EBIKHOLE BIA ABARUME 18

Paulo atsia Korinzo.

1Olunyuma lwako, Paulo yarula Atsene natsia Korinzo. 2Ebweneyo yabukana nende omuyahudi undi oulangwa mbu Akula, omwibule wa Ponto. Akula yali niyarulile Italia halala nomukhasiwe oulangwa mbu Pirisila. Barulayo shichila omuruchi Kilaudio wa Roma yali nalachilisiye mbu, Abayahudi boosi barule Roma. Paulo yatsia okhulola Abayahudi abo, 3mana namenya ninabo nakholanga emilimo chiokhukaasia amaheema, shichila nichio emilimo chiabakholanga. 4Buli khunyanga ya Isabato, Paulo yaboolanga nende Abayahudi nende Abagiriki musinagogi, nateema okhubakalukhasia mbu babe abasuubili.

5Ne olwa Sila nende Timotseyo boolayo nibarula Makedonia, Paulo yekhoonyela ebisebie biosi okhuyaala oburume, narumbulilanga Abayahudi mbu, Yesu niye Kristo. 6Ne olwa Abayahudi abo bamuyingasia nibamufukula khandi nibaboola amakhuwa amabi khuye, yarulaho nababungulula tsingubotsie, naboola ari, “Nimuba nimutiba, namakhuwa kenywe abeene. Okhuba isie embulakhwo eshikha shiosi shiosi tawe. Okhurula bulano ndalatsitsanga khubandu ba amahanga kandi.” 7Kho nabalekha natsia okhumenya munzu mwomundu omumahanga, owenamilanga Nyasaye, owalangwa mbu Tito Yusito. Inzuye yali ahambi nende Isinagogi. 8Khandi Kirisipo owali omwimilisi weisinagogi eyo, yesi yasuubila mu Omwami, halala nende abeinzuye boosi. Mana Abakorinzo abanji nibahulila oburume obwo, ne nibasuubila nibabatiisibwa.

9Inyanga yindi mushilo, Omwami yaboolela Paulo mwilolelo ari, “Shiolaria ta, habula tsiililila okhuyaala, ne shiolafwa omwoyo tawe, 10okhuba isie endi halala ninawe. Abulaho omundu kata mulala oulakhusaalisia ta, shichila abandu abali mwitookho muno abanji nabanje.” 11Kho Paulo namenyayo khuluhoono lwomuyika mulala nemiesi chisasaba niyechesinjia abandu likhuwa lia Nyasaye.

12Ne olwa Galio yemekhwa okhuba omukafuna wa Akaya, Abayahudi bekhung'asia halala, nibatiila Paulo, nibamuyila mushiina. 13Mana nibaboola bari, “Omundu uno, ateemanga okhukaatilisia abandu mbu benamile Nyasaye munjila yokhufukula amalako.”

14Ne olwa Paulo yali nali ahambi okhuboola, Galio yaboolela Abayahudi ari, “Recheresie inywe Abayahudi, amakhuwa kano nikakhabele mbu nakokhubumayanu noho amabi, kakhabele akahabwene isie okhumwisimilisilia inywe. 15Nebutswa olwa kali butswa amayingane khumakhuwa, ameera nende amalako kenywe, inywe abeene okhuula mukakaasie. Isie shindalaba omukhalachi wamakhuwa ako tawe!” 16Mana nabalonda boosi okhurula mushiinashie. 17Boosi nibatiila Sosetsene, owali omwimilisi owa Isinagogi, nibamunywekha imbeli weshiina. Nebutswa ako shikanyasiakhwo Galio kata nahatuutu tawe.

Paulo akalukha Antiokia

18 # Obub. 6:18 Paulo yamenya Korinzo nende abasuubili khulwa tsinyanga tsinyinji. Mana narulayo niyambukha halala nende Pirisila nende Akula nibatsia Siria. Nali Kengereya yabeka liswilie khulwa eshitsubo eshia yali niyetsubile. 19Boola Efeso, aha Paulo yalekha Pirisila nende Akula. Mana natsia musinagogi nayingana nende Abayahudi. 20Abayahudi abali abasuubili basaaya Paulo mbu amenyekhwoyo, nebutswa shiyafuchilila tawe. 21Nebutswa olwa yali nabalekhanga, yababoolela ari, “Nyasaye nachama enyala okhukalukha khandi.” Mana narula Efeso muliaro.

22Ne olwa yoola Kaisaria, yatsia Yerusalemu nashiesia abeikanisa eyo mana natsia Antiokia. 23Ne namalile okhwikhalayo khulwa tsinyanga, yarulayo natsia buli habundu nabirila mungongo tsia Galatia nende Firigia, natinyilisinjia abasuubili boosi.

Apolo ayaala Efeso nende Korinzo

24Omuyahudi undi oulangwa mbu Apolo, omwibule wa Alekisanderia, yetsa Efeso. Yali omundu owali neshihaanwa shiokhulomaloma khandi yali niyamanyilisia Amahandiko obulayi. 25Yali niyechesibwa munjila eya Omwami yamanyia, ne yayaalanga nobulumilifu niyechesia Amakhuwa ka Yesu habwene. Ne kata kario yali niyamanya butswa obubatiisi bwa Yohana bwonyene. 26Mana nachaaka okhuboola musinagogi neyitswoni. Ne olwa Pirisila nende Akula bamurecheresia, bamuyila ingo wabwe mana nibamwinoosia injila ya Nyasaye habwene. 27Mana Apolo nachooma okhutsia Akayia, kho abasuubili abali Efeso nibamukhoonyelela khulwa okhuhandichila abasuubili ba Akayia nibabatsuubanga okhumwinjisia. Ne olwa yoolayo yamala abe owobukhoonyi muno khu abali nibekalukhasiiye nibekholile abasuubili khulwa obukoosia bwa Nyasaye. 28Ne shichila yatsiililila okhuyingana obutinyu, yahula Abayahudi boosi khulwa okhubamanyia habulafu okhurula mu Amahandiko mbu, Yesu niye Kristo.

Currently Selected:

EBIKHOLE BIA ABARUME 18: OLUDC

Highlight

Copy