OKHURULA 35
35
Amalako kokhulinda Isabato
1Musa yalanga aboluyia lwa Isiraeli boosi, ne nababoolela ari, “Kano niko aka OMWAMI Nyasaye yalachilisia mbu mukhole. 2#Okhur. 20:8-11; 23:12; 31:15; 34:21; Abal. 23:3; Okhuk. 5:12-14Mukholenje emilimo tsinyanga tsisasaba. Nebutswa inyanga yomusaafu, neinyanga indakatifu eyahulilwa OMWAMI Nyasaye. Omundu yesi yesi oukhola omulimo kwosi kwosi khunyanga eyo okhuula yerwe. 3Shimulabwanekhwo omulilo mutsinzu tsienywe khunyanga ya Isabato tawe.”
Ebihaanwa khulwa liheema litakatifu
(Okhur. 25:1-9)
4Musa naboolela abandu ba Isiraeli abali nibakhung'anile halala ari, “Kano niko aka OMWAMI Nyasaye alachilisiye mbu, 5omundu yesi yesi owomwoyokwe kwihulila okhuhaanila eshihaanwa, areere itsahabu, ifetsa, noho omukasa, 6tsingubo tsieikitani, obwoya bwobukondo bwa buluu, obweisambarao nende obwakhanyu, nende ingubo eyikaasibwe okhurula khubwoya bweimbusi. 7Liselo lielikondi eliabakhwa iranji inzakhanyu. Liseelo lieimbusi linyushe, tsimbao tsiomupeli, 8amafura keitaha, amalesi akokhukaasia amafura kokhutsushilila nende obubane bweshing'ari eshilayi. 9Amachina akobukusi nende amachina kandi akokhurebwa khufodi, nende ingubo yokhushilifu shiomwisaaliisi mukhulundu.”
Ebindu biokhumbakha liheema liokhubaho okhwa OMWAMI Nyasaye
(Okhur. 39:32-43)
10“Abandu abasitsa boosi abali mwinywe bakhoyile okhwihaana bakaasie buli shindu eshia OMWAMI Nyasaye alalaka. 11Liheema, eshifuunikho shialio ebitiili, ebitiisi, tsisheti, tsisiilo, nende bichibi bialio. 12Lisanduku liamalako, tsinyanzo tsialio, eshifuunikho shialio nende ingubo ishinga yokhushinga habundu hatakatifu. 13Imeesa nende tsinyanzo tsiayo nende ebindu biayo biosi nende emikaate chiokhuhaanila OMWAMI Nyasaye. 14Eshichibi shieitaha nende tsindambi tsiayo, tsitaha nende amafura katsio, 15eshimalilo shiemisango shiokhusambilakhwo obubane nende tsinyanzo tsiashio, amafura kokhutsushilila, obubane bweshing'ari eshilayi nende ingubo ishinga yomumuliango kwokhwinjila mwiheema elia OMWAMI Nyasaye. 16Eshimalilo shiemisango shiokhusambilakhwo emisango emisambe, nende eshitalatalilo shiomukasa shiashio nishiliimaasiibwekhwo, tsinyanzo tsiashio, nende ebindu biashio biosi. Eshikaye shiashio shiokhusaaba, halala nend eshichi shiashio. 17Tsingubo tsishinga tsiomuliango kwomulwanyi, tsisiilo tsiatsio, ebichibi biatsio, nende ingubo ishinga yomumuliango kwokhwinjila mulwanyi lweliheema. 18Ebibambo bieliheema nende ebiolukaka lwokhubotokhana liheema halala nende emikoye chiabio, 19nende tsingubo tsindayi tsiabesaaliisi bakhoyile okhwufwala olwa baba nibeetsa okhukhalabana emilimo habundu hanje hatakatifu. Tsingubo etsio netsia Haroni nende abaanabe.”
Abandu bareera ebihaanwa biabwe
20Abandu bali nibakhung'anile bamala nibasalaana okhurula ewa Musa yali nibenyokha. 21Mana buli mundu owehulila okhuhaana eshindu yareerera OMWAMI Nyasaye eshihaanwa khulwa okhukaasia liheema liokhubaho okhwa OMWAMI Nyasaye. Mana nibareera buli shindu eshiali nishienyilwe khulwa okhwikhoonyelwa mukhwinamila Nyasaye okhunaba nende khulwa tsingubo tsiobwisaaliisi. 22Abandu boosi abehulila okhuhaanila OMWAMI Nyasaye eshihaanwa, abasaatsa halala nende abakhasi, bareera bikwasi, ebitaati, tsinyolo tsiomwikosi nende buli shindu eshiakaasibwa okhurula khutsahabu nibahaanila OMWAMI Nyasaye. 23Omundu yesi owalikhwo neingubo yeikitani inyushe, obwoya bwobukondo bwa buluu, noho obweisambarao noho obwakhanyu, kata owalikhwo nende ingubo yakaasibwa okhurula khubwoya bweimbusi, liseelo lielikondi eliabakhwakhwo iranji inzakhanyu, noho liseelo linyushe, babireera biosi. 24Buli mundu owalikhwo neifetsa, omukasa yabireera shinga eshihaanwa khu OMWAMI Nyasaye. Kata abali netsimbao tsiomusaala kwomupeli etsiakhanyalile okhwikhoonyelwa batsireera. 25Nabo abakhasi abasitsa bokhunaba tsingubo bareera obuusi bweikitani, nende obuusi obwabaswa okhurula khubwoya bwabuluu, obwakhanyu, obweisambarao, nende bwakhanyu, obwa bali nibabasa. 26Khandi abakhasi abasitsa bokhunaba abo babasa obuusi okhurula khu bwoya bwetsimbusi. 27Abemilisi nabo bareera amachina keishohamu nende amachina kokhurebwa khufodi nende akokhurebwa khungubo yokhushilifu, 28nende amalesi keshing'ari eshilayi, amafura ketsitaha, amafura kokhutsushilila nende amafura khulwobubane bweshing'ari eshilayi. 29Abandu ba Isiraeli boosi abehulila okhuhaana eshindu, bareera ebindu biosi ebia Musa yali nabalachile okhureera.
Abandu bokhukaasia liheema Litakatifu
(Okhur. 31:1-11)
30Mana Musa naboolela abandu ba Isiraeli ari, “OMWAMI Nyasaye yahuule Bezaleli omusiani wa Uri, omwitsukhulu wa Huri, owomuluyia lwa Yuda. 31Nyasaye yara mu Bezaleli Rohowe, khandi yamuhelesia obusitsa, obumanyilisi bwobubaatsi bwebindu biosi. 32Khandi yamuhelesia obusitsa bwokhuyaba itsahabu, ifetsa nende omukasa. 33Yamuhelesia obusitsa bwokhubaatsa amachina akokhurebwa khushindu shiosi shiosi, okhubaatsa emisaala, nende okhukhola emilimo chiobusitsa echiahukhaane. 34Khandi OMWAMI Nyasaye yahelesia Bezaleli nende Oholiabu omwana wa Alisamaki owoluyia lwa Dani omwoyo kwokhwechesia abashiabwe bandi obubaatsi bwobusitsa. 35OMWAMI Nyasaye yahelesi abandu babili abo obusitsa bwokhukhola emilimo chiobubaatsi, obulushi, obunabi bwamang'ole ketsingubo tsia isambarao, etsia buluu, tsinzakhanyu nende obunabi bweingubo yindi yoosi yosi.
Currently Selected:
OKHURULA 35: OLUPR
Highlight
Copy
Compare
Share
Want to have your highlights saved across all your devices? Sign up or sign in
