OKHURULA 28
28
Ebifwalo biabesaaliisi
(Okhur. 39:1-7)
1“Langa omusiani wenywe Haroni nende abasianibe: Nadabu, Abihu, Eleazari nende Itsumari, betse aha oli, barule mubandu ba Isiraeli mbu, baakhalabanile isie shinga abesaaliisi. 2Okaasilie omusiani wenywe Haroni ebifwalo ebitakatifu, khulwa oluyali nende ing'oono. 3Nawe oboolele abandu bobusitsa, aba ndahelesia obuchesi, ne obaboolele bakaasilie Haroni ebifwalo, ebialakholelanga emilimo chiobwisaaliisi niyefwalile, mana yahulwe okhuba omukhalabani wanje. 4Obaboolele bakaasie ingubo yokhushilifu, ifodi, ikanzu, likoti, eshilemba, nende omushipi. Bakaasilie omusiani wenywe halala nende abasianibe, ebifwalo biobwisaaliisi kho mbu, baakhalabanilenje isie shinga abesaaliisi. 5Abandu abasitsa abo banabe tsingubo etsio okhurula khwichoora lia buluu, elieisambarao, eliakhanyu, obuusi bweitsahabu nende okhurula khwichoora lieikitani inyushe.
6“Banabe ifodi yobuusi bwobukondo bweitsahabu, obwa buluu, bweisambarao, okhurula khubwoya obwakhanyu nende okhurula khungubo yeikitani inyushe. Ifoti eyo ying'oonwekhwo obuusi obulayi. 7Yibekhwo emikoye chibili chiokhumabeka, echia yinyala okhubohelwa. 8Omushipi okuukaasiibwe obulayi bwene, okhurula khwichoora elala elo, kunabilwe khufoti eyo mana bikhole ingubo ndala. 9Obukule amachina kabili kobukusi, mana ohandichekhwo ameera ekhumi nakabili, akabaana ba Yakobo. 10Ohandiche khwichina elala ameera kasasaba khandi khulindi kasasaba. 11Okhaabe omusaari omusitsa mana asaare ameera kabaana ba Isiraeli khumachina kabili ako, mana abashekhwo itsahabu. 12Ore amachina kabili ako khumikoye chibili echieifodi echiokhumabeka echio, kabe eshitsulilo khulwa abaana ba Isiraeli. Khandi Haroni yesi olwa yetsa imbeli wanje, achinjenje amachina ako khumabekake kho mbu, isie OMWAMI Nyasaye nditsulilenje abandu banje ba Isiraeli. 13Okaasie ebitiili bieitsahabu bibili, 14nende tsinyolo tsieitsahabu inzeleleshe tsibili, etsiboroolwe shinga emikoye, mana ore tsinyolo etsio khubitiili ebio.
Ingubo yokhushilifu
(Okhur. 39:8-21)
15“Okaasie ingubo eyokhwifwala khushilifu, eya Omwisaaliisi Omukhulundu alekhoonyelanga khulwa okhumanya aka Nyasaye yeenya. Ingubo eyo yikaasibwe okhurula khwichoora elala tsana elia ifodi yakaasibwakhwo, khandi ing'oonwe shinga olwa ifodi eyo yang'oonwa nende obuusi obulayi. 16Ingubo yokhuhilifu eyo yibe yoburambi nende obuchiikha obuhela bwetsisendimita amakhumi kabili natsibili. 17Okaasiekhwo emikhoosi chine chiamachina kobukusi. Omukhoosi kwambeli kubekhwo lichina lia akiki, elia topazi nende lialumasi eliakhanyu. 18Omukhoosi kwakhabili kubekhwo lichina lia zumaridi, elia yohari nende lialumasi. 19Omukhoosi kwakhataru kubekhwo lichina lia yasinzo, liakiki nende liametsisito. 20Ne omukhoosi kwakhane, kubekhwo elia zabarajadi, elia shohamu nende elia yasipi. Amachina kobukusi ako koosi okahandiekhwo niwikhoonyela itsahabu. 21Buli lichina khumachina ekhumi nakabili ako, lisaarungwekhwo eliira elala elala, mana kabe ekhumi nakabili khulwa tsimbia ekhumi natsibili tsia Isiraeli. 22Okaasie tsinyolo okhurula khutsahabu inzeleleshe, otsiborole mana otsire kungubo yokhushilifu eyo. 23Okaasie tsingaka tsibili tsietsahabu mana otsire buli ndala khukoona tsibili tsieikulu, etsieingubo yokhushilifu eyo, 24mana obohe tsinyolo tsibili etsio khungaka tsibili etsio. 25Tsindulo tsibili tsiolunyolo lweitsahabu olwo, otsibohe imbeli khumikoye chibili echieingubo yokhumabeka eyo. 26Mana okaasie tsingaka tsibili tsieitsahabu tsitiile hasi wetsikoona tsibili mukari weifodi eyo. 27Okaasie khandi tsingaka tsindi tsieitsahabu tsibili mana ohandie emwalo wemikoye chiamabeka keifodi, ahambi nende aha yonjelwa, hekulu womushipi kweifodi. 28Obohe tsingaka tsiokhushilifu etsio khungaka tsieifodi nomushipi kwa buluu, mana ingubo yokhushilifu eyo iyeeshe ahambi khumushipi, kho mbu, yileshe okhulekhana nende ifodi eyo.
