ABALAWI 27
27
Amalako akebihaanwa khu OMWAMI Nyasaye
1OMWAMI Nyasaye yalachilisia Musa ari, 2“Oboolele abandu ba Isiraeli amalako kano mbu, omundu naba nasuubisia okhuhaanila OMWAMI Nyasaye omundu nalebe, khulwa okhuusia eshitsubo nalebe, omundu ouhaanilwe oyo anyala okhuba omulekhuule khulwa oumuhaanile okhurunga eshichelo shiarebwaho. 3Omusaatsa wemiyika amakhumi kabili okhuula owemiyika amakhumi kasasaba, alanunulwa khulwa okhurunga ebitonye amakhumi karano bieifetsa, okhulondana nende eshichelo shia habundu hatakatifu. 4Ne naba omukhasi, alanunulwa khulwa okhurunga ebitonye bieifetsa amakhumi kataru. 5Ne omundu oyo naba nali owemiyika chirano okhuula owemiyika amakhumi kabili, alanunulwa khulwa okhurunga ebitonye amakhumi kabili bieifetsa, ne nali omukhasi ebitonye ekhumi bieifetsa. 6Ne nali omwana womwesi mulala okhuula owemiyika chirano alanunulwa khulwa ebitonye birano bieifetsa naba nali omusiani, ne nali omukhaana alanunulwa khulwa ebitonye bitaru bieifetsa. 7Ne omundu oyo naba nali omusaatsa wemiyika echibira amakhumi kasasaba, alanunulwa khulwa ebitonye ekhumi nabirano bieifetsa, ne nali omukhasi alanunulwa khulwa ebitonye ekhumi bieifetsa.
8“Ne omundu witsubile eshitsubo oyo naba nali omumamani muno oulanyala okhurunga eshichelo eshio ta, omundu owahaanwa oyo okhuula areerwe khumwisaaliisi, naye omwisaaliisi achelele omundu wahaana oyo eshichelo eshia anyala okhuhaana.
9“Eshitsubo eshio nishiba eshia isolo yifuchililwa okhuhaanila isie OMWAMI Nyasaye omusango, kho yiba indakatifu. 10Alachikalukhasiakhwo neyindi, kata okhuchikulasia tawe; Ne naba nakhola ario, tsisolo etsio tsiosi tsilaba etsianje. 11Nebutswa niyiba isolo yomusilo, eyilanyala okhuhanwa okhuba omusango khwisie ta, kho omundu oyo okhuula areere isolo eyo khumwisaaliisi. 12Naye omwisaaliisi aboole obukusi bwayo okhulondana nobulayi nende obubi bwayo, mana yikusibwe obukusi obwo. 13Nebutswa omundu naba niyenya okhuchinunula, okhuula ameete khubukusi obwo eshitonye shiakharano shiobukusi obwo.
14“Olwa omundu naba niyanzahulila isie OMWAMI Nyasaye inzuye, okhuula omwisaaliisi aboole obukusi bwayo okhulondana nobulayi nende obubi bwayo; mana yikusibwe obukusi obwo. 15Ne omundu ouchihaanile oyo naba niyenya okhuchinunula, okhuula ameete khubukusi bwayo obwo eshitonye shiakharano.
16“Ne omundu yesi yesi naba niyanzahulila isie eshitonye shiomukundakwe kwobulaame, kho obukusi bwakwo okhuula buhelane nende eshichelo shieimwo yirakungwa mumukunda okwo, mbu tsikilo amakhumi kabili tsieishayiri khulwa ebitonye amakhumi karano bieifetsa. 17Ne omundu naba niyanzahulila omukundakwe mumuyika okwobulekhuulwi, obukusi bwakwo bulaba obweshichelo shitsuule. 18Nebutswa naba nakunzahulila olunyuma lwomuyika kwobulekhuulwi, kho omwisaaliisi okhuula abale eshichelo shiamapesa akahelana nende emiyika chitonyile okhuula khumuyika kulondakhwo okwobulekhuulwi. 19Ne omundu ouba niyanzahulile omukundakwe niyenya okhukununula, okhuula ameete khubukusi bwakwo eshitonye eshiakharano mana kumukalushile. 20Nebutswa omundu oyo naba nakukusia khumundu undi, ne nashili okhukununula okhurula khwisie OMWAMI Nyasaye, omukunda okwo shikulanunulwakhwo khandi ta inziayo. 21Ne khumuyika kulondakhwo kwobulekhuulwi, omukunda okwo kulaba okwanje inziayo; kho kulaba okwa abesaaliisi.
22“Ne omundu niyanzahulila omukunda kwomwene yakula, okulali okwobulaamebwe ta, 23omwisaaliisi okhuula amuchelele eshichelo shiobukusi bwakwo okhulondana nende emiyika chitonyile okhuula khumuyika kwobulekhuulwi. Mana omundu oyo arunje amapesa ako khunyanga eyo; amapesa ako kalaba akanje isie OMWAMI Nyasaye. 24Ne khumuyika kwobulekhuulwi, omukunda okwo okhuula kukalusilibwe owali mwenekwo noho abolwibulolwe.
25“Buli eshichelo shieshindu shiosi okhuula shichelwe okhulondana neshichelo shiarebwaho, eshia habundu hatakatifu.
26“Eshikulanda shiemiruko neshianje, kho abulaho owakhashiahula khandi mbu shibe eshihanwashie khwisie tawe. Shibe eshimoosi noho eshimeme shielikondi noho eshia imbusi, biosi nebianje. 27Ne eshikulanda eshio nishiba eshieisolo yomusilo, kho omundu oyo ashinunule okhulondana neshichelo eshiarebwaho, khandi ameetakhwo eshitonye shiakharano; ne nishiba nishilanunulwa ta, okhuula shikusibwe khumundu undi okhulondana neshichelo eshiarebwaho.
28 #
Obub. 18:14
“Nebutswa eshindu shiosi shiosi eshiamala okhwahulilwa isie OMWAMI Nyasaye, shibe omundu noho omuruko, noho omukunda kwobulaame, shilakusibwakhwo noho okhununulwakhwo tawe. Eshindu shiosi eshiahulilwa isie neshitakatifu khandi eshianje inziayo. 29Kata omundu yesi yesi owahaanwa khwisie kho mbu amululwe, alanunulwakhwo tawe, okhuula yerwe.
30 #
Obub. 18:21; Okhuk. 14:22-29 “Eshitonye shielikhumi shiebichese biomukunda, bibe bieimele noho biebiamo, biosi nebianje. 31Omundu naba niyenya okhununula eshitonye shielikhumishie, okhuula arunje omurungo kwarebwaho khandi ameetekhwo eshitonye shiakharano. 32Ne mumiruko, ndala khubuli emiruko ekhumi neyanje. Olwa emiruko echio chibalwa, eyekhumi yilabetsanga eyanje. 33Mwene emiruko echio alarechekha, kho mbu omuruko kwahulwa kube omulayi noho omubi tawe. Kata shialakukulaasiakhwo nende okundi tawe. Naba nakukulaasia kho chiosi nechianje, khandi shichinyala okhununulwa tawe.”
34Kano niko amalako aka OMWAMI Nyasaye yalachilisia Musa khushikulu shia Sinai mbu, aboolele abandu ba Isiraeli.
Currently Selected:
ABALAWI 27: OLUPR
Highlight
Copy
Compare
Share
Want to have your highlights saved across all your devices? Sign up or sign in
