OKHURULA 38

Okhukaasia eshimalilo shiemisango shiokhusambilakhwo emisango

(Okhur. 27:1-8)

1Bezaleli yakaasia eshimalilo shiemisango okhurula khumusaala kwomupeli, eshiokhusambilakhwo emisango emisambe. Oburambi nende obuchikha bwashio bwali obuhelana. Tsimbeka etsio tsiosi tsibili tsiali etsihela tsimita tsibili nende tsisendimita amakhumi kabili natsirano. Obwiyinikhu bwashio bwali obuhela tsimita tsibili nende tsisendimita amakhumi kabili natsirano. 2Yakaasia tsinzika tsine mukona tsine tsieshimalilo shiemisango eshio. 3Khandi nakaasia ebindu biokhushimalilo shiemisango biosi, ebifulia, amapakiyo tsingaraya, amahana komulilo nende ebikaye biokhurakhwo omulilo, biosi okhurula khumukasa. 4Khandi yakaasia eshitalatalilo shietsiseng'enge okhurula khumukasa ne nashira hasi khundulo weshimalilo shiemisango eshio. 5Yamala nakaasia tsingara tsine ne natsira khutsikona tsine tsieshimalilo shiemisango eshio. 6Kho nakaasia tsinyanzo tsine okhurula khumbao tsiomusaala kwomupeli ne natsibakhakhwo omukasa. 7Mana natsinjisia mutsingara etsiali khubuli elubeka lweshimalilo shiemisango eshio. Eshimalilo shiemisango eshio shiakaasibwa okhurula khutsimbao, ne mukari mwashio mwali mukhaya butswa.

Okhukaasia olukaraya lwomukasa

(Okhur. 30:18)

8 # Okhur. 30:18 Bezaleli yakaasia olukaraya lweshimalilo shiemisango okhurula khumukasa, olweshichibi shialwo shiali shiomukasa khandi. Olukaratya olwo lwali lwakaasibwa okhurula khubiho biabakholi beshikhasi, abakholanga hamuliango weliheema liokhubaho okhwa OMWAMI Nyasaye.

Olukaka olwabotokhana Liheema Litakatifu

(Okhur. 27:9-19)

9Bezaleli yakaasia olwanyi lweliheema liokhubaho okhwa OMWAMI Nyasaye, okhurula khungubo tsishinga tsieikitani inyushe. Khulubeka lwemulambo khwali nende ingubo ishinga yetsimita amakhumi kane natsine 10nitsitiililwe nende tsisiilo amakhumi kabili nende etsindi amakhumi kabili tsiemikasa, tsinzaha nende ebichibi biayo biali ebiakaasibwa okhurula khufetsa. 11Olubeka lwemasaba lwali niluhelana nende olwemulambo lwashio. 12Elubeka lwa mumbo lwalikhwo tsingubo tsishinga etsihela tsimita amakhumi kabili natsibili, tsisiilo ekhumi nende ebichibi biatsio nende ebifulwa nemituchilo, echiakaasibwa okhurula khufetsa. 13Ne ebukwe womuliango kwali, ingubo ishinga yaliyo eyihela tsimita amakhumi kabili natsibili. 14Ne buli khulubeka lwokhwinjilila, ingubo yaliyo ishinga eyoburambi obuhela tsimita tsisasaba nende tsisendimita amakhumi kasasaba, khandi yali nitsisiilo tsitaru nende ebitiisi bitaru. 15Khandi elubeka undi eyo ingubo yaliyo ishinga eyoburambi obuhela tsimita tsisasaba nende tsisendimita amakhumi kasasaba, khandi yali nitsisiilo tsitaru nende ebitiisi bitaru. 16Tsingubo tsishinga etsiakaasibwa etsio tsiosi tsiali etsieingubo inyushe. 17Ebichibi bietsisiilo biali ebiomukasa, ne natsio tsinzaha tsiatsio tsiali nitsiakaasibwa okhurula khumukasa. Emirwe chiatsio chiali nichifuumilwekhwo ifetsa. 18Ingubo ishinga yokhushiliibwa shielwanyi yali niyanabwa okhurula khutsingubo tsiekitani, etsieiranji ya buluu eya isambarao nende okhurula khubwoyoa obwakhanyu. Yali niyang'olwakhwo obuusi obulayi. Yali eyoburambi buhela tsimita shienda nende obuchikha tsimita tsibili. 19Yali niyeleelile khusiilo tsine etsia khubichibi biayo bine ebiomukasa. 20Ebibambo bieliheema biosi biali nibiakaasibwa okhurula khumukasa.

