EBIKHOLE BIA ABARUME 24

Abayahudi benjilila Paulo itookho

1Mana olunyuma lwetsinyanga tsirano, omwisaaliisi omukhongo Anania, yatsia Kaisaria nende abakofu bandi nende Tatulo, omutereri wamalako. Batsia imbeli wa Feliki nibaboola amakhuwa koosi aka bali nibenjililanga Paulo itookho. 2Mana Paulo nalangwa okhwinjilamwo, ne Tatulo nachaaka okhuboola namwinjilila itookho ari.

“Owoluyali Feliki! Obwimilisibwo bwobuchesi bukhurerere omulembe khulwa oluhoono olurambi, ne amakhuwa amanji akakhoyile okhukasibwa kakasibungwa khulwa obutsililili obulayi bwelihanga liefwe. 3Khukafuchililanga hosi hosi mubise biosi, ne khukhupilanga orio muno okhushila. 4Ne shinzenya okhumala ebisebio ebinji tawe. Nebutswa ekhusaaya mbu wisimilisie, mana orecheresie obwinoosi bwefwe obwimbichiti. 5Khwanyoolile omundu uno okhuba owamayinjie, achachinjia induli mu Abayahudi boosi mushialo shiosi, khandi niye omwimilisi owomukanda okwa Abanazareti. 6Khandi yatemile okhufwabia Ihekalu, mana nikhumutiila.#24:6 Amahandiko kandi kameetangakhwo tsinyaali tsino 6-8a. Khwenya okhumukhalachila okhulonda namalako kefwe. 7Nebutswa omusinjilili owelihe Lisia, yetsa niyeeyinjisimwo namubukula namaani okhurula mumakhono kefwe. Mana naboolela abali nibamwinjilile itookho mbu betse imbeliwo. 8Ne iwe omwene nomunoonelesia olamanya okhurula khuye, amakhuwa koosi akakhumwinjililanga.” 9Abayahudi boosi nibasanga halala khulwa okhumwinjilila itookho, ne nibaboola mbu ako koosi nakatoto.

Paulo yeterera imbeli wa Feliki

10Mana Omukafuna nasimila Paulo mbu aboole, naye Paulo naboola ari, “Emanyile mbu wabeele omukhalachi weshiina khwihanga lino khulwemiyika eminji, kho esangaliile okhwiterera omwene imbeliwo. 11Shinga lwonyala okhulola omwene, tsishili okhubira tsinyanga ekhumi natsibili okhurula olwa ndatsiile Yerusalemu okhwinamila Nyasaye. 12Abayahudi shibayanyoola neyingananga nende omundu yesi yesi muhekalu ta, kata shibayanyoola ninjachinjia indiri mubandu ta, kata musinagogi noho kata habundu hosi hosi mwitookho tawe. 13Kata shibanyala okhukhumanyisia obwatoto bwamakhuwa kabanzinjililanga itookho imbeliwo tawe. 14Efuchililanga kano imbeliwo mbu, enzinamilanga Nyasaye owabakuuka befwe, ninoondanga khunjila eya Omwami yamanyia, eya bo baboolanga mbu neyobubeeyi. Ne khandi ndasuubila ako koosi akahandikwa mumalako ka Musa nende mubitabu ebiabalakusi. 15Endi nende obunaayi mu Nyasaye, bulala tsana obwabandu bano abeene bali ninabwo, obuli mbu, abandu boosi abalunjishi nende abamayanu, bakhalamushe okhurula mukhufwa. 16Ne kho endeemanga okhukhola shinga olwa enyala buli lwosi okhulola mbu, obumanyilisi bwanje obwomukari nobwahabwene imbeli wa Nyasaye nende abandu.

17 # Ebikh. 21:17-28 “Olunyuma lwokhuba ehale okhurula Yerusalemu khulwemiyika eminji, ndatsiayo okhuyila amapesa akokhukhoonya abandu banje nende okhukhola emisango. 18Ne olwa ndali nikholanga kano, nilwo olwa banyoola muhekalu nindakhamala omulukha kwokhwisiiya. Omukanda kwabandu shikwalikhwomwo kata obuyoka shibwalikhwoho tawe. 19Nebutswa balala khu Abayahudi okhurula mulukongo lwa Asia baliyo; bo abeene bakhoyile okhwitsa imbeliwo mana bakhwinoosie aka baba nibanzinjililanga itookho nibaba nibali ninako. 20Noho lekha abandu bali hano bano bakhuboolelekhwo nikali mbu banyoola neshikha olwa ndasinjila imbeli wabeshiina babwe. 21#Ebikh. 23:6Nikalali khulwelikhuwa elala elia ndalaanjilisia habulafu olwa ndasinjila imbeli wabwe nimboola endi, ‘Inywe muyaasinjia isie inyanga yino shichila mbu esuubilanga mbu abafu balilamukha.’ ”

22Mana Feliki owali niyamanya habwene khu aka Injila eya Omwami yamanyia eyo, yasinjisia eshiina. Nababoolela ari; “Olwa Lisia omusinjilili wamahe nabe niyoolile, nilwo olwa nikhukhalache eshiina shienywe.” 23Nalaka omusikari omukhongo owali nalindile Paulo mbu, alinde Paulo obulayi, khandi amuhelesie obulekhuule buhela, khandi abetsabe bakaywa okhumureerera eshindu shiosi eshia yenya tawe.

Paulo areerwa imbeli wa Feliki nende Durusila

24Olunyuma lwetsinyanga tsindiiti Feliki yetsa nomukhasiwe Durusila, owali Omuyahudi. Mana nalanga Paulo mbu yetsekhwo amurecheresie olwa aba naboolanga khukokhusuubilila mu Kristo Yesu. 25Nebutswa shinga Paulo yatsiililila okhuboola khukobulayi, obwilindi nende khukeinyanga eyitsanga eyokhukhalachilwa eshiina, Feliki yaria mana naboola ari, “Bulano onyala okhwinyookha. Nekhulaanje khandi nendi nobwiyangu.” 26Mubise ebio yapaaranga mbu haundi Paulo anyala okhumuhelesiakhwo amapesa. Khulweshio yamulanganga khase nakhase naboola ninaye.

27Olunyuma lwemiyika chibili okhuhwa, Perukio Fesito yakalukha mushilenje shia Feliki shinga omukafuna. Feliki yenya okhuchamisia Abayahudi, kho nalekha Paulo mumbohe.

Currently Selected:

EBIKHOLE BIA ABARUME 24: OLUDC

Highlight

Copy