OBUBALI 23
23
1Ne Balaamu naboolela Balaki ari, “Unyumbashile hano ebimalilo biemisango musafu, mana umbelesie hano tsisurusi musafu nende amamiiku musafu.” 2Ne Balaki nakhola shinga olwa yaboolelwa, mana Balaki nende Balaamu nibakholela omusango kweisurusi nende limiiku khubuli shimalilo shiemisango. 3Ne Balaamu naboolela Balaki ari, “Sinjila hemisangochio emisambe chili hano, nasi enzie endole nikali OMWAMI Nyasaye aleetsa okhunzakanila noho tawe, ne liosi liosi eliayamanyia ndalakhuboolela.” Ne natsia habutenje bweshikulu. 4Ne Nyasaye niyakana nende Balaamu, kho Balaamu naboolela Nyasaye ari, “Engasiye ebimalilo biemisango musafu, ne ekholile omusango kweihunwa nende limiiku khubuli shimalilo shiemisango.”
5Mana OMWAMI Nyasaye naboolela Balaamu akatsia okhuboolela Balaki. 6Kho nakalukha, ne nanyoola Balaki nende abemilisibe nibashisinjiile ahomusangokwe omusambe kwali.
7Mana Balaamu narumbula obulakusibwe naboola ari,
“Balaki omuruchi wa Abamoabu yarusiye Siria,
okhurula mubikulu biebukwe
niyamboolela ari, ‘Witse wunaamile Abaisiraeli eshilaamo shiobubi,
khandi obafukule.’
8Nasi ndakhalaamila endie abandu eshilaamo shiobubi,
aba Nyasaye ashili okhulaamilakhwo ario?
Ndakhekana endie abandu aba OMWAMI Nyasaye ashili okhwikaana?
9Okhuba nendi khubutenje bweshikulu ebalolanga,
okhurula khubikulu ebahenganga.
Noluyia lwabandu abamenya bonyene,
Bamanyile mbu bamala okhulamilwa tsikhabi okhushila amahanga kandi.
10Abolwibulo lwa Isiraeli bali shinga olufu,
nabanji abalanyala okhubalwa tawe.
Lekha efwe lifwa liabalunjishi,
nabwo obumalilishi bwanje bukhoya bube shinga obwabwe.”
11Mana Balaki nareeba Balaamu ari, “Nishiina eshiawukholele shino? Ekhureerile olaamile abasuku banje eshilaamo shiobubi, nawe eshiokholile nokhubalaamila ikhabi!” 12Balaamu namukalusia ari, “Enyala okhuboola butswa aka OMWAMI Nyasaye yamboolela okhuboola.”
Obulakusi bwakhabili bwa Balaamu
13Mana Balaki naboolela Balaamu ari, “Yitsa khutsie habundu undi aha onyala okhulolakhwo butswa Abaisiraeli batiti abali ahambi, shiolabalola boosi ta, mana obalaamile eshilaamo shiobubi abwene yaho.” 14Ne namuyila mumukunda kwa Zofimu khubutenje bweshikulu shia Pisiga, ne nibombakhaho ebimalilo biemisango musafu, nende okhukholelaho omusango kweihunwa nende limiiku khubuli shimalilo shiemisango.
15Balaamu naboolela Balaki ari, “Sinjila ahamisangochio emisambe chili hano, nasi enzie ndakane nende OMWAMI Nyasaye hambeli yaho.”
16Mana OMWAMI Nyasaye niyakana nende Balaamu, ne namuboolela aka atsia okhuboolela Balaki, 17Kho Balaamu nakalukha, ne nanyoola Balaki nende abakhulundube nibashisinjiile hamusango omusambekwe kwali. Mana Balaki namureeba ari, “OMWAMI Nyasaye aboolile shiina?” 18Naye Balaamu narumbula obulakusibwe naboola ari,
“Yitsa Balaki omusiani wa Zipori,
orecheresie akenzia okhuboola.
19Nyasaye shiali shinga omundu owakhabeeya ta,
noho omundu namundu owakhakalukhana ta.
Liosi liasuubisia okhukhola alihesinjia,
ne liosi liaboola alikholanga.
20Lola endachilwe okhusaba ikhabi:
ne Nyasaye nahanile ikhabi shienyala okhuchikalukhasia tawe.
21Shiendutsikhwo amasila mu Isiraeli ta,
noho kata amanyakhano mubo tawe.
OMWAMI Nyasaye wabwe ali halala ninabo.
Ne barumbulanga ye okhuba omuruchi wabwe.
22Nyasaye yabarusia Misiri,
ne niye oubalwanilanga shinga imboko
23Bubulaho obufumu, noho obulosi obunyala okhufukula Abaisiraeli.
Bulano abandu bakhaboole khu Abaisiraeli bari,
‘Lola aka Nyasaye akholile!’
24Lihanga lia Isiraeli lili namaani shinga akeitalanyi,
eyilakonanga hasi niyishili okhulia eshioluyitsi lwayo ta,
khandi nende okhunywa amatsayi aka eshiayirire tawe.”
25Mana Balaki naboolela Balaamu ari, “Nolalaamila abandu ba Isiraeli eshilaamo shiobubi ta, kho kata olabasabile ikhabi tawe.” 26Nebutswa Balaamu yamukalusia ari, “Shiekhuboolele mbu, ndalakhola koosi aka OMWAMI Nyasaye yamboolela okhukhola?”
Obulakusi bwakhataru bwa Balaamu
27Mana Balaki naboolela Balaamu ari, “Bulano itsa khutsie ekhuyile habundu hundi, haundi kakhachamisia Nyasaye, kho akhunyalile unamile abandu bano eshilaamo shiobubi abwene yaho.” 28Kho Balaki nayila Balaamu khubutenje bweshikulu shia Peori obuhengane neshitsiimi. 29Ne Balaamu naboolela Balaki ari, “Nyumbashila hano ebimalilo biemisango musafu mana umbelesie hano tsisurusi musafu nende amamiiku musafu.” 30Naye Balaki nakhola shinga olwa yaboolelwa, ne nibakholela omusango kweihunwa nende limiiku khu buli eshimalilo shiemisango.
Currently Selected:
OBUBALI 23: OLUPR
Highlight
Copy
Compare
Share
Want to have your highlights saved across all your devices? Sign up or sign in