Ebindu biokhumbakha liheema litakatifu

21Bino nibio ebindu ebiekhoonyelwa khulwokhumbakha liheema Litakatifu, omwa amachina kamalako ekhumi kali nikabikhwa. Musa niye owalaka mbu, ebindu bino bibeho. Ebindu bino biarechekhwa nende Abalawi shinga olwa Musa yali niyabalachilisia okhukhola, hasi wobwimilisi bwa Ithumari omusiani wa Haroni, owali omwisaaliisi.

22Naye Bezaleli omusiani wa Uri, omwitsukhulu wa Huri, owomuluyia lwa Yuda niye owakaasia buli shindu eshia OMWAMI Nyasaye yali nalachilisiye mbu, akaasie. 23Omundu wamukhoonya okhukaasia yali Oholiabu omusiani wa Ahisamaki, owomuluyia lwa Yuda, niye omusaatsa omusitsa khandi omunabi owanaba tsingubo tsieikitani, etsiabuluu, etsieisambarao, nende tsinzakhanyu.

24Itsahabu yaahulwa khulwa liheema litakatifu elia OMWAMI Nyasaye yali tsikilo ebikhumi munane namakhumi musaafu nende musaafu, nende tsiguramu ebikhumi bitaru okhulondana nende shinga olwa eshichelo shiahabundu hatakatifu shialinji. 25#Okhur. 30:11-16Ifetsa nayo yali tsikilo ebikhumila bitaru nende ebikhumi bine, okhulondana nende eshichelo eshia habundu hatakatifu shinga olwa shialinji. 26#Mat. 17:24Buli mundu owabalwa, owali nemiyika amakhumi kabili nende mulala kata okhubisiaho yahaana eshicheloshie shieifeetsa, eshiali tsiguramu tsirano. Ne abasaatsa boosi ababalwa bali ebikhumila ebikhumi bisasaba nabataru, ebikhumi biraano namakhumi karaano. (603,550) 27Ifetsa yekhoonyelwa yali tsikilo ebikhumila bitaru nende ebikhumi bine. Tsingubo tsishing tsiekhoonyelwa khusiilo tsiali tsikilo amakhumi kataru nende tsine khulwa buli isiilo. 28Bezaleli yekhoonyela tsikilo amakhumi kataru yeifetsa okhukaasia tsisheti, tsisaka tsietsisiilo, nebifuunikho biebisuli. 29Omukasa okwahaanilwa OMWAMI Nyasaye kwali tsikilo ebikhumila bibili, ebikhumi bine namakhumi kabili natsibili. 30Yekhoonyela ebindu biomukasa ebio okhukaasia ebitiisi biomubwinjililo bweliheema liokhubaho okhwa OMWAMI Nyasaye, okhukaasia eshimalilo shiemisango shiemukasa, nende okhukaasia ebindu biosi ebiokhushimalilo shiemisango. 31Ebichibi biali biolukaka tsimbeka tsiosi, nende ebichibi biobwinjilililo bwolwanyi biosi, nende ebibambo biolukaka olwo tsimbeka tsiosi biali biomukasa.

Currently Selected:

OKHURULA 38: OLUPR

Highlight

Copy

Compare