OBUBALI 1
1
Okhubalwa khwambeli okhwa Abaisiraeli
1 #
Obub. 26:1-51
Khunyanga yambeli eyomwesi kwakhabili mumuyika kwakhabili olunyuma olwa Abaisiraeli okhurula mushialo shia Misiri, OMWAMI Nyasaye yaboola nende Musa nali mwiheema litakatifu mushitsiimi shia Sinai ari, 2“Iwe nende Haroni mubale abandu ba Isiraeli mutsinzu tsiabwe nende mubilibwa biabwe, muhandiche ameera kabasaatsa boosi, 3abali nemiyika amakhumi kabili nende okhubisiaho, abanyala okhutsia mwihe. 4Muboolele omusaatsa mulala okhurula mubuli oluyia ouli omwimilisi okhumukhoonya. 5Ne kano niko ameera kabasaatsa abali abemilisi abetsa okhumukhoonya omulimo kuno; Okhurula muluyia lwa Rubeni, ni Elizeri omusiani wa Shedeuri. 6Muluyia lwa Simeoni, ni Shelumieli omusiani wa Zerishadayi. 7Muluyia lwa Yuda ni Nashoni omusiani wa Aminadabu, 8Muluyia lwa Isakari ni Netsanieli omusiani wa Zuhari. 9Muluyia lwa Zebuluni ni Eliabu omusiani wa Heloni. 10Muluyia lwa Efuraimu ni Elishama omusiani wa Amihudi, ne muluyia lwa Manase ni Gamalieli omusiani wa Pedahazuri. 11Muluyia lwa Benjamini ni Abidani omusiani wa Gideoni. 12Muluyia lwa Dani ni Abiezeri omusiani wa Amishadayi 13Muluyia lwa Asheri ni Pagieli omusiani wa Okurani. 14Muluyia lwa Gadi ni Elisafu omusiani wa Deuheli. 15Ne muluyia lwa Nafutali ni Ahira omusiani wa Enani.” 16Abo nibo abaahulwa okhurula mumukanda, abali abemilisi betsimbia nende tsikholo tsia Abaisiraeli.
17Musa nende Haroni babukula abasaatsa abali nibaahulwe abo, 18nikhung'asia halala abomukanda kwosi khunyanga yambeli yomwesi kwakhabili, ne nahandichisia abandu boosi okhuloondana nende oluyia nebilibwa biabwe. Ameera kabwe okhurula khubemiyika amakhumi kabili nende okhushilaho kabalwa nende okhuhandichisibwa, 19shinga olwa OMWAMI Nyasaye yali nalachilisiye Musa. Kho Musa nabala abandu mushitsiimi shia Sinai.
20Abandu abomuluyia lwa Rubeni owambeli muluyia lwa Isiraeli; abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhulondana nebilibwa biabwe netsinzu tsiabwe. 21Aboluyia lwa Rubeni boosi bali abandu ebikhumila amakhumi kane nabisasaba nende ebikhumi birano (46,500).
22Abandu abomuluyia lwa Simeoni abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe. 23Abandu boluyia lwa Simeoni bali abandu ebikhumila amakhumi karano nashienda nende ebikhumi bitaru. (59,300).
24Abandu aboluyia lwa Gadi abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe, 25Aboluyia lwa Gadi bali abandu ebikhumila amakhumi kane na birano nende ebikhumi bisasaba namakhumi karano. (45,650).
26Abandu aboluyia lwa Yuda abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe; 27Aboluyia lwa Yuda bali abandu ebikhumila amakhumi masafu na bine nende ebikhumi bisasaba. (74,600).
28Abandu boluyia lwa Isakari abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 29Aboluyia lwa Isakari bali abandu ebikhumila amakhumi karano na bine nende ebikhumi bine. (54,400).
30Abandu aboluyia lwa Zebuluni abasaatsa abali abemiyika amakhumi kabili nende okhubisiaho, bali nibanyala okhutsia mwihe babalwa okhuloondana nebilibwa biabwe netsinzu tsiabwe. 31Aboluyia lwa Zebuluni bali abandu ebikhumila amakhumi karano na musafu nende ebikhumi bine. (57,400)
32Abandu boluyia lwa Yosefu, abomuluyia lwa Efuraimu abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 33Aboluyia lwa Efuraimu bali abandu ebikhumila amakhumi kane nende ebikhumi birano (40,500).
34Abandu boluyia lwa Manase abasaatsa abali abemiyika amakhumi kabili nende okhubisiaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe. 35Abandu boluyia lwa Manase bali abandu ebikhumila amakhumi kataru na babili nende ebikhumi bibili, (32,200).
36Abandu boluyia lwa Benjamini abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 37Aboluyia lwa Benjamini bali abandu ebikhumila amakhumi kataru na birano nende ebikhumi bine. (35,400) 38Abandu aboluyia lwa Dani abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 39Aboluyia lwa Dani bali abandu ebikhumila amakhumi kasasaba na bibili nende ebikhumi musafu (62,700).
40Abandu boluyia lwa Asheri abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 41Aboluyia lwa Asheri bali abandu ebikhumila amakhumi kane na shilala nende ebikhumi birano. (41,500)
42Abandu boluyia lwa Nafutali abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe. 43Aboluyia lwa Nafutali bali abandu ebikhumila amakhumi karano na kataru nende ebikhumi bine (53,400).
44Abasaatsa bano nibo aba Musa nende Haroni babala, nibakhoonywa nende abemilisi ekhumi nababili aboluyia lwa Isiraeli, shiamulala nasinjililanga abeshilibwashie. 45Kho boosi ababalwa mu Isiraeli abali abemiyika amakhumi kabili nende okhubisiaho abali nibanyala okhutsia mwihe, 46boosi halala bali abandu ebikhumila ebikhumi bisasaba na bitaru nende ebikhumi birano namakhumi karano. (603,550)
47Nebutswa aboluyia lwa Lawi shibabalwa halala nende Abaisiraeli bashiabwe tawe. 48Shichila OMWAMI Nyasaye yali niyaboolela Musa ari, 49“Shiolabala aboluyia lwa Lawi, kata okhukhaaba obunji bwabwe muboluyia lwa Isiraeli tawe. 50Nebutswa waahule Abalawi okhusinjilila amakhuwa akeliheema lianje litakatifu nende ebimanulwa bialio, nende okhulikhalabanila khandi balombakha amatili kabwe nikabotokhaane liheema elo. 51Buli olwa muhuyia ikambi yenywe, Abalawi nibo abaleeshinjia liheema elo hasi nende okhulisinjisia khandi aha muba nimukhoma ikambi yenywe. Ne omundu undi yesi naba natsia ahambi khulio okhuula yerwe. 52Abandu ba Isiraeli mumikanda chiabwe balasinjisia amaheema kabwe, buli mundu nelitililie khandi buli mundu neipenderaye. 53Nebutswa Abalawi balombakha amatili kabwe nibabotokhana liheema lianje litakatifu nibalilinda, kho mbu omundu undi yesi aleshe okhusita ahambi khulio nachila oburuma bwanje nibusambishila Abaisiraeli.” 54Kho abandu ba Isiraeli nibakhola buli shindu shinga olwa OMWAMI Nyasaye yali nalachile Musa.
Currently Selected:
OBUBALI 1: OLUPR
Highlight
Copy
Compare
Share
Want to have your highlights saved across all your devices? Sign up or sign in
