OKHURULA 34
34
Amachina amayiakha kamalako
(Okhuk. 10:1-5)
1OMWAMI Nyasaye naboolela Musa ari, “Baatsa amachina kabili shinga akali kambeli, nasi ndalahandikakhwo amakhuwa akabeele khumachina kabili ka wayarire ako. 2Wirecheshe mana mukamba mumabwibwi otikulushe khubutenje bweshikulu shia Zayuni witse aha endi. 3Shioletsakhwo nomundu undi yesi tawe. Khandi omundu yesi shialalolekhakhwo habundu hosi khushikulu tawe. Okhumeetakhwo, amakondi netsing'ombe shibilaayakhwo hasi weshikulu tawe.” 4Kho Musa nabaatsa amachina kandi kabili. Ne olwa eshialo bwali nibushiele mumabwibwi, yabukula amachina ako naniina ninako khushikulu shia Zayuni shinga OMWAMI Nyasaye yali nalachile.
5OMWAMI Nyasaye niyeshela mwileesi, ne namurumbulila eliiralie litakatifu mbu, OMWAMI Nyasaye. 6#Okhur. 20:5,6; Obub. 14:18; Okhuk. 5:9,10; 7:9,10Mana OMWAMI Nyasaye nabira imbeli wa Musa naboola ari, “Isie OMWAMI Nyasaye, endi Nyasaye weshisa eshinji nende obukoosia obunji. Shiendikhwo omwangu wokhusinyikha ta, khandi endi nobuheeli obunji mana endi omwisiikwa. 7Elia endachile okhukhola, elikholanga khulwa tsinzibulo ebikhumila nebikhumila, khandi endeshelanga abandu abanzonoonela. Nebutswa shindalachweya okhuhelesia abaana nende abetsukhulu eshinyasio, okhuula khulwibulo lwakhataru nende olwa khane khulwa obwonooni bwabaasabwe tawe.”
8Musa yanguyilisia bwangu okhwinamia omurwekwe hasi nende okhwinamila OMWAMI Nyasaye, 9naboola ari, “Iwe OMWAMI Nyasaye, noba nochamisiibwe ninasi khandi noba niungoosiye, chama otsie ninefwe. Kata abandu abo nibaba abatinyu, okhuleshele obwonooni bwefwe mana okhufuchilile butswa shinga abandubo beene.”
Indakano hakari wa Nyasaye nende abandu ba Isiraeli yitinyisibwa
10OMWAMI Nyasaye naboolela Musa ari, “Ekhola indakano nende abandu ba Isiraeli. Ndalakhola ebikhole biamakana imbeli wabwe, ebia bashili okhukholakhwo khushialo, kata mumahanga koosi tawe. Ebikhole bia ndalakhola nibiamariisia, ne abandu boosi balabilola. 11Olinde lilako eliekhulaka inyanga yino. Olwa olaba notsitsanga, ndalalonda Abamori, Abakanani, Abahiti, Abaperisi, Abahiwi nende Abayebusi. 12Mumanyenje, mwitsukhana mwakhola indakano nende abandu beshialo shiamutsiamwo, shichila indakano eyo kwakhaba omubero, okurechilwe mbu mukwemwo. 13#Okhuk. 16:21Nebutswa mulikulule ebimalilo biemisango biabwe, nimusasia tsisiilo tsiabwe tsiokhwinamila nokhuremaka eshifwanani shiomunyasaye wabwe Ashera: 14Shimulenamilakhwo omunyasaye undi ta, shichila isie Nyasaye endi Nyasaye weimbalikha, oulanyala okhufuchilila abandu banje okhwinamila omunyasaye undi tawe. 15Shimulakholakhwo indakano nende abandu beshialo shia mutsia okhumenyamwo ta, okhuba olwa benamila abanyasaye babwe nibabakholela emisango, bamulanga mbu, mwesi musanje ninabo, nenyu mulaba mumarechekho kokhulia ebiokhulia bia bakholeele abanyasaye babwe omusango. 16Khandi abaana benywe abasiani betsukhana bateeshia abakhaana Abakanani, abakhaana abo banyala okhubashiukhasia niababakhola okhwinamila abanyasaye bamahanga kandi.
17 #
Okhur. 20:4; Abal. 19:4; Okhuk. 5:8; 27:15 “Shimulenamilakhwo abanyasaye aberaanyilwe okhurula khubibia tawe.
18 #
Okhur. 12:14-20; Abal. 23:6-8; Obub. 28:16-25 “Mukholenje lisabo liemikaate chibulamwo limela buli lwosi khumwesi kwa Abibu. Khumwesi okwo, mulitsenje emikaate chibulamwo limela khulwa tsinyanga musaafu shinga olwa ndamulachilisia, okhuba omwesi okwo nikwo okwa mwarulilakhwo mushialo shia Misiri.
