OKHURULA 39

Okhunaba khwebifwalo ebia Abesaaliisi

(Okhur. 28:1-18)

1Banaba tsingubo tsindayi, etsia iranji ya buluu, eyeisambarao, nende okhurula khubwoya obwakhanyu, khulwa abesaaliisi okhwifwala nibakhalabana habundu atakatifu. Banabila Haroni tsingubo tsiobwisaaliisi okhulondana nende amalako aka OMWAMI Nyasaye yalaka Musa.

2Banaba ifodi okhurula khubuusi bweikitani inyushe, obwabuluu, obwakhanyu nende obuusi obweiranji yeitsahabu. 3Beraanya orubaati orunyelele rweifetsa, nibarwarasiamwo shinga obuusi. 4Bakaasia ebitonye bibili ebiokhumabeka, nibabiliimaasia halala. Bongasilia ebitonye ebio bibili khutsimbeka tsibili tsiosi kho mbu, binyale okhweleela. 5Khandi omushipi okwali nikwabaswa obulayi, nikwakaasibwa okhurula khubuusi tsana obwo, kwali nikwongaasibwa khufodi eyo kho mbu, kwikhole eshindu shilala nende ifodi tsana, shinga olwa OMWAMI Nyasaye yali niyalachilisia Musa.

6Bakaasia amachina kobukusi akali nikahandikwakhwo ameera kabaana ba Yakobo, akali nikakanyilwa khundulo wamabaati akakaasibwa okhurula khutsahabu. 7Bara amachina ako khumikoye chiokhumabeka echieifodi khulwa okhusinjilila tsimbia ekhumi natsibili tsia Isiraeli.

8Khandi abanabi abo banaba ingubo yokhushilifu shinga olwa bali nibanabile ifodi. Ifoti eyo yali eyeingubo yeikitani inyushe, yeiranji yeitsahabu, eya buluu, yeisambarao nende inzakhanyu. 9Ilolooti eyo yali niyihelana tsimbeka tsiosi. Yali eyihela tsisendimita amakhumi kabili khutsimbeka tsiosi, ne khandi yali niyifumbilwemwo akhandi khabili. 10Bara khungubo eyo emikhoosi chine, echiamachina kobukusi. Okwambeli kwalikhwo amachina ka otemu, aka ipiteta nende aka ibaraketsi. 11Omukhoosi kwakhabili kwalikhwo imopekinende isapiri yamachina kobukusi. 12Omukhoosi kwakhataru nakwo kwalimwo ileshemu, amachina ketsilulu nende ikhalama. 13Ne nakwo omukhoosi kwakhane kwalimwo itarashishi ishohamu nende yashepe. Amachina ako munyanzo katsio kali nikafumbilwa mutsahabu. 14Amachina ako kasaarwakhwo ameera ekhumi nakabili, buli lichina eliira liomusiani wa Yakobo, khulwa tsimbia ekhumi natsibili tsia Isiraeli. 15Ne khungubo yene yokhushilifu eyo barakhwo tsinyolo etsiasiirwa obulayi neitsahabu inzeleleshe. 16Bakaasia tsingaka tsibili etsieitsahabu mana nibatsira hekulu khutsikona tsieingubo eyo. 17Baboha tsinyolo tsibili etsio khungaka tsibili etsio ne nibatsiboha khungubo yokhushilifu, mukari mwayo niyilondokhana okhuula khukona ya hekulu. 18Mana nibaboha tsindulo tsindi tsibili tsiolunyolo lweitsahabu olwo, imbeli khumikoye chibili echieifodi eyo. 19Nibakaasia tsingaka tsibili okhurula khutsahabu nibatsiliimaasia khutsikona tsiemwalo weifodi yokhushilifu eyo, khundulo mukari hambi nende ifodi eyo. 20Nibakaasia tsingaka tsindi tsieitsahabu tsibili nitsiliimaasibwa hamwalo wobunjilo bwayo hamukulu khumushipi kweifodi. 21Baboha ilolooti yokhushilifu eyo khungaka tsieifodi shinga olwa Musa yali nabalachilisiye, ne nibaboha omukoye kweshitambaya shieifodi khungubo yokhushilifu nende ingubo ya buluu kho niyelela ahambi khumushipi nikulanyala okhutendeya tawe.

