OKHURULA 33
33
OMWAMI Nyasaye alachilisia abandu ba Isiraeli okhusumukha okhurula khushikulu shia Zayuni
1 #
Obucha. 12:7;
Obucha. 26:3;
Obucha. 28:13
OMWAMI Nyasaye naboolela Musa ari, “Iwe nende abandu bawarusiye Misiri, murule hano mutsiililile noluchendo lwokhutsia mushialo shia ndalaka okhuhelesia Aburahamu, Isaka, Yakobo halala nende abandu boluyia lwabwe. 2Nditsa okhuruma omumalaika wanje naye alabemilila injila. Okhumeetakhwako, ndalalonda Abakanani, Abamori, Abahiti Abaperisi, Abahiwi ti nende Abayebusi. 3Tsia mushialo eshiyinda khandi eshinulu, Nebutswa khulwa okhubela mbu muli abandu abomilanu. Isie mwene shinditsa okhutsia ninenywe tawe, shichila muli abandu abomilanu, ndakhamumululila khunjila.”
4Ne olwa abandu bahulila amakhuwa ako, bachaaka okhwikhuula ne shibakalushila okhufwala ebitati tawe. 5Abandu bekhuula shichila OMWAMI Nyasaye yali naboolele Musa ababoolele ari “Muli abandu abomilanu. Nindakhatsiakhwo hatutu butswa ninenywe hatutu butswa ndakhamumulula mwesi pe. Bulaano, murusie ebimili bienywe mana nditsa okhulola eshia emukholela.” 6Kho olwa abandu abo barula khushikulu shia Zayuni shibayefwalakhwo ebimili khandi tawe.
Liheema liokhubaho okhwa OMWAMI Nyasaye
7Olwa abandu ba Isiraeli basimikhanga ikambi, Musa yabukulanga liheema alisumikha ehalekhwo nende ikambi. Yamala nalikulikha mbu liheema liokhubaho okhwa OMWAMI Nyasaye. Ne omundu yesi owenyanga okhwakaana nende OMWAMI Nyasaye yatsitsanga ebweneyo. 8Ne olwa Musa yarulanga natsia mwiheema liokhubaho okhwa OMWAMI Nyasaye, buli mundu yarulanga asinjila mumuliango kweliheemalie mana ahenga ewa Musa atsitsanga okhuula. Olwa yolanga mwiheema nabo bakalukha mumaheema kabwe. 9Olwa Musa yenjilanga mwiheema, lileesi liekhanga okhurula mwikulu ne liema hamuliango weliheema mana OMWAMI Nyasaye aboola nende Musa nali mwileesi elo. 10Nabo olwa abandu balolanga lileesi hamuliango weliheema benaminjia emirwe chiabwe hasi. 11Naye OMWAMI Nyasaye yamalanga aboola nende Musa moni namoni, shinga omundu aboolanga nomwitsawe. Kho Musa yamalanga akalukha mukambi nebutswa omusoolili mbu Yoshwa wa Nuni owalinji omukhonyi wa Musa shiyarulanga mwiheema elo tawe. Yatong'angamwo okhuliliinda.
OMWAMI Nyasaye asuubia okhuba nabandube
12Musa yaboolela OMWAMI Nyasaye ari, “Wambelesia abandubo bano mbu, ebemilile okhutsia mushialo shia wasuubisia. Nebutswa shiwamboolelakhwo mbu ndalakhonyananga nende wiina kata noba niwamanya obulayi khandi niwanjama. 13Bulaano noba niwaheela umanyiekhwo shinga olwa otsia okhukhola abandubo ba waahula bano kho mana ekhukholele emilimo nekhuchamisia.”
14OMWAMI Nyasaye namukalusia ari, “Ndalatsia ninenywe khandi ndalamuhelesinjia obuhuli.”
15Naye Musa namukalusia ari, “Shiolakhufuchilila okhurula hano nolatsia ninefwe tawe. 16Iwe nolatsia ninefwe ta, abandu nibakhamanye barie mbu, wachama abandubo khandi mbu, wanjama isie? Okhuba khukhwo halala ninefwe khulakhwahukhasia ifwe nende abandu bandi.”
17OMWAMI Nyasaye nakalusia Musa ari, “Ndalatsia ninenywe shinga olwa oreebile, shichila isie ndakhumanya obulayi khandi unjamisinjia.”
18Kho Musa namuboolela ari, “Ekhusaaya mbu, umanyiekhwo okhung'inang'ina khwokhubahokhwo.”
19 #
Abaro. 9:15
Mana OMWAMI Nyasaye namukalusia ari, “Ndalakhumanyia obukhongo bwanje khulwa okhubura imbeliwo nerumbula eliira lianje litakatifu. Isie nisie OMWAMI Nyasaye, ne ehelesinjia obukoosia nende tsimbabasi abandaahula. 20Shindalakhufuchilila mbu, undole obweni ta, shichila abulaho omundu owandola obweni mana nabaho omulamu.” 21Nebutswa, sinjila khulwanda luli ahambi ninasi luno. 22Olwa oluyali lwanje lulaba nilubiranga, ndalakhufisa mumbangatsi yelichina mana ekhufunishe obweni nomukhono kwanje okhuula olwa ndalaba nemburire. 23Nindakhabira, ndarusia omukhono kwanje okhurula khubwenibwo mana iwe undole omukongo kwonyene obweni tawe.
Currently Selected:
OKHURULA 33: OLUPR
Highlight
Copy
Compare
Share
Want to have your highlights saved across all your devices? Sign up or sign in
