OKHURULA 40
40
Okhusinjisibwa nende okhwahulwa kwa Liheema Litakatifu
1OMWAMI Nyasaye yaboolela Musa ari, 2“Khunyanga yambeli yomwesi kwambeli, osinjisie liheema. 3Mana ore mwiheema omwo lisanduku liamalako mana olishinje nende ingubo ishinga. 4Olosiekhwo imeesa norakhwo ebindu biayo. Oreere ebichibi mana orekhwo tsitaha tsiabio. 5Orecheshe eshimalilo shiemisango shieitsahabu shiokhusambilakhwo obubane imbeli welisanduku liamalako, mana olishinje nende ingubo ishinga hamuliango weliheema Litakatifu. 6Orenjeshe liheema imbeli weshimalilo shiemisango khulwa okhusambilakhwo ebihaanwa. 7Orenjeshe eshikaye shiokhusaaba hakari weliheema nende eshimalilo shiemisango mana otsushemwo amaatsi. 8Osire liheema khulwa okhusimikha tsisilo mana ore ingubo ishinga hamuliango walio.
9“Mana waahule liheema elo khulwa okhulitsushililakhwo amafura amatakatifu. Ne liheema elo lilaba litakatifu. 10Khandi, waahule eshimalilo shiemisango shiokhusambilakhwo emisango emisambe nende ebimanulwa biashio biosi khulwa okhutsushililakhwo amafura. Kho eshimalilo shiemisango eshio shilaba eshitakatifu. 11Khandi waahule eshikaye shiokhusaabilakhwo munjila ndala yene eyo.
12“Mana oreere Haroni nende abaanabe hamuliango weliheema Litakatifu mana obasinje khulwa okhubasiiya. 13Niwakhamala okhubasinga, ofwale Haroni ingubo yobwisaaliisi, mana omutsushililekhwo amafura nomwahula mana yakhalabanile isie shinga omwisaaliisi. 14Oreere abaanabe mana obafwale tsingubo. 15Khandi olunyuma obatsushililekhwo amafura nobaahula shinga lwoba niwaahuule sabwe. Okhutsushilila okhwa olaba notsushiliilekhwo amafura okhwo, khulabakhola okhuba abesaaliisi, khandi abandu bolwibulo lwabwe balaba abesaaliisi khulwemiyika chiosi.”
16Kho Musa nakhola buli shindu shinga olwa OMWAMI Nyasaye yali namulachile okhukhola. 17Kho mumwesi kwambeli kwomumuyika kwakhabili, okwa abandu ba Isiraeli barulilakhwo Misiri, nukuli lulala, Liheema Litakatifu liasinjisibwa. 18Musa yasimikha omuse kweliheema Litakatifu nende okhusimikha ebitiisi, ne narakhwo tsisheti mana nasimikha tsisiilo tsieliheema elo. 19Nafwimba ingubo yeliheema khumisaala chia yali nakaasiye. Khandi nafwimbakhwo ingubo yokhufuunikhakhwo shinga OMWAMI Nyasaye yali nalachile. 20Mana nabukula amachina kabili, akali nikahandikwakhwo amalako, nakarenjekha mwisanduku liamalako. Yamala nara tsinyanzo khwisanduku ne nafuunikhakhwo eshifuunikho. 21Kho narenjekha lisanduku liamalako elo mwiheema nende okhulifwimba nende ingubo ishinga. Yakhola ario okhushinga lisanduku shinga olwa OMWAMI Nyasaye yali nalachile. 22Yarenjekha imeesa mwiheema elubeka wemasaba, elwanyi weingubo ishinga, 23Kho narenjekha khumeesa eyo emikaate chiokhuhaanila Nyasaye eshihanwa shinga olwa OMWAMI Nyasaye yali nalachile. 24Khandi Musa nareera eshichibi shietsitaha mwiheema elubeka wemulambo, nishihengana nende imeesa, 25ne habwene yaho nahafiliaho tsitaha shinga olwa OMWAMI Nyasaye yali nalachile. 26Musa narenjekha eshimalilo shiemisango shieitsahabu mwiheema imbeli weingubo ishinga eyo, 27Kho nasamba obubane bweshing'ari eshilayi shinga olwa OMWAMI Nyasaye yali nalachile. 28Kho niyelesia ingubo ishinga eyo hamuliango weliheema. 29Yara hamuliango weliheema litakatifu yaho imbeli weingubo ishinga eshimalilo shiemisango shiokhusambilakhwo emisango. Ne khubwenokhwo nikhwo okhwa yasambila emisango emisambe nende echieimele shinga olwa OMWAMI Nyasaye yali nalachile. 30Mana nara olukaraya lwokhusaabilakhwo hakari weliheema nende eshimalilo shiemisango ne natsukhakhwo amaatsi. 31Kho Musa, Haroni nende abaana ba Haroni nibeyosiamwo amakhono nende ebilenje biabwe. 32Buli lwosi olwa benjilanga mwiheema noho okhutsia hashimalilo shiemisango, beyosinjia ebilenje nende amakhono shinga olwa OMWAMI Nyasaye yali niyalaka. 33Musa yamala nasira liheema nende tsisiilo, olwanyi lwosi okhubotokhana liheema nende eshimalilo shiemisango ne nafuunikha ingubo ishinga niyifuunikha eshiliibwa shielwanyi. Kho naba niyakhamala emilimo chiosi.
Lileesi lifuunikha liheema Litakatifu
(Obub. 9:15-23)
34 #
1 Abar. 8:10,11; Isa. 6:4; Ezek. 43:4,5; Obufw. 15:8 Mana lileesi liamala nilifuunikha liheema liokhubaho okhwa OMWAMI Nyasaye, nabwo obulafu bwokhumanyia mbu OMWAMI Nyasaye aliho nibwitsula mwiheema elo. 35Obulafu obwo bwachila Musa nakhaywa okhwinjila mwiheema elo. 36Mana olwa lileesi elo liarusibungwaho, abandu ba Isiraeli batsiilililanga nende oluchendo lwokhutsia Kanani. 37Nebutswa lileesi niliatong'angaho, abandu ba Isiraeli shibatsiilililanga noluchendo lwabwe tawe. 38Ebise biosi ebia bamala mushitsiimi nibachendachendanga, balolelanga okhubaho okhwa OMWAMI Nyasaye mwileesi elo nilili hekulu weliheema. Ne nishili eshilo balolanga omulilo nikututuchila hekulu weliheema okhuula shinga olwa boola Kanani.
Currently Selected:
OKHURULA 40: OLUPR
Highlight
Copy
Compare
Share
Want to have your highlights saved across all your devices? Sign up or sign in
