OBUBALI 2
2
Obuloosie bwetsimbia mukambi
1OMWAMI Nyasaye naboolela Musa nende Haroni ari, 2“Abandu ba Isiraeli balakhoma tsikambi tsiabwe nibabotokhana liheema lianje litakatifu, buli mundu alaba aha eshilolelo shiabeshilibwashiw shili, nende aha ipendera yabeinzuye yili.” 3Abalakhoma ikambi yabwe elubeka lwebukwe eweliuba lirulilanga, balaba aboluyia lwa Yuda, ne omwimilisi wabwe alaba Nashoni, omusiani wa Aminadabu. 4Abomukandakwe shinga olwa babalwa balaba ebikhumila amakhumi musafu na bine nende ebikhumi bisasaba (74,600).
5Abalakhoma ikambi yabwe niyiloondana nende eyoluyia lwa Yuda, balaba aboluyia lwa Isakari, ne omwimilisi wabwe alaba Natsanieli omusiani wa Zuari. 6Aboluyialwe shinga olwa babalwa balaba ebikhumila amakhumi karano na bine nende ebikhumi bine (54,400).
7Mana abalaloondakhwo naboluyia lwa Zebuluni, ne omwimilisi wabwe niye Eliabu omusiani wa Heloni. 8Aboluyialwe shinga olwa babalwa balaba ebikhumila amakhumi karano na musafu nende ebikhumi bine (57,400).
9Aboluyia lwa Yuda boosi shinga olwa babalwa, mumikanda chiabwe, balaba ebikhumila amakhumi munane na bisasaba nende ebikhumi bine (186,400). Nibo abalaranjilila okhutsia.
10Abalakhoma ikambi yabwe elubeka lwemulambo balaba aboluyia lwa Rubeni, ne omwimilisi wabwe alaba Elizuri omusiani wa Shedeuri. 11Aboluyialwe shinga olwa babalwa balaba ebikhumila amakhumi kane na bisasaba nende ebikhumi birano (46,500).
12Nabo abalakhoma ikambi yabwe nibaloondakhwo balala aboluyia lwa Simeoni, ne omwimilisi wabwe alaba Shelumieli omusiani wa Zurishadai. 13Aboluyialwe shinga olwa babalwa balaba ebikhumila amakhumi karano na shienda nende ebikhumi bitaru (59,300). 14Abalaloondakhwo naboluyia lwa Gadi, ne omwimilisi wabwe alaba Elisafu omusiani wa Rueli, 15Aboluyialwe shinga olwa babalwa balaba ebikhumila ebikhumi bine na birano nende ebikhumi bisasaba namakhumi karano (45,650).
16Abandu boosi abali mukambi ya Rubeni boosi shinga olwa babalwa mumikanda chiabwe bali ebikhumila ebikhumi birano na shilala nende ebikhumi bine na makhumi karano (151,450). Nibo abalaba abakhabili okhusumukha okhutsia.
17Mana liheema litakatifu nilichinjilwe nende aboluyia lwa Lawi lilaloondakhwo, nilili hakari wemikanda chiambeli chibili nende echiokhumalilikha chibili, kho okhuula bachende buli omukanda mubwiyangu bwakwo nende aha ipendera yabwe yili.
18Abalakhoma ikambi yabwe elubeka lwomumbo balaba aboluyia lwa Efuraimu, ne omwimilisi wabwe alaba Elishama omusiani wa Amihudi. 19Aboluyilwe shinga olwa babalwa balaba ebikhumila amakhumi kane nende ebikhumi birano (40,500). 20Mana abalaloondakhwo balaba aboluyia lwa Manase, ne omwimilisi wabwe alaba Gamalieli omusiani wa Pedahazuri. 21Abomukandakwe shinga olwa babalwa balaba ebikhumila amakhumi kataru na bibili nende abikhumi bibili (32,200) 22Mana abalaloondakhwo naboluyia lwa Benjamini, ne omwimisi wabwe alaba Abidani omusiani wa Gideoni. 23Abomukandakwe shinga olwa babalwa balaba ebikhumila amakhumi kataru na birano nende ebikhumi bine. (35,400). 24Abandu boosi abali mukambi ya Efuraimu boosi shinga olwa babalwa mumikanda chiabwe bali eshikhumila eshikhumi namunane nende eshikhumi shilala (108,100). Nibo abalaba abakhataru okhusumukha okhutsia. 25Abalakhoma ikambi yabwe elubeka lwemasaba balaba aboluyia lwa Dani, ne omwimilisi wabwe alaba Ahiezeri omusiani wa Mishadayi. 26Abomukandakwe shinga olwa babalwa balaba ebikhumila amakhumi kasasaba nabibili nende ebikhumi musafu. (62,700). 27Nabo abalakhoma ikambi yabwe nibaloondakhwo balaba aboluyia lwa Asheri, ne omwimilisi wabwe alaba Pagieli, omusiani wa Okurani. 28Aboluyialwe shinga olwa babalwa balaba ebikhumila amakhumi kane na shilala nende ebikhumi birano (41,500). 29Abalaloondakhwo balaba abolwibulo lwa Nafutali, ne omwimilisi wabwe alaba Ahira omusiani wa Enani. 30Abolwibulolwe shinga olwa babalwa balaba ebikhumila amakhumi karano na bitaru nende ebikhumi bine. (53,400) 31Abandu boosi abali mukambi ya Dani shinga olwa babalwa mumikanda chiabwe bali ebikhumila ebikhumi birano na musafu nende ebikhumi bisasaba (157,600). Nibo abalaba abokhumalilikha okhusumukha.
32Aboluyia lwa Isiraeli shinga olwa babalwa boosi halala mubilibwa biabwe nende mumikanda chiabwe bali abandu ebikhumila ebikhumi bisasaba nebikhumi nabitaru nende ebikhumi birano namakhumi karano (603,550). 33Nebutswa shinga OMWAMI Nyasaye yali nalachilisiye Musa, Abalawi shibabalilwa muluyia olwa Abaisiraeli tawe. 34Kho abandu ba Isiraeli nibakhola buli shindu shinga olwa OMWAMI Nyasaye yali nalachilisiye Musa. Nibakhoma tsikambi tsiabwe, buli omukanda neipendera yabwe, ne nibatsia buli mundu nali mubeshilibwashie.
Currently Selected:
OBUBALI 2: OLUPR
Highlight
Copy
Compare
Share
Want to have your highlights saved across all your devices? Sign up or sign in