EBIKHOLE BIA ABARUME 19

Paulo ayaala mu Efeso

1Ne olwa Apolo yali nali Korinzo, Paulo yabirila hakari kari wetsingongo etsio, mana niyoola Efeso. Ebweneyo yanyoolayo abeechi bandi, 2mana nabareeba ari, “Mwanyoola Roho Omutakatifu olwa mwekhola okhuba abasuubili noho?” Nabo nibamukalusia bari, “Tawe, khushili kata okhuhulilakhwo mbu, Roho Omutakatifu aliho tawe.”

3Paulo nabareeba ari, “Kho mwabatiisibwa obubatiisibwi bulena?”

Nabo nibakalusia bari, “Khwabatiisibwa obubatiisi bwa Yohana.”

4 # Mat. 3:11; Mrk. 1:4,7,8; Luka 3:4,16; Yoh. 1:26,27 Kho Paulo naboola ari, “Obubatiisi bwa Yohana, bwali obwa abo abekalukhasia okhurula mubwonooni bwabwe, ne yaboolela abandu ba Isiraeli mbu, basuubile mu oyo owali niyetsanga inyumawe, ne niye Yesu.”

5Ne olwa bahulila bario babatiisibwa muliira elia Omwami Yesu. 6Ne olwa Paulo yali nabarerekhwo amakhonoke, Roho Omutakatifu yekha mubo, mana nibaboola mutsinimi tsindi khandi nibarumbula likhuwa lia Nyasaye. 7Boosi bali ahambi abandu ekhumi nababili.

8Mana Paulo natsia musinagogi, ne khulwemiesi chitaru yayaala neyitswoni, naboola ninabo nateemanga okhubasaaya mbu, bafuchilile amakhuwa akobwami bwa Nyasaye. 9Nebutswa balala khubo bali abatinyu bokhuhulila nibalasuubila tawe, nibachaaka okhuboola amakhuwa amabi khu Injiili eya Omwami imbeli wabomukanda boosi. Mana Paulo narula mubo nabukula abasuubili natsia ninabo. Mana buli inyanga yekanga ninabo munzu yokhukhung'anilamwo eya Tirano. 10Katsiililila kario khulwemiyika chibili, nikachila abandu boosi abamenyanga mulukongo lwa Asia, bosi Abayahudi nende Abamahanga, nibahulila likhuwa lia Nyasaye.

Abaana ba Sikewa bateema okhurusia ebishieno

11Nyasaye yakholanga akamakana okhubirira mu Paulo. 12Kho mbu, kata ebitambayabie biomumakhono nende tsingubotsie tsindi etsia yali niyekhoonyela biabukulungwa nibiyililwa abalwale, mana bahona khandi ebishieno birula mubo. 13Abayahudi bandi abachendanga nibarusia ebishieno boosi bateemakhwo okhurusia ebishieno nibekhoonyelanga eliira lia Omwami Yesu. Kho nibaboolela bari, “Ekhulaka muliira lia Yesu, owa Paulo ayaalanga.” 14Abasiani musafu abomunzu ndala abali abaana bomuyahudi owali Omwisaaliisi Omukhulundu owalangwa mbu, Sikewa, nibo abakholanga amakhuwa ako. 15Nebutswa eshishieno nishibakalusia shiri, “Isie emanyile Yesu, khandi emanyile Paulo; ne nenywe ninywe babo wiina?”

16Omundu tsana owali neshishieno oyo, yabarumilakhwo obutinyu nabashila boosi amaani. Nibelukha nibarula munzumwe nibali netsinguma khandi tsingubo tsiabwe nitsirandushe. 17Olwa Abayahudi boosi nende Abamahanga, abali nibamenya mu Efeso bahulilakhwo amakhuwa ako, boosi batiilwa noburi, mana nibahelesia eliira lia Omwami Yesu oluyali muno. 18Abasuubili abanji betsa habulafu nibeyamanga nende okhubuula habulafu aka bali nibakhola. 19Abanji khubo, abali abafumu bareera ebitabu biabwe nibabisaamba habulafu imbeli wabandu boosi. Babasia obukusi bwebitabu ebio ne isabu yamapesa kabio niyiba tsidinari ebikhumila amakhumi karano (50,000). 20Munjila eyo, likhuwa elia Omwami liatsiililila okhulaanda nende okhuralila ne nilinyoola amaani muno.

Indiri eyekholekha mu Efeso

21Olunyuma lwamakhuwa ako, Paulo niyemililwe nende Roho yachaaka okhutsia Yerusalemu nabirira Makedonia nende Akayia; mana naboola ari, “Nimalile okhuulayo ndakhatsie okhulola Roma khandi.” 22Kho yamala arume Timotseyo nende Erasito abakhoonyelelibe babili, okhutsia Makedonia, naye nasikala mungongo tsia Asia khulwa tsinyangakhwo.

