OBUBALI 15
15
Amalako khumisango
1OMWAMI Nyasaye nahelesia Musa 2amalako kano khulwa abandu Abaisiraeli mbu bakatiile nibali mushialo eshia yali natsia okhubahelesia. Naboola ari, 3Ihunwa, limiiku, likondi noho imbusi binyala okhuhaanwa khwisie shinga omusango omusambe noho okwa okhuusia eshitsubo noho okwokhuchama butswa noho okwa amasabo ka buli lwosi akeidiini. Isakakha yemisango echio yinjamisinjia isie OMWAMI Nyasaye. 4Kho oureera eshihaanwashie eshio, okhuula khandi ahaane khwisie OMWAMI Nyasaye omusango kweimele ikilo ndala yobuusie obunyushe obutsokasibwemwo ilita ndala yamafura akemiseituni, 5nende idivai ilita ndala khulwa omusango kwokhunywa. Ebihaanwa ebio bileerwe halala nende buli omuruko kwomusango omusambe, okhuula kube likondi noho imbusi. 6Olwa limiiku lihaanwa okhuba omusango okhuula oulihaana alireere halala nende tsikilo tsibili tsiobusie obunyushe obutsokasiibwemwo ilita ndala neinusu yamafura akomuseituni shinga omusango okweimele, 7halala nende ikilo ndala neinusu ya idivai. Isakakha yemisango echio yinjamisinjia isie OMWAMI Nyasaye. 8Ne olwa ihunwa yihaanwa khwisie okhuba omusango omusambe noho khulwa omusango kwobusanjila niokhuusia eshitsubo noho khulwa omusango kwobusanjilani 9okhuula okuuhaana areere obusie obunyushe tsikilo tsitaru obutsokasiibwemwo tsilita tsibili etsiamafura kemitseituni, 10halala nende tsilita tsibili etsia idivai. Isakakha yomusango kuno yinjamisinjia Isie OMWAMI Nyasaye.
11Ebio nebindu bilahaanungwa nende buli ihunwa, noho limiiku, noho likondi noho imbusi. 12Obunji bwebihaanwa ebio bulalondana nobunji bwetsisolo etsio etsihaanilwe okhuba omusango. 13Buli omwibule wa Isiraeli okhuula akhole ako olwa aba nahaana omusango okweshiokhulia, okuli isakakha yinjamisia Isie OMWAMI Nyasaye, 14Ne inyanga yindi omurende yesi owamenya mwinywe khulwa ebise bitutu noho khulwa oluhono, naba nahaana omusango omusambe okwa isakakha yakwo yinjamisianjia isie OMWAMI Nyasaye, okhuula alonde amalako malala ako. 15Khulwa emiyika chiosi echitsanga amalako malala kano kalamwimililanga inywe nende abarende bamenyanga mwinywe. Inywe ninabo muli nashilala imbeli wanje isie OMWAMI Nyasaye. 16#Abal. 24:22Amalako ako nende amalachilisio kano kalaba khwinywe nende khubo.
17OMWAMI Nyasaye nahelesia Musa 18amalako kano khulwa Abaisiraeli okhuloonda nibamenyile mushialo eshia yali natsia okhubahelesia, naboola ari, 19“Olwa mulia eshiokhulia shirulile mumukunda, mwahule eshitonye mundeerere okhuba eshihaanwa eshiahule. 20Olwa mutekha emikaate, mwahule omukaate okuteshilwe khubusie bweimele yambeli mundeerere okhuba eshihaanwa eshiaule okhurula aha basielanga imele. 21Eshihaanwa eshiahule shino eshirula mumikaate chiamuteekha mushireerenje khwisie buli lwosi.
22“Ne omundu yesi niyetsukhana nafunaka amalako aka emulachilisiye okhubirira khu Musa, 23noho munyanga tsitsanga omukanda kwosi nikuba nikulaloonda buli lilako elia isie OMWAMI Nyasaye ehaanile, 24ne obwonooni obwo nibukholwa mukhukorwa noho abomukanda nibalamanyile ta, okhuula bahaane ihunwa yomusango omusambe nende omusango kweimele nende okweidivai. Isakakha yabio yinjamisinjia isie OMWAMI Nyasaye. Okhumeetakhwo, okhuula bahaane imbusi ikhole, khulwa omusango kwobwonooni. 25Ne omwisaaliisi okhuula atise abomukanda boosi kho balaleshelwa shichila betsukhane nibonoonile, ne bareera omusango kwabwe okwobwonooni khwisie. 26Mana omukanda kwosi okwa Abaisiraeli nende abarende abamenyanga mubo balaleshelwa shichila buli shiamundu yakhola obwonooni obwo.
27 #
Abal. 4:27-31
“Ne omundu mulala niyetsukhana niyonoona okhuula ahaane imbusi isubini yomuyika mulala khulwa omusango okwobwonooni. 28Omwisaaliisi akhole eshitiso imbeli ewa OMWAMI Nyasaye, khushimalilo shiemisango khulwa omundu owitsukhane niyonoona oyo, mana alaleshelwa. 29Lilako elala tsana elo nelia buli mundu owitsukhana niyonoona, abe omuisiraeli noho omurende oumenyanga mubo.
30“Nebutswa omundu yesi owonoona namanyile, abe omuisiraeli noho omurende, aba neshikha shiokhuufwola isie OMWAMI Nyasaye, ne okhuula yeerwe, 31shichila akhayile aka isie ndalachilisia, ne afunache elala khumalako kanje. Omundu oyo okhula yeerwa, ne eshitsayishie shili khuye omwene.”
Omundu owafunaka Lilako elia Isabato yeerwa
32Olwa abandu ba Isiraeli bali nibali mushitsiimi banyoola omundu undi narenyanga tsikhwi khunyanga ya Isabato. 33Abandu bamunyoola narenyanga abo nibamureera khu Musa nende Haroni nende abomukanda boosi. 34Nibamwikalila mundindi shichila shibamanyilisia obulayi aka banyala okhumukholela tawe. 35Mana OMWAMI Nyasaye naboolela Musa ari, “Omundu oyo okhuula yeerwe, abomukanda boosi bamulase namachina afwe elwanyi weikambi.” 36Mana abomukanda boosi nibamuyila elwanyi weikambi, nibamulasa namachina nafwa, shinga olwa OMWAMI Nyasaye yali nalachile Musa.
Amalako khu khubifwalo biamayeeye
37OMWAMI Nyasaye naboolela Musa ari; 38#Okhuk. 22:12“Boolela abandu ba Isiraeli mbu, banabe amayeeye khundulo khwebifwalo biabwe mana khubuli liyeeye barekhwo omukoye kwobukondo bwa bulu. Bakholenje bario emiyika chiosi. 39Buli olwa balola amayeeye ako baletsulilanga amalako kanje nende okhukakhola, kho shibalandekhakhwo nibakhola akokhwenya khwabwe abeene nende okhwikomba khwabwe abeene tawe. 40Amayeeye ako kalamwitsusinjia okhulonda amalako kanje koosi, mana balaba abandu banje inziayo. 41Isie nisie OMWAMI Nyasaye wenywe, owamurusia mushialo shia Misiri, okhuba Nyasaye wenywe. Nisie OMWAMI Nyasaye wenywe.”
Currently Selected:
OBUBALI 15: OLUPR
Highlight
Copy
Compare
Share
Want to have your highlights saved across all your devices? Sign up or sign in
