OKHURULA 29
29
Amalako kokhwahula Haroni nende abaanabe okhuba abesaaliisi
1“Kano Niko aka olakholela Haroni nende abaanabe khulwa okhubaahula kho mbu, babe abesaaliisi khulwa okhuukhalabanila. Obukule ihunwa ndala nende amamiiku kabili. Emiruko echio chiosi chibe echibulamwo obulema bwosi bwosi. 2Wikhoonyele obusie obunyushe bweingano okhuteekha emikaate, habula shichilabamwo limela ta, ne echindi ochiteeshele amafura kemitseituni nachio echindi shiolachitekha namafura tawe. Khandi ochikaasie echifwana shinga ebisikuti ebibashilwekhwo amafura. 3Obire mushimwelo ochinjilemwo. Mana obukule ihunwa eyo nende amamiiku kabili ako undeerere halala nende ebindu bindi ebio khulwa okhukholela omusango.
4“Oreere Haroni nende abasianibe hamuliango weliheema liokhubaho khwanje mana obaboolele besinje khulwokhwisiiya. 5Olunyuma ofwale Haroni tsingubo tsiobwisaaliisi. Etsiatsana nzietsino: likoti, ikanzu, ifodi nende ingubo yokhushilifu. Mana omubohe omushipi kwobwisaaliisi. 6Omufwale eshilemba khumurwe. Ne oboyekhwo olusimbi olutakatifu olwahandikwakhwo mbu, “Omwahule owa OMWAMI Nyasaye.” 7Mana obukule amafura amatakatifu kokhutsushilila, omutsushilile khumurwekwe abe omwahule.
8“Oreere abaanabe boosi mana obafwale amakoti, 9obabohe emishipi mubishienje biabwe khandi abafwale tsikofia khumirwe chiabwe. Nolwa olaahula Haroni nende abasianibe orio. Bo nende abolwibulo lwabwe balaakhalabanila isie shinga abesaaliisi inziayo.
10“Oreere ihunwa imbeli weliheema litakatifu mana oboolele Haroni nende abasianibe bachitiile omurwe. 11Osinzile ihunwa eyo hamuliango weliheema litakatifu. 12Okhombolekhwo amalasile keihunwa ako nolwalalwo mana obashe khutsinzika tsieshimalilo shiemisango eshio. Ne akatong'a okasundule hasi weshimalilo shiemisango. 13Olunyuma obukule amasinya koosi kafuunikhanga ebindu biomunda biosi ebuleka indayi weshitakhaliira, nende tsifuko, mana obisambile khushimalilo shiemisango. 14Nebutswa inyama yeihunwa eyo, liseelo liayo nende ebiomunda biayo obisambile elwanyi wekambi. Okwo nomusango kwokhuyiniaho obwonooni bwabesaaliisi.
15“Obukule limiiku elala ne oboolele Haroni nende abaanabe balitiile khumurwe. 16Olisinze mana obukule amalasile kalio omiitse khumbeka tsieshimalilo shiemisango tsiosi tsine. 17Okhalachemwo limiiku elo ebitonye ebitonye. Wosie ebiomunda bialio nende ebiatakho bialio, mana obire khushimalilo shiemisango biosi halala nende omurwe kwalio. 18#Abaef. 5:2; Abafil 4:18Osambe limiiku elo liosi khushimalilo shiemisango kho mbu, uhaanile isie omusango omusambe. Isaakakha yomusango omusambe injamisinjia.
19“Obukule limiiku lindi elo mana oboolele Haroni nende abaanabe batiile emikhono chiabwe khumurwe kwalio. 20Olisinze mana obukulekhwo khumalasile kalio, obashe khubutsunzu bweshirwi shiomukhono musaatsa shia Haroni nende abasianibe, khutsinzala tsikhongo tsiemikhono chiabwe emisaatsa nende khutsinzala tsikhongo tsiebilenje biabwe biomukhono musaatsa. Amalasile kaba nikatoonyile okamiitse khutsimbeka tsieshimalilo shiemisango tsiosi tsine. 21Obukule amalasile kali khushimalilo shiemisango otsokasiemwo amafura mana okamiitse khu Haroni, khutsingubotsie nende khubasianibe halala nende khutsingubo tsiabwe. Haroni, abasianibe nende tsingubo tsiabwe balaba nibaahulwe khulwa okhuukhalabanila isie.
22“Otete orusiekhwo amasinya kelimiiku elo, omusembe, amasinya kabetsanga khubiomunda, abuleka indayi weshitakhaliira, tsifuko tsiosi tsibili halala nende amasinya katsio nende eshiatakho shiomukhono musaatsa (Ebiene ebio, nebiokhwahula abesaaliisi). 23Obukule omukaate mulala, eliandasi elala eliatekhwa namafura, eshisikuti eshibulamwo limela nende omukaate mulala okulaakasilibwamwo amafura kemitseituni ta, obirusie mushimwelo shia baahaaniile eshio. 24Obire biosi mumakhono ka Haroni nende akabaanabe boosi mana obaboolele babiahule, bibe ebiahule bianje shinga eshihaanwa shianje eshilobole. 25Olunyuma obibukule okhurula khubo, mana obisambile khushimalilo shiemisango, khwikulu khwemisango emisambe bibe shinga omusango kwanje omusambe. Isakakha yomusango kuno, injamisinjia muno.
