OBUBALI 22
22
Omuruchi Balaki owa Moabu aruma abandu okhulanga Balaamu
1Mana Abaisiraeli nibatsiililila noluchendo lwabwe, ne nibakhupa ikambi yabwe mumuhololokho kwa Moabu ebukwe womwalo kwa Yorodani nibahengane nende litookho lia Yeriko. 2Mana olwa Balaki omusiani wa Zipori yahulila akabandu ba Isiraeli bali nibakholile khu Abamori, 3ye nende Abamori batiilwa noburi obunji, khandi nibafwa omwoyo khulwa Abaisiraeli. 4Kho Abamoabu nibaboolela abakhulundu ba Abamidiani bari, “Omukanda kuno kulakhusasia nikukhumala shinga olwa ihunwa yayanga niyimala obunyasi mushikuri.” Kho Balaki owali nali omuruchi wa Moabu mutsinyanga etsio, 5#Obub. 31:8; 2 Pet. 2:15,16; Yuda 1:11naruma oburume khu Balaamu omusiani wa Beori owali nali Petsori elili ahambi khumwalo kwa Yufurate mushialo shiabandu ba Amawi. Namuboolela ari, “Lola oluyia lwabandu lwarula Misiri, ne lumalile eshialo shiosi, khandi lwenyanga okhubukula eshialo shianje. 6Kho ekhusaaya witse olaame abandu bano eshilaamo shiobubi shichila bashilile ehale namaani, kho haundi khwakhanyala okhubahula, ne nikhubalonda okhurula mushialo shiefwe, shichila emanyile mbu, abo abolamila ikhabi bahebungwa ikhabi, ne abo abalamila eshilaamo shiobubi, banyolanga eshilaamo shiobubi eshio.” 7Kho abakhulundu beshialo shia Moabu nende eshia Midiani nibasumukha nibali nende omurungo kwobulakusi mumakhono kabwe; nabo nibetsa khu Balaamu, ne nibamuboolela aka Balaki yali nabarumile. 8Naye nabakalusia naboola ari, “Mwiyalisie hano eshilo shino, ne mukamba nditsa okhumuboolela aka OMWAMI Nyasaye yamboolela.” Kho abakhulundu ba Moabu nibekhala nende Balaamu.
9Mana Nyasaye niyetsa khu Balaamu namureeba ari, “Nibandu shiina aba oli ninabo bano?”
10Naye Balaamu nakalusia Nyasaye ari, “Balaki omusiani wa Zipori, omuruchi wa Moabu abarumile mbu bamboolele mbu, 11oluyia lwabandu lwarula Misiri, lwamamila eshialoshie shiosi. Kho yenyanga mbu enaamile abandu bano eshilaamo shiobubi, kho mbu abalwane nende okhubaloonda.”
12Nyasaye naboolela Balaamu ari, “Shiolatsia nabandu bano ta, khandi shiolalamila Abaisiraeli eshilaamo shiobubi ta, shichila ndamala okhubahelesia ikhabi.”
13Kho Balaamu nabuukha mumabwibwi naboolela abakhulundu ba Balaki ari, “Mukalushe butswa mushialo shienywe shichila OMWAMI Nyasaye akhayile okhufuchilila mbu enzie ninenywe.” 14Kho abakhulundu ba Moabu nibarula nibatsia khu Balaki nibamuboolela mbu Balaamu alobile okhwitsa ninabo.
15Manba Balaki khandi naruma abakhulundu bandi abanjikhwo khandi aboluyali okhushila abayaranjilila okhuruma. 16Mana nibetsa khu Balaamu nibamuboolela oburume okhurula khu Balaki bari, “Nochama eshindu shiosi shiosi shilakhwikalilakhwo okhunzitsila ta! 17Okhuba toto mwene ndalakhuhelesia eshihaanwa eshikhongo khandi ndalakhola eshindu shiosi eshia umboolela. Nochama yitsa unaamile abandu bano eshilaamo shiobubi.”
18Nebutswa Balaamu yakalusia nababoolela ari, “Kata Balaki naba niyambelesia ifetsa nende itsahabu eyili munzuye yoosi, shinyala okhulekha okhulonda lilako elia OMWAMI Nyasaye wanje tawe. 19Habula inywe emusaaya mbu mwiyalisie hano eshilo shino kho mbu, emanyilisie likhuwa lindi elia OMWAMI Nyasaye yamboolela.” 20Mana Nyasaye niyetsa khu Balaamu eshilo namuboolela ari, “Nikali mbu abasaatsa abo betsile okhukhulanga, buukha otsie ninabo, nebutswa okhole butswa akekhulachilisia.” 21Kho olwa bwashia Balaamu nabukha narechekha isishiliye, ne natsia nende abemilisi aba Moabu abo.