19 #
Okhur. 13:2
“Buli omwana omusiani omwikulanda nowanje khandi eshiayo eshikulanda eshisaatsa neshianje. 20#Okhur. 13:13Nebutswa isishiliyo niyiibula eshimoosi eshikulanda okhuula mulashinunula. Nebutswa nimuba nimulashinunula ta, okhuula mufunachenje likosi lieshimoosi eshio.
“Omundu yesi yesi shialetsakhwo imbeli wanje amakhono amakhaya tawe.
21 #
Okhur. 20:9,10; 23:12; 31:15; 35:2; Abal. 23:3; Okhuk. 5:13,14 “Mukholenje emilimo chienywe khulwa tsinyanga tsisasaba, nebutswa shimulakholekhwo emilimo khunyanga yomusaafu ta, kata mutsinyanga tsiokhulima noho mutsiokhuchesa ebiokhulia. 22#Abal. 23:15-21; Obub. 28:26-31; Abal. 23:39-43Okholenje lisabo mukhuchaaka khwelichesa liebichese biambeli bieingano. Khandi mushubwe mukholenje lisabo lielichesa liokhumalilisia omuyika. 23Buli muyika khataru, abeshisaatsa ba Isiraeli boosi okhuula betsenje okhunzinamila isie OMWAMI Nyasaye, Nyasaye wa Isiraeli. 24Ndalalonda amahanga akali imbeli wenywe, nembaanguula tsinzakho tsienywe. Abulaho omundu kata mulala owakhekombe eshialo shienywe olwa mwakhakhung'ane okhunzinamila isie OMWAMI Nyasaye, Nyasaye wenywe khataru khubuli muyika.
25 #
Okhur. 12:10
“Olwa muba nimuukholela omusango omusambe kwomuruko, shimulaakholele omusango kwomukaate kulimwo limela tawe. Shimulabishekhwo inyama ililiilwe khunyanga ya Pasaka, okhuula khunyanga eyilondakhwo tawe.
26 #
Okhuk. 26:2;
Okhuk. 14:21
“Buli muyika mureerenje munzu yanje isie OMWAMI Nyasaye, Nyasaye wenywe ebichese biambeli biomumikunda chienywe.
“Shimulateeshekhwo inyama yeshimeeme shielikondi noho shieimbusi, mana mutsushemwo amabeele kanyina tawe.”
27OMWAMI Nyasaye yaboolela Musa ari, “Handika amakhuwa kano, okhuba ndalakhola indakano hakari wanje ninawe nende abandu ba Isiraeli okhulondana nende amakhuwa tsana kano.” 28Musa yamala namenya khushikulu shia Sinai nende OMWAMI Nyasaye khulwa tsinyanga amakhumi kane eshilo neshiteere, nalaliitsangakhwo kata okhunywa eshindu tawe. Mana Musa nahandika amakhuwa keindakano eyo, nende amalako ekhumi.
Musa akholomokha okhurula khushikulu
29 #
2 Abakor. 3:7-16
Olwa Musa yeekha okhurula khushikulu shia Sinai nende amachina kabili kalikhwo amalako, obwenibwe bwali nibung'inang'inanga shinga eshiho, shichila yali naboolilenje nende OMWAMI Nyasaye. Nebutswa ye mwene shiyamanya mbu, obwenibwe bwali nibung'inang'inanga tawe. 30Olwa Haroni nende abandu bandi balola obweni bwa Musa nibung'inang'inanga, baria okhusita hambi ninaye. 31Kho Musa nabalanga. Naye Haroni nende abemilisi boosi nibatsia ewa yali mana Musa naboola ninabo. 32Olwa Musa yali namalile okhuboola nende Haroni nende abemilisi babandu ba Isiraeli, abandu ba Isiraeli bakhung'anila aha yali, ne naye nabaheelesia amalako koosi aka OMWAMI Nyasaye yali namuhelesiye nali khushikulu shia Sinai. 33Olwa Musa yali namalile okhuboola nende abandu abo, yamala niyefwimba olububi mumoni. 34Buli lwosi olwa Musa yatsitsanga mwiheema Litakatifu okhuboola nende OMWAMI Nyasaye, yamalanga yefwimbula olububi olwo, okhuula khubise bia yarulilangamwo, nolwa yefwimbanga khandi. Olwa yarulanga elwanyi, yaboolelanga abandu ba Isiraeli amakhuwa koosi akaba nalachilwe okhubaboolela.
35Abandu balolanga obweni bwa Musa nibung'inang'ina. Kho yamalanga yefwimba olububi, okhuula olwa atsia okhuboola nende OMWAMI Nyasaye khandi.
Currently Selected:
OKHURULA 34: OLUPR
Highlight
Copy
Compare
Share
Want to have your highlights saved across all your devices? Sign up or sign in
