EBIKHOLE BIA ABARUME 20
20
Paulo atsia khandi Makedonia nende Akayia
1Ne olwa indiri eyo yali niyakhahwa, Paulo yalanga abasuubili boosi halala, nababoolela amakhuwa kokhubatinyilisia ne nabaseebula. Kho narulayo natsia Makedonia. 2Yabirira mutsingongo etsio natinyilisinjia abandu namakhuwa amanji mana niyoola Akayia, 3ne namenyayo emiesi chitaru. Olwa yali niyerechekhanga okhutsia Siria, yamanyilisia mbu, Abayahudi bali nibamukonesheele, kho nakalushila Makedonia. 4Sopatero omwana wa Piro, owali Omubereya yatsia ninaye halala nende Arisitariko, Sekundo abali Abatsesalonika, nende Gayo okhurula Deribe, Tukiko nende Turofimo okhurula mulukongo lwa Asia, nende Timotseyo. 5Abenabo bakhuranjilila okhutsia mana nibakhuliindila Tiroasi. 6Nefu khwaniina mumeeli okhurula Efilipi olunyuma lwelisabo eliomukaate okubulamwo limela; mana olunyuma lwetsinyanga tsirano khwaboolakhwo Tiroasi, ewa khwekhala khulwalichuma elala.
Oluchendo lwa Paulo olwokhumalilikha Tiroasi
7Mana khungoloobe bwa Jumamosi khwakhung'ana khulwa eshiokhulia shiobusanjilani. Paulo yayaalila abandu ne natsiililila okhuboola ninabo eshise eshiraambi okhuula mushilo hakari, shichila yali niyerechekhanga okhusumukha okhutsia inyanga yalondakhwo. 8Tsitaha tsinyinji tsiali nitsiakhanga mushisika eshieikulu ewa khwali nikhukhung'anile. 9Omuraka undi owalangwa mbu Eutiko yali niyekhalile hetirisha, ne shinga Paulo yatsiililila okhuboola, Eutiko oyo yachaaka okhurenjetsa, ne tsindoolo nitsimuyila mana nakwa hasi okhurula mukorofa eyakhataru. Ne olwa batsia okhumubukula yali namalile khale okhufwa. 10Nebutswa Paulo yekha hasi namukwakhwo namufumbelela. Mana naboola ari, “Mulahende omwoyo tawe, ashili omulamu!” 11Kho Paulo nakalukha mukorofa ikulu, nasonyola omukaate nalia. Olunyuma olwokhuboola ninabo oluhoono okhuula olweliuba liafinda, yamala niyenyokha. 12Mana nibabukula omuraaka oyo nibamuyila ingo nali omulamu, nabo nibaleemibwa emioyo muno.
Paulo arula Tiroasi natsia Mileto
13Ifwe khwaniina mumeeli nikhuranjilila okhutsia Asosi, ewa khwali nikhutsitsanga okhubukula Paulo. Yali nakhubooleele mbu khukhole khurio shichila yali natsitsangayo khubilenje. 14Ne olwa yakhunyoola Asosi, khwamuninia mumeeli yakhwalimwo nikhutsia okhuula Mitilene. 15Khwarulaho mumeeli nikhutsiililila ne inyanga yalondakhwo nikhuula Kiosi. Ne nikhumala inyanga ndala mana nikhuula Samosi, ne inyanga yalondakhwo nikhula Mileto. 16Paulo yali nalutsi mbu atsililile noluchendo mumeeli okhubira Efeso, kho mbu aleshe okhumala ebise ebinji mu Asia. Okhuba yali natetekhananga mbu nikaba nikanyalikha yoole Yerusalemu khunyanga ya Pendekote.
