EBIKHOLE BIA ABARUME 21
21
Paulo atsia Yerusalemu
1Khwaseebula abasuubili ne nikhutsia. Khwanina mumeeli nikhutsia shilunji nikhwambukha okhuula Koosi. Inyanga yalondakhwo nikhuula Rodesi, ne olwa khwarulayo khwatsiililila okhuula Patara. 2Ebweneyo khwanyoolayo imeeli eyali niyitsitsanga Foinike, ne nikhuniinamwo nikhutsia. 3Khwola habundu aha khwanyalilwa okhulola Kupuro, mana nikhubirila emwalo weshikhalachinga eshio, nikhuula Siria. Nikhula khuluchinga Tiro, aha imeeli yali niyitsitsanga okhurula emisiko chiayo. 4Ebweneyo khwanyoolayo abasuubili mana nikhumenya ninabo oluhoono lwelichuma elala. Khulwa amaani ka Roho Mutakatifu, bakania Paulo mbu, aleshe okhutsia Yerusalemu. 5Nebutswa olwa ebise biefwe ebiokhuba ninabo biali nibihwele, khwarula nikhutsia. Boosi halala nabakhasi babwe nende abaana babwe, betsa ninefwe elwanyi welitookho. Fwesi nikhusikama hasi khulukuku lweinyanza mana nikhusaaya. 6Mana nikhuseebulana ninabo, nefu nikhuniina mumeeli nabo nibakalukha ingo wabwe.
7Nikhurula Tiro, khwatsiililila noluchendo lwefwe, nikhuula Tolemai, aha khwashiesania nabasuubili nikhuhongaho inyanga yosi. 8#Ebikh. 6:5; 8:5Inyanga yalondakhwo khwarulaho mana nikhula Kaisaria. Habwenaho khwamenya munzu ya Filipo omuyaali owa Injiili, owali mulala khubandu musafu abahulwa mu Yerusalemu okhuba abadikoni. 9Yali nabakhaana bane abali abashisila, abayaalanga likhuwa lia Nyasaye. 10#Ebikh. 11:28Khwali nikhwakhabaho khulwa tsinyanga tsindutu, lwomulakusi oulangwa mbu, Agabo yolaho okhurula Yudea. 11Yetsa aha khwali, nabukula omushipi kwa Paulo, niyeboha ebilenjebie nende amakhonoke, mana naboola ari, “Kano niko aka Roho Omutakatifu aboola, mbu, omwene mushipi kuno nabohwe munjila yino naba Abayahudi mu Yerusalemu, ne balamuhaana mumakhono aka Abamahanga.”
12Olwa khwahulila ako, ifwe nende abandi abaliho khwasaaya Paulo nikhumukaya mbu, aleshe okhutsia Yerusalemu. 13Nebutswa Paulo nakalusia naboola ari, “Eshichila nimulila nimura eshibeela mumwoyo kwanje nishiina? Ndirecheshe okhutiilwa Yerusalemu, nende kata okhufwa khulwa Omwami Yesu.”
14Shikhwali abanyala okhushiukhasia amapaaroke ta, kho nikhumulekha mana nikhumusaayila mbu “Akokhwenya okhwa Omwami kekholeshe.”
15Olunyuma lwokhumenyayo tsinyanga tsindiiti, khwabukula ebindu biefwe nikhwirechekha, ne nikhutsia Yerusalemu. 16Balala khubeechi okhurula Kaisaria boosi batsia ninefwe, mana nibakhuyila munzu yomundu owa khwali nikhutsia okhumenya ninaye owalangwa mbu, Munasoni okhurula Kupuro, owali omusuubili okhurula khale.
Paulo acheniha Yakobo
17Ne olwa khwola Yerusalemu, abasuubili bakhwinjisia nobusaangaafu obunji. 18Inyanga yalondakhwo, Paulo yatsia ninefwe okhulola Yakobo, abakofu boosi abelikanisa baliho. 19Paulo yabashiesia, ne nabenoosia amakhuwa koosi aka Nyasaye yali niyakholile mubamahanga okhubirira mubukhalabanibwe. 20Ne olwa bahulila amakhuwa ako koosi, betsoomia Nyasaye mana nibaboola bari, “Paulo mwana wefwe, lolakhwo ebikhumila ebia Abayahudi bamalile okhuba abasuubili, khandi shinga olwa bamala okhwihaana khumalako ka Musa. 21Bamalile okhuboolelwa mbu, iwe wechesiyenje Abayahudi boosi abamenyile mubialo ebia abamahanga, mbu, baleshe amalako aka Musa, khandi nobaboolela mbu, balasheba abaana babwe noho kata okhulonda khumiima echia Abayahudi tawe. 22Betsa okhuhulila mbu, witsile oli hano. Kho khukhole shiina? 23#Obub. 6:13-21Khulweshio, okhole shinga olwa khukhuboolela. Baliho hano abasaatsa bane abaliile eshitsubo. 24Tsia ninabo mana obe ninabo mumulukha kwokhwisiiya, ne obarunjile ebia barumishila; kho mbu babeche liswi eliokhumirwe chiabwe. Munjila yino buli mundu alamanya mbu obwatoto bubula mumakhuwa koosi akababoolelwe khwiwe, habula mbu, iwe mwene omenyanga okhulondokhana namalako ka Musa. 25#Ebikh. 15:29Nebutswa khulwa Abamahanga abamalile okhukwa abasuubili abo, khwabarumila ibarwa nikhubakaninjia mbu balaliakhwo eshiokhulia shiosi eshihaanilwe shinga omusango khubifwanani, noho amalasile kosi kosi, noho eshiayo shiosi eshimichilwe ta, khandi mbu, beliinde abeene baleshe okhwiyinjisia mushifwabwi eshiobuheyi.”
