa nibachinjile owafwokoya oyo khushitali, nibateema okhumwinjisia munzu mwa Yesu yali kho mbu, bamure imbeliwe. 19Ne shichila mbu, abandu bali abanji, shibanyalilwa okhumwinjisia tawe. Kho nibamuyila ikulu khushilama shieinzu eyo, nibekula habundu nibamwishiliaho khushitalishie hakari kari wabandu, nibamureera imbeli wa Yesu. 20Ne olwa Yesu yalola obusuubili obukhongo bwa bali ninabwo, yaboolela omulwale oyo ari, “Omwitsa wanje, olesheelwe obwonoonibwo.”
21Mana abechesia bamalako nende Abafarisayo abo nibachaaka okhukanakania nibaboola bari, “Nimundu shiina ounyekanga Nyasaye uno! Nyasaye yenyene niye ounyala okhuleshela abandu obwonooni!”
22Yesu yamanya aka bali nibayililisinjia, ne nababoolela ari, “Muyililisinjia murio mbushiina? 23Eliangu nelilena? Okhuboola mbu, ‘Olesheelwe obwonoonobwo,’ noho okhuboola mbu, ‘Buukha ochende?’ 24Ndalamumanyia shinga Omwana womundu ali nobunyali khushialo okhuleshela abandu obwonooni.” Kho naboolela owafwokoya oyo ari, “Ekhuboolela mbu, buukha wituushe eshitalishio mana otsie ingowo!”
25Habwene nahabwene, omundu oyo yakololokha nabuukha bwangu imbeli wabwe boosi, niyetuukha eshitali eshia yali nakonilekhwo, ne natsia ingowe niyetsoominjia Nyasaye. 26Boosi nibang'ang'aala! Nibatiilwa noburi, nibamwitsoomia Nyasaye nibaboola bari, “Inyanga yino khulutsi amakhuwa kokhuchenya!”
Yesu alanga Lawi okhuba omulondiwe
(Mat. 9:9-13; Mrk. 2:13-17)
27Olunyuma lwamakhuwa ako, Yesu yarulaho natsia, ne nalola omusololi wobushuru oweliira mbu, Lawi niyekhaale aha basololelanga obushuru. Yesu namuboolela ari, “Unondekhwo.” 28Naye Lawi nasinjila nalekha ebindu biosi, ne namulondakhwo.
29Mana Lawi nakaasilia Yesu lisabo likhongo munzumwe, ne abandi khubacheni belisabo elo, bali abomukanda omukhongo kwabasololi bobushuru nende abandu bandi. 30#Luka 15:1,2Ne Abafarisayo bandi nende abechesia bamalako bandi abali abomukanda kwabwe nibeyiniakananila abeechi ba Yesu nibabareeba bari, “Mbushiina mulitsanga nimunywa nende abasololi bobushuru nende abonooni?”
31Naye Yesu nabakalusia ari, “Abandu abalamu shibakhabanga omusilishi ta, habula abalwale nibo abakhabanga omusilishi. 32Shindayetsa okhulanga abalunjishi ta, habula ndetsa okhulanga abonooni.”
Lireebo khukokhuhonga inzala khulwa okhusaaya
(Mat. 9:14-17; Mrk. 2:18-22)
33Abandu bandi baboolela Yesu bari, “Abeechi ba Yohana Omubatiisi nende Abafarisayo bahonganga inzala nibasaaya buli nyanga, nebutswa abeechibo balitsanga butswa nibanywa.”
34Naye Yesu nabakalusia ari, “Abacheni beshiselelo shibanyala okhuhonga inzala, olwa mwene eshiselelo ashiliho ninabo tawe. 35Nebutswa tsinyanga tsitsanga, olwa mwene shiselelo aliyinibwaho okhurula khubo, inyanga yaliyinibwaho eyo, nilwo olwa balihoonga inzala nibasaaya.”
36Khandi Yesu nababoolela oluchelo luno ari, “Abulaho ourandulanga eshilaka okhurula khungubo imbia mbu, ashinabile khungubo ikhulu tawe. Okhuba nakhola ario, alaba naranduule ingubo imbia eyo, ne eshilaka sheingubo imbia shishinyala okhuleeng'aana neingubo ikhulu eyo tawe. 37Kata shialiho outsukhanga idivai indoro mumifuko emikhulu chiamaseelo ta, okhuba idivai indoro eyo yinyala okhurulaka emifuko emikhulu echio, nichirandukha, nayo niyisasikha yosi pe. 38Habula idivai indoro yikhoyile okhutsukhwa mumifuko chiamaseelo emiyia. 39Kata abulaho owikombanga okhunywa idivai indoro namalile okhunywa eyilulile tawe, shichila alaboola ari, ‘Eyilulile yino niyo indayi.’ ”
Currently Selected:
LUKA 5: OLUDC
Highlight
Share
Copy
Want to have your highlights saved across all your devices? Sign up or sign in