29“Buli olwa Haroni yenjila habundu Hatakatifu, abetsenje niyefwalile inguboye eya khushilifu, eyilikhwo ameera kabandu betsimbia tsia Isiraeli, mana isie OMWAMI Nyasaye, ndalabetsulilanga. 30#Obub. 27:21; Okhuk. 33:8; Ezira 2:63; Neh. 7:65Ore khunguboye eyo amachina ka Urimu nende Tsumimu#28:30 Urimu nende Tsumimu: eshisina shiameera kano muluheburania ni, amachina akabesaaliisi bekhoonyelanga okhumanya akokhwenya okhwa OMWAMI Nyasaye. kabetsenje khushilifu shia Haroni olwa yenjila mwiheema lianje. Khulweshio, Haroni alachinganga obukhalachi bweshiina shiabandu ba Isiraeli mumwoyokwe buli nyanga.
Ebifwalo bindi biobwisaaliisi
(Okhur. 39:22-31)
31“Ikanzu eyilabetsanga emwalo weifodi eyo yibe eya buluu. 32Ingubo eyo ibekhwo induu yokhufwalamwo omurwe hakari wayo. Ingubo yokhushilifu yeitsahabu eyo yibotokhasibwe khunduu eyo, mana likosi lieingubo eyo lileshe okhurandukha. 33#Sira 45:9Mana khundulo weingubo eyo hasi wayo, banabilekhwo amakomamanga ka buluu, akeisambarao nende amakhanyu. Khandi ebikhuli bieitsahabu bibohwe hakari kari wamakomamanga ako okhuchibotokhana. 34Banabile ebikhuli bieitsahabu khundulo weingubo eyo okhubotokhasia yoosi pe. 35Haroni alefwalanga eshifwalo eshio olwa aba niyaakhalabanila habundu hatakatifu kho mbu, aleshe okhufwa.
36“Okaasie isahani yeitsahabu inzeleleshe, eyahandikwakhwo mbu, ‘Omwahule owa OMWAMI Nyasaye’ 37Obohe isahani eyo khushilemba, imbeli washio nende omukoye kwa buluu. 38Mana shibe khubweni bwa Haroni olwa aba nashiifwalile kho mbu, isie OMWAMI Nyasaye efuchilile emisango chiabandu ba Isiraeli baakholela isie.
39“Munabe likoti lieikitani inyushe, nende omushipi okung'oolilwekhwo obuusi obulayi.
40“Khandi munabile abaana ba Haroni boosi amakoti, emishipi nende tsikofia, ebiokhubahelesia oluyali. 41Ofwale omusiani wenywe Haroni, halala nende abasianibe tsingubo etsio. Mana obaahule khulwa okhubatsushililakhwo amafura akomutseituni kho mbu, baakhalabanile shinga abesaaliisi. 42Khandi obanabile tsingubo tsinyimbichiti etsieikitani, etsiokhubafuunikha okhurula mubishishienje okhuula khumarango kho mbu, baleshe okhulolesia eshiechenye shiabwe. 43Okhuula Haroni nende abasianibe befwalenje tsingubo etsio buli olwa batsia mwiheema liokhubaho khwanje, noho olwa baba nibatsia okhukhalabana shinga abesaaliisi khushimalilo eshiemisango Habundu Hatakatifu, kho mbu, baleshe okhwirwa khulwa okhumanyia eshiechenye shiabwe. Lino ni lilako elia Haroni nende abolwibulwe balalindanga okhuula inziayo.
Currently Selected:
OKHURULA 28: OLUPR
Highlight
Copy
Compare
Share
Want to have your highlights saved across all your devices? Sign up or sign in