Balaamu abukaana nende omumalaika
22Nebutswa Nyasaye yasinyikha shichila mbu Balaamu atsiile, kho olwa Balaamu yali nali khuisishiliye natsitsanga nali nabasumbabe babili, ne omumalaika owa OMWAMI Nyasaye nasinjila khunjila khulwa okhumwikalila. 23Mana olwa isishili eyo yalola omumalaika owa OMWAMI Nyasaye nasinjiile munjila natilile olukangalwe mumakhonoke, yashiukhana niyirula khunjila niyitsia mubulimo. Mana Balaamu nakhupa isishili eyo nachikalusia khunjila. 24Mana omumalaika owa OMWAMI Nyasaye nasinjila khunjila yinyeleele eyili hakari womukunda kwemitsabibu, ne lisiisi nilili tsimbeka tsiosi. 25Ne olwa isishili eyo yalola omumalaika owa OMWAMI Nyasaye, yehachilisia okhubirila khwisiisi elo, ne niyikhurula eshilenje shia Balaamu khwisisi elo, khandi Balaamu nachikhupa. 26Mana omumalaika owa OMWAMI Nyasaye khandi natsia hambeliwe nasinjila habundu hanyeleele aheinjila yibula eyokhukotokha khumukhono musaatsa kata khumukhono mukhasi. 27Ne olwa isishili yalola omumalaika owa OMWAMI Nyasaye yakona hasi. Mana Balaamu natiilwa noburuma nachaaka okhupa isishili eyo neindabushiye. 28Mana OMWAMI Nyasaye niyekula omunwa kweisishili, nayo niyireeba Balaamu yiri, “Nishiina eshiekhukholele, eshichila niukhupa okhuula khataru” 29Naye Balaamu nachikalusia ari, “Shichila ukholile okhuba omuyingwa, embakhwo butswa nolukanga mumukhono kwanje, khane ndakhakhwira.” 30Nayo isishili niyireeba Balaamu yiri, “Shiendi isishiliyo eya wakhachendelakhwo obulamubwo bwosi okhuula khunyanga yino? Ne liina olwa ndakhukholelakhwo endio?”
Naye Balaamu nachikalusia ari, “Oshili tawe.”
31Mana OMWAMI Nyasaye nakhola Balaamu okhulola omumalaika owa OMWAMI Nyasaye nasinjiile khunjila, natilile olukangalwe mumakhono, mana Balaamu nakwa hasi niyenamia omurwekwe hasi. 32Mana omumalaika owa OMWAMI Nyasaye oyo namuboolela ari, “Shichila shiina nokhupa isishiliyo okhuula khataru? Lola nditsile imbeliwo okhukhwikalila shichila oluchendolwo shilungaasile tawe. 33Ne isishiliyo yino yindutsi, ne niyishiukhana okhuula khataru. Ne yiba niyalashiukhane okhurula khwisie ta, ndakhakhwirire iwe khushise eshio, nayo nechilekha okhuba omulamu.”
34Mana Balaamu naboolela omumalaika owa OMWAMI Nyasaye oyo ari, “Ndonoonile, shichila shiemanyilenje mbu, osinjiile munjila niwunzikalila ta. Khulweshio, bulano nikaba mbu shikakhuchamisiiye isie okhutsiilila noluchendo luno ta, ndalakalukha ingo.”
35Nebutswa omumalaika owa OMWAMI Nyasaye naboolela Balaamu ari, “Otsie nabandu bano, nebutswa oboole butswa akakhulachilisia okhuboola.” Kho Balaamu natsiililila okhutsia nende abemilisi ba Balaki abo.
Balaki yenjisia Balaamu
36Olwa Balaki yahulila mbu, Balaamu yetsile, yarula natsia okhumwakanila ahambi khwitookho lia Ari, elili ahambi nomwalo kwa Arinoni khulwakho lwa Abamoabu. 37Naye Balaki nareeba Balaamu ari, “Mbushiina noletsa olwa ndakhurumile abandu okhukhulanga olwambeli?” Wapaara mbu, shienyala okhukhuhelesia eshihaanwa shioluyali ta, noho?
38Balaamu nakalusia Balaki ari, “Nditsile! Ne kata kario endi nobunyali shiina bwokhuboola likhuwa liosi liosi? Habula likhuwa elia Nyasaye yamboolela, nilio elia emboola.” 39Kho Balaamu natsia nende Balaki, niboola khwitookho lia Kiriatsi Huzotsi. 40Naye Balaki niyeera tsing'ombe nende amakondi khulwa okhukhola omusango, nahelesia Balaamu nende abemilisi ba yali ninabo inyama eyo.
41Olwa bwashia, Balaki yabukula Balaamu namutikulusia Bamotsi Baali, ewa Balaamu yanyalilwa okhulolakhwo abandu ba Isiraeli batiti.
Obulakusi bwambeli bwa Balaamu
Currently Selected:
OBUBALI 22: OLUPR
Highlight
Copy
Compare
Share
Want to have your highlights saved across all your devices? Sign up or sign in
