OKHURULA 27

Eshimalilo Shiemisango

(Okhur. 38:1-7)

1“Okaasie eshimalilo shiemisango okhurula kumusaala kwomupeli. Obubambalifu nende obuchiikha bwashio bube tsimita tsibili nende tsisendimita amakhumi kabili, nabwo oburambi bwashio bube imita ndala nende tsisendimita amakhumi kataru. 2Orekhwo tsinzika khutsimbeka tsiashio tsine. Tsinzika tsine etsio tsibe eshindu shilala nende eshimalilo shiemisango eshio, mana shiosio shibakhwekhwo omukasa. 3Oshikaasilie tsinyungu tsiokhuramwo likoshe, amapakiyo, tsingaraya, amahana kokhutiilila omulilo nende ebikaye biokhurakhwo omulilo. Ebindu ebio biosi bikaasibwe okhurula khumukasa. 4Khandi okaasie eshitalatalilo shietsiseng'enge okhurula khumukasa mana ore khutsikoona tsiashio tsingara tsine tsiokhushichinga, etsiakaasibwa okhurula khumukasa. Ore tsingara tsine etsio khutsikoona tsiashio tsine. 5Ore eshitalatalilo eshio hasi wolulika lweshimalilo shiemisango eshio kho mbu, shinyale okhuula hakari weshimalilo shiemisango eshio okhurula hekulu washio. 6Okaasie tsinyanzo tsiokhuchinga eshimalilo shiemisango okhurula khumusaala kwomupeli mana otsibashekhwo omukasa, 7khandi olweshimalilo shiemisango eshio shiba nishichingwa, winjisie tsinyanzo etsio mutsingara, etsili khubuli olubeka lwashio, buli olwanzo lulala mutsingara ndala. 8Oshikaasie mukari mwashio mube muukhaya shinga olwa ekhumanyiye khushikulu khuno.

Olukaka lweliheema Litakatifu

(Okhur. 38:9-20)

9“Okaasie olukaka lwokhubotokhana olwanyi lweliheema litakatifu. Olukaka olwo lurebwekhwo tsingubo tsishinga tsinyushe etsieikitani. Khulubeka lwemulambo, tsingubo tsishinga etsio tsibe etsioburambi obuhela tsimita amakhumi kane natsine, 10ne tsingubo etsio tsibohwe khubitsiisi biemikasa amakhumi kabili nibikhasiibwe khubichibi amakhumi kabili ebiakaasibwa okhurula khumukasa. Nebutswa ebifuulwa biatsio nende tsinyanzo tsiatsi bikaasibwe okhurula khufetsa. 11Khandi mukhole murio khulubeka lwemasaba lwosi. 12Ne khulubeka lwa Mumbo, mureyo tsingubo tsishinga etsioburambi obuhela tsimita amakhumi kabili natsibili, nende eebitiisi ekhumi nende ebichibi ekhumi. 13Khulubeka lwebukwe, ewobwinjililo buli, olukaka olwo lube lwosi lwobuchiika obuhela khandi tsimita amakhumi kabili natsibili. 14Ingubo ishinga yokhulubeka lwobwinjililo yibe eyihela tsimita tsisasaba nende tsisendimita amakhumi kasasaba nende ebitiisi biokhuchitiililila bitaru nende ebichibi bitaru. 15Ne khulubeka lundi lwobwinjililo olwo, ingubo eyo khandi yibe eyihela tsimita tsitaru nende ebitiisi biokhuchitiililila bitaru nende ebichibi bitaru. 16Ne khulwobwinjililo bwomulwanyi lwene, ingubo ishinga inyushe yeikitani yibeyo eyihela tsimita shienda, eyalushilwamwo obuusi bwobukondo bwa buluu, obweisambarao nende obwakhanyu, khandi yibe niyang'oonwakhwo obuusi obulayi. Ingubo eyo yitiilililwe hekulu nende tsisiilo tsine khubichibi bine. 17Tsisiilo tsiosi etsiokhulukaka lwosi tsiliimaasibwe nende tsinyanzo tsiakaasibwa okhurula khu fetsa, nabio ebitiili bibe ebiakaasibwa okhurula khu fetsa ne ebichibi biabio bibe ebiakaasibwa okhurula khumukasa. 18Oburambi bwolukaka olwo lwosi bube tsimita amakhumi kane natsine, obubambalifu tsimita amakhumi kabili natsibili nabwo obwiyinikhu bwalwo bube tsimita tsibili nende tsisendimita amakhumi kabili. Tsingubo tsishinga tsiakhwo tsibe etsiakaasibwa okhurula khubuusi obunyushe bweikitani, nabio ebichibi bibe ebiakaasibwa okhurula khumukasa. 19Ebindu biosi ebiomwiheema nende ebibambo bialio biosi kata ebibambo biolukaka biosi, bibe ebiakaasibwa okhurula khumukasa.

Obulindwi bweitaha

(Abal. 24:1-4)

20“Olachilisie abandu ba Isiraeli bakhureerere amafura kemitseituni ameeleleshe amalayi khulweitaha, kho mbu, itaha yashenje buli khungoloobe. 21Haroni nende abasianibe nibo abalachihafinjia elwanyi weingubo ishinga eyili imbeli weliheema Litakatifu, mana yakha okhuchaaka khungolobe okhuula mumamwibwi. Abandu ba Isiraeli boosi balinde lilako lino emiyika chiosi munzibulo tsiabwe tsiosi.

Currently Selected:

OKHURULA 27: OLUPR

Highlight

Copy

Compare