OBUBALI 14
14
Abaisiraeli beyiniakanila Musa
1Mana abomukanda boosi nibakhupa oluhungu nibalila eshilo shiosi. 2Abandu nibeyiniakanila Musa nende Haroni, nibaboola bari “Bwakhabele obulayi nikhwakhafwilile Misiri noho kata mushitsiimi! 3Mbushiina OMWAMI Nyasaye akhuyilanga mushialo eshio okhwirirwayo mwihe? Abakhasi befwe nende abaana befwe balatiilwa. Nobulayi nikhwakhakalukha mushialo shia Misiri!” 4Mana nibaboolelana abeene khubeene bari, “Chende khwahule omwimilisi mana khukalushe Misiri!”
5Mana Musa nende Haroni nibasikama hasi nibenamia obweni bwabwe okhuula hasi imbeli wabandu boosi. 6Ne Yoshwa omusiani wa Nuni nende Kalebu omusiani wa Yefune abali babili khubarunilisi abatsia mushialo shia Kanani, nibarandula ebifwalo biabwe mushibeela, 7mana nibaboolela Abaisiraeli bari, “Eshialo shia khwarunilisia neshilayi muno. 8OMWAMI Nyasaye naba nachamisibwa ninefwe alakhuyilayo nakhuhelesia eshialo eshio eshili eshiyinda khandi eshia liloba linulu. 9#Abaheb. 3:16Habula muleshe okhukhaya OMWAMI Nyasaye, khandi mularie abandu bamenya mushialo eshio tawe. Khulabahula bwangu. OMWAMI Nyasaye akhulwanilanga khandi ahulile abanyasaye balindanga abandu abo; kho mularie tawe.” 10Abomukanda boosi beenya okhulasa Musa nende Haroni amachina bafwe. Nebutswa bwangu bwene abandu nibalola obulafu bwokhubaho okhwa OMWAMI Nyasaye nibulolekha khwiheema litakatifu.
Musa asaayila Abandu
11Mana OMWAMI Nyasaye nareeba Musa ari, “Abandu bano balatsiililila okhundoba okhuula liina? Balatsiililila okhuloba okhuusuubilila okhuula liina? Kata olwa nindabakholela ebikhole ebiamakana ebinji hakari wabwe! 12Enzia okhubareerera olumbe, nende okhubamulula boosi, nebutswa ndalakhukhola iwe okhuba samwana lihanga likhongo khandi eliamaani okhubashila.”
13 #
Okhur. 32:11-14
Nebutswa Musa naboolela OMWAMI Nyasaye ari, “Warusia abandu bano Misiri khulwa obunyalibwo. Olwa Abamisiri balahulilakhwo akokholile khubandubo, 14balaboolela abandu bamenyile mushialo shino. Abandu bano bamalile okhuhulila mbu, iwe OMWAMI Nyasaye okhwimililanga. Khandi mbu, ololekhanga obulayi bwene olwa lileesilio lisinjilanga hekulu wefwe, khandi okhwimililanga mwileesi elili shinga isiilo eshiteere nende isiilo yomulilo mushilo. 15Bulano noba niwira abandubo bano boosi, abamahanga abamala okhuhulilakhwo khu akoluyalilwo balaboola mbu, 16wiirire abandubo mushitsiimi shichila wakhayilwe okhuboosia mushialo eshia wabasuubisia okhubahelesia. 17Bulano iwe OMWAMI Nyasaye, ekhusaaya nochama lolesie obunyalibwo obukhongo khwifwe, mana okhole aka wakhusuubisia olwa woboola ori, 18#Okhur. 20:5,6; 34:6,7; Okhuk. 5:9,10; 7:9,10‘Isie OMWAMI Nyasaye shiesinyikhanga bwangu ta, khandi endi owobuheeli oburalilu, owobwisiikwa, embeelanga abandu obwonooni nende obukhayi bwabwe. Nebutswa shindalachweya okhuhaana eshinyasio khubaana benywe nabetsukhulu benywe okhuula khulwibulo lwakhataru nende lwakhane khulwa obwonooni bwabebusi babwe tawe.’ 19OMWAMI Nyasaye oli owetsimbabasi, khandi okholelanga abandu amakhuwa amalayi okhushila aka bakhoyile okhukholelwa. Chama obeele abandu bano tsimbabasi shinga olwa wababeelanga okhurula nibarula mushialo shia Misiri.”