Okhukaasia tsingubo tsindi tsiabesaaliisi

22Omukoye kwaburiranga hasi weifodi kwali nikwakaasibwa khubuusi bwa buluu obwo. 23Likosi liali nilianabwa obulayi elilanyala okhurandukha tawe. 24Bamala nibabotokhasia lichemo liosi nende amakomamanga kobuusi bwa buluu, obweisambarao nende obwakhanyu nende obweikitani inyushe eyasiirwa. 25Khandi bakaasia ebikhuli bieitsahabu inzeleleshe, nibara ebikhuli hakari wamakomamanga okhubotokhasia khundulo weikanzu, hakari wamakomamanga ako. 26Babohanga eshikhuli nende likomamanga, eshikhuli nende likomamanga khundulo weikanzu okhuchibotakhasia yosi, shinga OMWAMI Nyasaye yali nalachile.

27Bamala bakaasilie Haroni nende abasianibe, amakoti akanabwa okhurula khungubo yeikitani inyushe, 28khandi nibabanabila ebilemba okhurula khungubo yeikitani inyushe, tsikofia okhurula khungubo yeikitani inyushe nende ebinyasa bieikitani inyushe eyalukhwa obulayi, 29nende emishipi eschibasilwe obulayi echieikitani, echieiranji ya buluu, eyeisambarao, nende okhurula khubuusi obwakhanyu shinga olwa OMWAMI Nyasaye yali nalachile Musa. 30Bakaasia eshimuli eshipapale okhurula khutsahabu inzeleleshe, nebahandikakhwo bari, “Eshiahule khu OMWAMI Nyasaye.” 31Mana nibashiboha khubweni hambeli weshilemba shinga olwa OMWAMI Nyasaye yali niyalaka Musa.

Okhumalilisibwa khwemilimo

32Mana emilimo chiokhukaasia liheema Litakatifu chiamala nichihelelesibwa shinga olwa OMWAMI Nyasaye yali niyalaka Musa mbu, chikholwe. 33Kho nibareerera Musa liheema elo halala nende abindu bialio biosi, tsisako, ebitiili, ebitiisi, tsisheti, tsisiilo nende ebichibi biatsio biosi. 34Khandi nibamureerera eshifuunikho shieliseelo linyushilwe liamakondi, elibashilwekhwo irangi inzakhanyu halala nende eshifuunikho shiamaseelo kandi nende ingubo ishinga. 35Bareera kata lisanduku liamalako halala nende amachina kabili ako nende ebitiisi bialio ebio. 36Bareera khandi imeesa nende ebindu ebiakaasilibwakhwo biosi halala nende omukaate okwahaanwa khulwokwokhukholela Nyasaye omusango. 37Bareera eshichibi shieitsahabu inzeleleshe, tsitaha tsiayo, nende ebimanulwa biayo biosi halala nende amafura kokhwashia mutaha. 38Bareera eshimalilo shiemisango shieitsahabu, amafura kokhutsushilila nende obubani bweshing'ari eshilayi. Bareera ingubo ishinga yomuliango kweliheema. 39Bareera eshimalilo shiemisango shiemukasa, ebitiisi biashio ebimanulwa biashio biosi nende eshikaye shiokhusaabilamwo nende eshichibi shiashio. 40Bareera tsingubo tsishinga, tsisiilo tsiatsio, nende ingubo ishinga yeshiliibwa shielwanyi nende emikoye chiabio nende ebibambo biabio halala nende buli shindu shiokhwikhoonyelwa okhukhola emilimo mwiheema liokhubaho okhwa OMWAMI Nyasaye. 41Khandi bareera ebifwalo ebilayi, ebiali nibianabilwa abesaaliisi olwa baba nibakhola emilimo habundu hatakatifu aha OMWAMI Nyasaye. Ebifwalo ebitakatifu ebio nebia Haroni nende abaanabe. 42Abandu ba Isiraeli bakola biosi ebia OMWAMI Nyasaye yali nalachile Musa okhukhola. 43Musa yahenga ne nanyoola mbu, bali nibakholile buli shindu shinga olwa OMWAMI Nyasaye yali nalachile, ne nabilaamila tsikhabi.

Currently Selected:

OKHURULA 39: OLUPR

Highlight

Copy

Compare