23Biali ebise ebio olwa indiri ikhongo yekholekha mu Efeso khulwa amechesio ka Kristo. 24Yaliho omwiranyi undi weifetsa oulangwa mbu, Demeterio. Yeranyanga ebifwanani biomuhekalu eyomunyasaye omukhasi oulangwa mbu, Aritemi. Emilimochie echio chiareereranga aberanyibe inganga inyinji. 25Mana Demeterio nabalanga boosi halala nende abandi, abakholanga emilimo shinga echio, nababoolela ari, “Inywe, mumanyile mbu, obuyinda bwefwe burulanga khumilimo chino. 26Ne bulano, muboolanga, khandi muhulilanga abeene akomundu mbu Paulo uno akholanga. Aboolanga mbu, abanyasaye aberanywa namakhono kabandu shibali abanyasaye tawe, ne yanyaliilwe okhukalukhasia abandu mu Efeso mwosi khandi nakalukhasia abandu bomungongo tsia Asia hambi tsiosi. 27Kho bulano khuli nobutinyu shichila obukhala bwefwe bulachaaywa. Ne shikali ako konyene ta, obutinyu bundi khandi buli mbu, Ihekalu yomunyasaye mukhasi omukhongo Aritemi shiyilahebwa oluyali khandi ta, mana obukhongo bwa Aritemi omunyasaye omukhasi owinamilungwa mu Asia mwosi kata nende mushialo shiosi bulonoonibwa!”

28Ne olwa abomukanda abo bahulila amakhuwa ako, batiilwa neliruma ne nibachaaka okhukhola oluyoka nibalanjilisia bari, “Aritemi wa Efeso niye omukhongo!” 29Indiri niyilanda mwitookho liosi. Mana abomukanda abo nibakwa khu Gayo nende Arisitariko, abali abamakedonia abachendanga nende Paulo, nibatsia ninabo tsimbilo nibabareera munzu yemikhung'ano. 30Paulo omwene yenya okhutsia okhwinjila mubandu abo, nebutswa abasuubili nibamukaania. 31Balala khubakhongo abomulukongo lwa Asia abali abetsa ba Paulo bamurumila oburume nibamukaya mbu alatsiakhwo munzu yemikhung'ano eyo yawe. 32Ebise ebio abandu boosi bakhupa oluyoka, abandi balanjilisia kano, ne abandi nabo nibalanjilisia akandi butswa, shichila abanji khubo shibaali nibamanyilisiye eshifune shichila nibekhung'asia halala tawe. 33Abandi khubandu abo bapaara mbu, Alekisanda niye ouchaachisiye indiri eyo, shichila Abayahudi bali nibamureebile okhutsia imbeli womukanda. Kho Alekisanda nabasima nomukhonokwe mbu baholeele, ne nateema okhwiterera. 34Nebutswa olwa bamanyilisia mbu, nomuyahudi, balanjilisia halala amakhuwa malala ako khulwa oluhoono lwetsisaa tsibili bari, “Aritemi wa Efeso niye omukhongo!”

35Olunyuma lwene omuhandichi omukhongo welitookho naholelesia omukanda okwo. Ne nababoolela ari, “Aba Efeso bashianje, buli shiamundu amanyile mbu, litookho lia Efeso nilio elili nende ihekalu eya Aritemi omukhongo, khandi nilio eliabikha lichina litakatifu eliakukha nilikwa hasi okhurula mwikulu. 36Abulaho ounyala okhufukula amakhuwa kano tawe. Kho bulano mukhoyile okhwituutuyia, muleshe okhukhola eshindu shiosi shiosi eshibi ta. 37Mureerire abandu bano hano, ne kata shibanuulile ebindu okhurula mutsihekalu noho okhuboola amakhuwa amabi khumunyasaye mukhasi wefwe ta. 38Khulweshio nikaba mbu Demeterio nende abakholibe, bali nende eshikha khumundu yesi, khuli nende abobunyali nende tsinyanga tsieshiina shikhasibungwa, ebweneyo niyo ewa amakhuwa kakhalachilungwa. 39Nebutswa nimuba nimuli nende akandi akashila ako, okhuula mukareere imbeli kaloosilibwe habulafu mumukhung'ano kwabebule abomwitookho lino. 40Okhuba olunyuma lwamakhuwa kekholeeshe nyangayino kano, obutinyu buliho buli mbu, khunyala okhwinjililwa mbu, khukholile indiri. Ne nikhuba nikhureebwa eshifune eshichila oluyoka luno nibubaho, khunyala okhubula eliakhuboola.” 41Olunyuma lwokhuboola ako yaseebula abomukhung'ano okwo.

Currently Selected:

EBIKHOLE BIA ABARUME 19: OLUDC

Highlight

Copy