Paulo aseebulana nabakofu ba Efeso
17Paulo nali Mileto yarumana amakhuwa Efeso mbu, abukaane nende abakofu beikanisa eyo. 18Ne olwa abakofu abo betsa yababoolela ari, “Inywe mumanyile shinga ndekhoonyela ebise bianje biosi olwa ndali ninenywe okhurula khunyanga eyambeli olwa ndola mulukongo lwa Asia. 19Ndakhola emilimo chianje shinga omukhalabani owa Omwami, ndalila amasika amanji mubise ebitinyu olwa Abayahudi bayima okhunzira. 20Mumanyile mbu shindalekhakhwo okhumuboolela eshindu shiosi eshiakhaba eshiobukhoonyi khwinywe olwa ndamuyaalila khandi nimwechesia imbeli wabandu nende mutsingo tsienywe tawe. 21Ndabachetsiyia boosi, Abayahudi nende Abamahanga mbu, bekalukhasie okhurula mubwonooni bakalushile Nyasaye mana basuubile mu Omwami wefwe Yesu. 22Ne nenondanga aka Roho Omutakatifu, enzitsanga Yerusalemu, ne shimanyile akatsia okhunzikholekhakhwo tawe. 23Akemanyile kali mbu, Roho Omutakatifu yamanyie mbu, mubuli litookho okhubohwa nende amanyakhano binindililemwo. 24#2 Tim. 4:7Nebutswa shindolanga obulamu bwanje isie omwene okhuba eshindu tawe. Kho enyalilwe okhumala nende okhuhesia omulimo okwa Omwami Yesu yambelesia okhukhola, okuli okhuyaala Injiili yobukoosia bwa Nyasaye.
25“Ndabotokhane mwinywe mwesi, niyaalanga aka Obwami bwa Nyasaye. Ne bulano emanyile mbu, shialiho kata mulala khwinywe oulindolakhwo khandi tawe. 26Kho bulano emuboolela habulafu inyanga yino mbu, omundu yesi khwinywe niyakhatiba shindalabalwakhwo oweshikha khuye tawe. 27Okhuba shindalobakhwo okhumuboolela inywe lichoomo lia Nyasaye tawe. 28Kho mwilinde abeene nende eshiayo shiosi eshia Roho Omutakatifu yamuhelesia okhulinda. Mube Abaayi abeikanisa ya Nyasaye, yomwene yakhola okhuba eyiyie okhubirira mukhufwa okhwa omwanawe. 29Emanyile mbu, nimalile okhurula hano, ebisutse ebihalaba biletsa mwinywe, ne shibalalekha okhusaalisia ebiayo ta. 30Eshise nashiule eshia balala khubomukanda kwenywe nibaboole obubeeyi okhushiukhasia abasuubili mbu babaloondekhwo. 31Mube meeso, nimwitsulila mbu, khulwemiyika chitaru ndechesia buli mulala khwinywe nindila amasika amanji eshilo neshiteere.
32“Ne bulano emulekha mubulindi bwa Nyasaye nende muburume bwobukoosiabwe, obunyala okhumumbakha nende okhuhelesia tsikhabi etsia yabishila abandube boosi. 33Shindayekombakhwo ifetsa noho itsahabu kata eshifwalo shiomundu yesi yesi tawe. 34Inywe abeene mumanyile mbu, ndakholanga emilimo namakhono kanje khulwa okhunyoola buli shindu eshia isie nende abetsa banje khwatakha. 35Emalile okhumumanyia mubuli eshindu mbu, khulwa okhukhalabana namaani munjila yino, okhuula khukhoonye abateshele, nimwitsulilanga amakhuwa aka Omwami Yesu omwene yaboola ari, ‘Okhuhaana khuli neikhabi okhushila okhuhebwa.’ ”
36Olwa Paulo yamala okhuboola ario, yasikama hasi ninabo boosi, ne nibasaaya. 37Ne boosi balila amasika olwa bamufumbeleela nibamutsunzuuna, ne nibamuseebula. 38Babeleela muno shichila yali nababooleele mbu, shinabamulolakhwo khandi tawe. Kho nibatsia ninaye ewa emeeli yali.
Currently Selected:
EBIKHOLE BIA ABARUME 20: OLUDC
Highlight
Share
Copy
Want to have your highlights saved across all your devices? Sign up or sign in