26Kho Paulo nabukula abasaatsa abo, mana inyanga yalondakhwo nakhola omulukha kwokhwisiiya okwo halala ninabo. Mana natsia muhekalu nababoolela tsinyanga etsia natsibire kho okhwisiiya okhwo khuhwe, lwomusango kuhaanwa khubuli shiamulala khubo.
Paulo atililwa muhekalu
27Ne olwa tsinyanga musafu etsio tsiali nitsili ahambi okhuhwa, Abayahudi bandi okhurula mulukongo lwa Asia balola Paulo muhekalu. Nibatsuuba omukanda kwosi mana nibakwa khu Paulo. 28Nibayiiba nibaboola bari, “Abandu aba Isiraeli! Khukhoonye! Uno niye omundu oubotokhananga buli habundu niyechesia buli shiamundu amakhuwa kokhuyinga abandu ba Isiraeli nende okhufukula amalako ka Musa nende Ihekalu. Ne bulano arerile kata Abamahanga bandi muhekalu khulwa okhufwabia habundu hatakatifu!” 29#Ebikh. 20:4(Baboola kano shichila bali nibaluutsi Turofimo okhurula Efeso nali nende Paulo mwitookho, kho nibapaara mbu, Paulo amuyilile muhekalu.)
30Litookho liosi nilitsulamwo obuyoka, mana abandu boosi nibelukha tsimbilo nibakhung'ana halala, nibatiila Paulo nibamukhwesa nibamurusia muhekalu. Ne lwangu emiliango echia Ihekalu nichikalwa. 31Abomukanda bali nibenyanga okhwiira Paulo, ne lwangu amakhuwa nikolela omusinjilili wabelihe beshiroma mbu, litookho lia Yerusalemu liosi likholanga indiri. 32Mana mubwangu obwo, omusinjilili oyo nabukula abakhongo bandi nende abelihe nibatsia lwangu ewomukanda kwali. Ne olwa abandu bamulola nali nabelihe, nibalekha okhupa Paulo. 33Omusinjilili oyo natsia aha Paulo yali, namutiila, mana nalaka mbu, abohwe neminyololo chibili. Mana nareeba ari, “Omundu uno niwiina, ne akholile shiina?” 34Abandi abomukanda nibaboola akahukhane. Obuyoka bwali obunji, kho kata omusinjilili oyo nalanyala okhumanya akali nikekholeshe tawe. Kho nalachilisia abandube okhuyila Paulo munzu yobulindi eya abelihe. 35Ne olwa boola khumaaninilo kokhwinjilamwo nibali ninaye, kahachia abelihe abo okhumuchinga shichila omukanda okwo kwali shinga okulalushe. 36Okhuba boosi bali nibamulondangakhwo nibayula nibaboola bari, “Yeerwe!”
Paulo yetetsa omwene
37Ne olwa abelihe bali nibali ahambi okhwinjisia Paulo mukambi yabwe, yaboolela omusinjilili oyo ari, “Wakhachama ndakhuboolelakhwo likhuwa?”
Omusinjilili oyo namureeba ari, “Iwe wamanya okhulomaloma olugiriki? 38Shioli niwe omumisiri oyo owakaasiye induli ahambi hano niwimilila abandu abeeri ebikhumila bine (4,000) abali nebimanulwa okhutsia mushitsiimi ta?”
39Kho Paulo nakalusia ari, “Isie endi omuyahudi, owebulilwa Tariso, litookho lili Kilikia. Endi omwibule womwitookho lioluyali. Nimuchama leshe emboolekhwo nabandu bano.”
40Mana omusinjilili oyo namufuchilila okhuboola. Kho Paulo nasinjila khumaaninilo, naye omukhongo oyo nabasimila omukhono nabaholeelesia. Ne olwa baholela, Paulo yaboola ninabo muluheburania ari,
Currently Selected:
EBIKHOLE BIA ABARUME 21: OLUDC
Highlight
Share
Copy
Want to have your highlights saved across all your devices? Sign up or sign in
