EBIKHOLE BIA ABARUME 26

Paulo yeterera omwene imbeli wa Aguripa

1Mana Aguripa naboolela Paulo ari, “Osubulwe okhuboola, kho witerere omwene.” Paulo naye nachinguula omukhonokwe ikulu niyeterera omwene naboola ari, 2“Omuruchi Aguripa! Isie omwene ndibasia okhuba oweikhabi inyanga yino okhuba endi imbeliwo khulwokhuboola omwene ninditerera khumakhuwa koosi aka Abayahudi banzinjililangakhwo itookho. 3Shinga omwene omanyile obulayi ebiima ebia Abayahudi nende oburambani bwabwe, Kho ekhusaaya mbu wisimilisie okhuurecheresia.

4“Abayahudi boosi bamanya okhwichendelesia khwanje okhurula mububuukha bwanje. Bamanyile tsinjila tsiandamenyelamwo obulamu bwanje bwosi, olwambeli nendi mushialo shianje shiene, ne olunyuma nendi mu Yerusalemu. 5#Ebikh. 23:6; Abafil 3:5Bamanyile khulwa eshise eshiraambi, nibenya banyala okhuhaana obuloli mbu okhurula olwambeli lwene, isie ndamenya shinga omusanji weing'anda eyilindanga amalako akeidiini yefwe eya Abafarisayo obutinyu. 6Ne bulano esinjiile hano khulwokhuyaasibwa khulwa obunaayi obwa endi ninabwo mubusuubisie bwene obwa Nyasaye yahelesia abakuuka befwe. 7Obusuubisie bwatsana obwetsimbia ekhumi natsibili tsiabandu befwe banaayanga okhunyoola, olwa bamwinamilanga Nyasaye eshilo neshiteere. Kho owoluyali, Abayahudi bano banzinjililanga itookho imbeliwo khulwa okhubeela obunaayi buno. 8#2 Mak. 7:9Nishiina eshiakhachila inywe abali hano mwakhaywa okhusuubila mbu Nyasaye alamusinjia abafu?”

9 # Ebikh. 8:3; 22:4,5 “Isie mwene ndapaara mbu, okhuula ekhole akenyala koosi okhufukula amechesio ka Yesu wa Nazareti. 10Akenako niko akandakhola mu Yerusalemu. Ndanyoolanga obunyali okhurula khubesaaliisi abakhulundu mana emboha abasuubili mumbohe, ne olwa bakhalachilungwa okhufwa, isie siesi ndafuchililanga mbu berwe. 11Akhandi akhanji ndachilanga nibanyaasibwa mutsisinagogi, nindeema okhubahachia mbu, bekaane obusuubili bwabwe. Ndali noburuma obunji khubo, mbu kata ndatsia mubialo ebicheni okhubasandiayo.

Paulo yenoosia okhwikalukhasiakhwe

(Ebikh. 9:1-19; 22:6-16)

12“Kano niko akachila ninzia Damasiko nobunyali nende amalako okhurula khubesaaliisi abakhulundu. 13Iwe owoluyali, ndali nindi khunjila mushiteere hakari, ne nindola obulafu obwakha okhushila obweliuba niburula mwikulu mana nibunzashila tsimbeka tsiosi nibumbotokhana halala nende abandali ninabo khuluchendo olwo. 14Fwesi pe khwakwa hasi, ne nimbulila omwoyo okhurula mwikulu nikumboolela muluheburania kuri, ‘Saulo, Saulo! Usandinjia mbushiina? Wisalisinjia omwene butswa shinga ing'ombe eyiratsa eshibambo.’ 15Nasi nireeba endi, ‘Niwe wina, Omwami?’ Naye Omwami niyangalusia ari, ‘Nisie Yesu owa osandinjia. 16Nebutswa buukha osinjile. Ekhulolesheele kho mbu ekhwahule obe omukhalabani wanje. Ne okhurula bulano okhuula oboolele abandi aka oluutsi olwaleelo, nende aka nekhumanyie olunyuma. 17Ndalakhuhonokosia okhurula mumakhono kabandu ba Isiraeli nende okhurula khubamahanga aba nekhurumekhwo. 18Olabatimbula tsimoni tsiabwe, nobarusia mushiilima okhwitsa mubulafu nende okhurula mubunyali bwa Setani okhwitsa khu Nyasaye, kho mbu okhubirira mubusuubili bwabwe mwisie, baleshelwe obwonooni bwabwe, mana banyoole obwikhalo bwabwe halala nende abaahule ba Nyasaye.’

Paulo yenoosia khukemilimochie

19“Khulweshio, omuruchi Aguripa, shindakhalobile lilolelo eliandanyoola okhurula mwikulu tawe. 20#Ebikh. 9:20,28,29Ndachachila Damasiko nende Yerusalemu mana okhuula mu Yudea mwosi nende mubamahanga, niyaalanga mbu okhuula bekalukhasie okhurula mubwonooni bwabwe, nibakalushila Nyasaye, mana bakhole ebikhole ebimanyia mbu bekalukhasiye. 21Nikhulweshifune shino eshiachila Abayahudi nibandila olwa ndali nindi muhekalu, nibenya okhunzira. 22Nebutswa Nyasaye yaakhoonya okhuula khunyanga yino, ne kho esinjiile hano, okhuhaana obuloli bwanje khuboosi, abatiiti nende abakhongo. Emboolanga amakhuwa malala kabalakusi nende Musa baboola mbu kalikholekha; 23#1 Abakor. 15:20; Isa. 42:6; 49:6mbu, okhuula Kristo anyasibwe mana abe owambeli okhulamukha okhurula mubafu, okhurumbula obulafu bwobuhonia khu Abayahudi nende khu abamahanga.”

24Ne olwa Paulo yaboola niyeterera munjila yino, Fesito yamuyibila obutinyu ari, “Iwe Paulo, olalushe noho? Okhusomakhwo okhunji khukhukholile okhulalukha.”

25Nebutswa Paulo yakalusia naboola ari, “Shiendi omulalu ta, owoluyali Fesito! Isie emboolanga amakhuwa akatoto, ne endi habwene. 26Omuruchi Aguripa! Isie enyala okhuboola ninawe neyitswoni amakhuwa kano, shichila okamanyilisiye obulayi bwene, okhuba emanyile elala mbu, omanyile buli elala khuko, okhuba shikali amakhuwa akekholekha mabiswi tawe. 27Omuruchi Aguripa, iwe osuubilanga mubalakusi noho ta? Emanyile mbu wabasuubila!”

28Aguripa nakalusia Paulo ari, “Opaaranga mbu mushise shitiiti shino onyala okhuukhola okhukwa omukristo?”

29Paulo namukalusia ari, “Shibe eshise eshitiiti noho eshiraambi, amasaayo kanje khu Nyasaye kali mbu, iwe nende inywe mwesi abaarecheresinjia inyanga yino munyale okhuba shinga olwa isie endi, halali shimusaayilanga mbu mube ababohe shinga isie endi tawe!”

30Mana omuruchi, omukafuna, Berenike, nende abandu abali nibekhale nibasinjila, 31ne olwa bali nibarulangaho baboolelana abeene khubeene bari, “Omundu uno shiakholilekhwo eshindu eshichila akhalachilwe okhufwa noho okhubohwa tawe.” 32Kho Aguripa naboolela Fesito ari, “Omundu uno alaba mbu shiyareeba okhuyilwa imbeli womuruchi wa Roma ta, yakhalekhuulilwe.”

Currently Selected:

EBIKHOLE BIA ABARUME 26: OLUDC

Highlight

Copy