26“Obukule itakata yelimiiku elo mana ochiahule yibe eshihaanwa shianje eshilobole.
27“Olwa omwisaaliisi yaahulwa, obukule itakata nende eshiatakho shielimiiku liokhwikhoonyelwa khulwa okhwahula abesaaliisi, mana obiahule bibe eshihaanwa shianje eshilobole, biahulwe khulwa abelsaaliisi. 28Buli lwosi olwa abandu ba Isiraeli bakhola omusango kwokhureera omulembe, itakata yelimiiku nende eshiatakho shialio bilabetsanga ebiabesaaliisi. Eshio shilabetsanga eshihaanwa eshiabandu khwisie OMWAMI Nyasaye.
29“Olwa Haroni alifwa, ebifwalo biobwisaaliisibwe bilihelesibwa abaanabe khulwa okhubifwala olwa baliba nibaahulungwa okhuba abesaaliisi. 30Omusiani oulikalukha mubwisaaliisi mushilenje shia Haroni, olwa aba niyetsa mwiheema liokhubaho khwanje khulwa okhukhalabana Habundu Hatakatifu, okhuula yefwale tsingubo etsio khulwa tsinyanga musaafu.
31“Obukule inyama yelimiiku yikholeelwe omusango kwokhwahula abesaaliisi eyo mana ochiteeshele habundu hatakatifu. 32Bakhoyile okhuliila inyama eyo habwinjililo bweliheema liokhubaho khwanje. Bachilie halala nende emikaate chiba nichitoonyile mushimwelo. 33Abesaaliisi balie ebindu biikhoonyeelwe mukhukhola omusango kwokhwahulwa khwabwe ebio. Abesaaliisi bonyene nibo abakhoyile okhulia ebindu ebio, okhuba nebitakatifu. 34Inyama yosi yosi noho omikaate nibiba nibitoong'a okhuula mukamba, okhuula bisambwe. Shibikhoyile okhuliibwa ta, shichila nebitakatifu.
35“Okhole emisango chiokhwahulwa khwa Haroni nende abaanabe okhuba abesaaliisi khulwa tsinyanga musaafu shinga olwa ekhulachile. 36Ne buli nyanga olahaanilanga ing'ombe ihunwa khulwa okhuukholela omusango, kho mbu, oleshelwe obwonoonibwo. Omusango okwo kulaba okwokhusiiya eshimalilo shiemisango. Khandi otsushilile amafura khushimalilo shiemisango eshio khulwa okhushikhola okhuba eshitakatifu. 37Okhole omusango kwokhutisa eshimalilo shiemisango eshio khulwa tsinyanga musaafu noshikhola okhuba eshitakatifu. Ne omundu yesi yesi noho eshindu shiosi shiosi esitilakhwo shilasalisibwa nobutakatifu bwashio.
Emisango chia buli nyanga
(Obub. 28:1-8)
38“Buli nyanga mutsinyanga etsiolunyuma tsiosi, osinzilenje khushimalilo shiemisango ebimeeme bibili ebiomuyika mulala khulwa okhukhola omusango. 39Osinze eshimeeme shilala mumabwibwi ne nashio eshindi oshisinze nibwakhela. 40Eshimeeme shiambeli oshihaanenje halala nende ikilo ndala yobusie bweingano obunyushe, nibutsokasibwemwo amafura ilita ndala. Musundulenje hasi ilita ndala yeidivai khulwomusango kwokhunywa. 41Khandi eshimeeme shiakhabili eshio oshihaanenje hangoloobe mana oshihaane halala nende ebiohaanile eshimeeme shiomumabwibwi eshio. 42Omusango kwokhusamba okwo kukholelungwe hamuliango heliheema liokhubaho khwanje emiyika chiosi. 43Habwene yabo niho aha ndalakaanilanga nende abandu ba Isiraeli, ne khandi oluyali lwokhubaho khwanje lulahakhola okhuba hatakatifu. 44Ndalakhola liheema nende eshimalilo shiemisango okhuba ebitakatifu, khandi ndalaahula Haroni nende abasianibe okhuukhalabanila shinga abesaaliisi. 45Ndalamenya hakari wabandu ba Isiraeli, khandi ndalaba Nyasaye wabwe. 46Ne nilwo olwa balamanya mbu, nisie OMWAMI Nyasaye wabwe, owabarusia mushialo shia Misiri kho mbu, emenye mubo. Nisie OMWAMI Nyasaye wabwe.
Currently Selected:
OKHURULA 29: OLUPR
Highlight
Copy
Compare
Share
Want to have your highlights saved across all your devices? Sign up or sign in