20Mana OMWAMI Nyasaye naboola ari, “Ebalesheele obwonooni bwabwe shinga olwa usaayile, 21#Abaheb. 3:18nebutswa nditsuba mbu, shinga olwa eshiliho mwoyo, khandi obunyali bwanje bubushiliho khushialo, 22abulaho khubandu bano oulanyalilwa okhwinjila mushialo eshio. Balola okhumwesukha khwobulafu bwokhubaho khwanje nende ebikhole ebiamakana, ebia ndakhola mushialo shia Misiri nende mushitsiimi. Nebutswa bateemanga obwisimilisi bwanje akhandi akhanji nibakalushila khandi nibaloba okhumbulila. 23Shibakhenjilekhwo mushialo shia ndasuubisia abakuuka babwe tawe. Abulaho kata mulala khu abondobile abo, oulanyala okhwinjilamwo. 24#Yos. 14:9-12Nebutswa shichila mbu omukhalabani wanje Kalebu yahukhane ninabo mumapaaro khandi yambulilanga nomwoyokwe kwosi, ndalamuusia mushialo shia yarunilisia nabo abolwibulolwe balabukula eshialo eshio. 25Bulano khulwa okhubeela Abameleki nende Abakanani bamenya mumabanda kashio, mukamba mushiukhane mutsie mushitsiimi nimulonda injila eyitsia khunyanza inzakhanyu.”
OMWAMI ahelesia Abaisiraeli eshinyasio khulwa okhwiyiniakana
26Mana OMWAMI Nyasaye nareeba Musa nende Haroni ari, 27“Omukanda kwabandu abamayanu bano, baleyiniakana okhuula liina? Embuliile okhwiyiniakana khwabandu ba Isiraeli beyiniakaane khwisie. 28Baboolele amakhuwa kano ori, ‘Nditsuba mbu olwa endiho mwoyo, ndalamukholela butswa aka muusabile. Isie OMWAMI Nyasaye emalile okhuboola. 29#Abaheb. 3:17Mulafwa, ne emilambo chienywe chilasalaasibwa mushitsiimi shino. Shichila muyiniakane khwisie, abulaho kata mulala khwinywe okhuchaachila khu owemiyika amakhumi kabili oulenjila mushialo eshio tawe. 30Ndamusuubisia okhumuyila mumenyemwo nebutswa abulaho khwinywe oulamenyamwo, habula Kalebu nende Yoshwa bonyene. 31Mwaboolile mbu, abaana benywe abatiiti balatiilwa, nebutswa ndalabareera mushialo eshia mwaloba, nashio shilaba eshimenyo shiabwe 32Mulafwiila mushitsiimi shino. 33#Ebikh. 7:36Ne abaana benywe balitimatima mushitsiimi khulwemiyika amakhumi kane, nibanyakhananga khulwa okhubula obwisiikwa khwenywe khwisie, okhuula olwa mwesi mwakhabe nimumalile okhufwa. 34Mwakhanyakhane khulwa obwonooni bwenywe emiyika amakhumi kane, buli muyika khulwa inyanga ndala eya mwekhoonyelanga okhulambuula eshialo eshio. Mulamanyilisia eshisina eshia isie okhuba omubi khwinywe! 35Nditsuba mbu ndalamukholela kano inywe abandu abamayanu abekhung'asia okhufukula isie. Buli omundu alafwiila mushitsiimi shino. Isie OMWAMI Nyasaye nisie ouboolile.’ ” 36Abasaatsa aba Musa yaruma okhulambuula eshialo eshio, abareera amakhuwa akobubeeyi akachila abandu nibeyiniakana khu OMWAMI Nyasaye, 37nibeerwa nobulwale obwa OMWAMI Nyasaye yareera. 38Yoshwa omusiani wa Nuni nende Kalebu omusiani wa Yefune nibo abatong'aho abalamu, mubasaatsa abatsia okhulambuula eshialo eshio.
Abaisiraeli bateema okhuseera eshialo shia Kanani olwambeli
(Okhuk. 1:41-46)
39Mana Musa naboolela abandu ba Isiraeli amakhuwa ako, nabo nibalila obululu. 40Olwa bwashia mumabwibwi bachaaka okhutsia okhuseera eshialo shiebikulu shia Kanani nibaboola bari, “Bulano khwirecheeshe okhutsia habundu aha OMWAMI Nyasaye yakhusuubisia. Khwiyame obwonooni bwefwe.”
41Nebutswa Musa nabareeba ari, “Eshichilanga nimukhaya okhuhulila OMWAMI Nyasaye nishiina? Shimulanyalilwaakhwo tawe. 42Shimulatsie okhuseera abasuku benywe ta, shichila OMWAMI Nyasaye shiali ninenywe tawe. Abasuku benywe balamuhula. 43Olwa museera Abameleki nende Abakanani muleerwa. OMWAMI Nyasaye shialamukhoonya ta, shichila mwakhayile okhumuhulila.”
44Nebutswa Abaisiraeli bakhaya okhuhulila Musa nibatikulukha okhutsia mushikulu kata olwa bali nibaleshile Lisanduku lieindakano eya OMWAMI Nyasaye nende Musa mukambi. 45Mana Abameleki nende Abakanani abali nibamenya mubikulu ebio nibakholomokha hasi nibakhupa Abaisiraeli nibabahula khandi nibabalondachilila okhuula khwitookho lia Horima.
Currently Selected:
OBUBALI 14: OLUPR
Highlight
Copy
Compare
Share
Want to have your highlights saved across all your devices? Sign up or sign in
