EBIKHOLE BIA ABARUME 25
25
Paulo areeba okhuyasibwa khandi nomuruchi wa Roma
1Olunyuma olwa tsinyanga tsitaru, Fesito namalile okhuula mulukongo olwo, yarula Kaisaria natsia Yerusalemu, 2ewa abesaaliisi abakhulundu nende abemilisi ba Abayahudi bamuboolela koosi aka bali nibenjilila Paulo itookho. Nibamusaaya 3mbu, nachama abafuchilile bayile Paulo Yerusalemu; shichila bali niberecheeshe okhwiirira Paulo khunjila. 4Fesito nabakalusia ari, “Paulo nomubohe Kaisaria, nasi omwene endi ahambi okhukalukhayo. 5Kho leshe abemilisi benywe betse khutsie ninabo Kaisaria, mana bayaasie omundu uno naba niyakhola amabi.”
6Fesito yamala ahambi tsinyanga munane noho ekhumi, mana natsia Kaisaria. Khunyanga yaloondakhwo yatsia mushiina mana nalaka mbu Paulo arerwe imbeliwe. 7Ne olwa Paulo yetsa, Abayahudi abali nibarulile Yerusalemu basinjila nibamubotokhana, ne nibachaaka okhuboola amakhuwa amanji amabi khu Paulo, kabeene balanyala okhulolesia mbu nakatieli tawe. 8Nebutswa Paulo omwene yeterera naboola ari; “Isie eshili okhukholakhwo likhuwa libi liosi liosi eliokhufukula amalako aka Abayahudi noho Ihekalu noho kata omuruchi wa Roma tawe.”
9Nebutswa Fesito niyenyanga okhuchamisia Abayahudi yareeba Paulo ari, “Onyala okhufuchilila okhutsia Yerusalemu mana oyaasilibweyo imbeli wanje?”
10Naye Paulo naboola ari “Esie esinjiile imbeli weshiina shiobukhalachi eshia Omuruchi wa Roma, aha ekhoyeele okhuyaasilibwa. Shinga olwa iwe omwene omanyile obulayi, isie shindakholakhwo likhuwa liosi libi khu Abayahudi tawe. 11Nikaba mbu ndafunaka amalako, ne khandi nikhola eshindu eshiakhachila ndakhalachilwa okhufwa, shiesabanga mbu endekhwe butswa tawe. Nebutswa nikaba mbu, obwatoto bubula mukabanzinjililangakhwo itookho, shialiho ounyala okhuhaana mumakhono kabwe tawe. Esaaya mbu eyaasibwe nomuruchi wa Roma.”
12Mana Fesito, niyakhaboolelana nabeshiinashie nakalusia ari, “Oreebile mbu, oyaasibwe nomuruchi wa Roma, kho khulakhuyila imbeli ewa omuruchi wa Roma.”
Paulo areerwa imbeli ewa Omuruchi Aguripa nende Berenike
13Olunyuma lwetsinyanga tsindiiti omuruchi Aguripa nende Berenike betsa Kaisaria khulwa obucheni bwokhwinjisia Fesito. 14Olwa bali nibakhabayo tsinyanga tsinyinji, Fesito yenoosia omuruchi amakhuwa ka Paulo ari, “Omundu ali hano owa Feliki yelekha mumbohe. 15Ne olwa ndatsia Yerusalemu, abesaaliisi abakhulundu nende abakofu abeshiyahudi bamwinjilila mana nibaareeba mbu emukhalachile eshiina. 16Nebutswa isie ndababoolela mbu, ifwe Abaroma shikhuli nobunyali obwokhuhaana khubandu omundu yesi owinjililwe khulwa okhukhola likhuwa libi tawe. Okhuula aranjilile aheebwe obwiyangu bwokhwakaana nende abamwinjililanga itookho abo habulafu, mana yeterere omwene khukabamwinjililangakhwo ako. 17Kho olwa betsa hano shindashinda ta, habula inyanga yalondakhwo ndekhasia eshiina, ne nindaka mbu omundu uno areerwe. 18Abamwinjililanga abo nibasinjila, nebutswa shibamwinjililakhwo khwikhuwa liosi libi shinga ndapaaranga mbu balamwinjilila tawe. 19Akabali ninako kali butswa amayingane khumakhuwa akeidiini yabwe, akomundu undi owalangwa mbu Yesu, owafwa, nebutswa Paulo aboolanga mbu nomulamu. 20Isie ndakhaywa shinga olwa ndakhanyoola akahabwene khumakhuwa kano, kho nireeba Paulo naba niyakhafuchilila okhutsia Yerusalemu mana ayaasilibwe ebweneyo khumakhuwa ako. 21Nebutswa Paulo yareeba mbu, alindwe obulayi okhuula lwomuruchi wa Roma amuyaasia. Kho ndalaka mbu alindwe obulayi okhuula olwa emuruma khumuruchi wa Roma.”
22Aguripa naboolela Fesito ari, “Ndakhekoomba isie omwene erecheresiekhwo amakhuwa akomundu uno.”
Fesito namukalusia ari; “Olamurecheresia mukamba.”
23Kho inyanga yalondakhwo Aguripa nende Berenike betsa muluyali olukhongo nende omwikhoyo nibenjila munzu ikhongo yemikhung'ano. Bali nende abakhongo babelihe belihe belitookho. Mana Fesito nalaka mbu Paulo areerwe mukari. 24Kho Fesito naboola ari, “Omuruchi Aguripa nende boosi abali hano ninefwe; mulolanga omundu uno, owa Abayahudi boosi abali hano nende abali Yerusalemu bamwinjililanga itookho khwisie. Bakhupanga obuyoka mbu shiakhoyile okhutsiililila okhubaho omulamu tawe. 25Nebutswa isie shinyoolilekhwo muye likhuwa elia yakhola eliakhachila akhalachilwe okhufwa tawe. Ne shichila ye omwene yareebile okhutsia okhuyaasibwa imbeli womuruchi wa Roma, emalile okhumuruma atsie khuye. 26Nebutswa isie shindikhwo nende likhuwa lichoomeshe khuye eliandakhahandichila omuruchi wa Roma tawe. Kho emurerile hano imbeli wenywe, ne okhushila muno imbeliwo, iwe omuruchi Aguripa! Kho mbu nikhwakhanoonelesia amakhuwake, enyala okhuba nende eliandakhahandika. 27Okhuba kandoleshelanga nikali akobusilu okhuyila omubohe imbeli womuruchi wa Roma, ne nelamanyia habulafu aka bamwinjililangakhwo ta.”
Currently Selected:
EBIKHOLE BIA ABARUME 25: OLUDC
Highlight
Share
Copy
Want to have your highlights saved across all your devices? Sign up or sign in
