OKHURULA 24
24
Okhusiiliisibwa khweindakano
1OMWAMI Nyasaye naboolela Musa ari, “Tikulukha witse khushikulu iwe, Haroni, Nadabu, Abihu nende abakofu ba Abaisiraeli amakhumi musaafu. Ne nimushili ehalekhwo, munzinamile. 2Iwe Musa wenyene, niwe ouletsa ewa endi, shioletsakhwo nomundu undi yesi yesi ahambi ninasi tawe. Ne abandu bandi ba Isiraeli shibakhoyile okhwitsa khushikulu shino tawe.”
3Mana Musa natsia naboolela abandu aka OMWAMI Nyasaye yali namulachile nende ameebaalo koosi, ne abandu nibakalusilia halala boosi nibaboola bari, “Khulakhola koosi aka OMWAMI Nyasaye akhulachile.” 4Mana Musa nahandika amalako koosi aka OMWAMI Nyasaye yali nabooleele. Ne mumabwibwi inyanga yalondakhwo, Musa yombakha eshimalilo shiemisango hashikulu niyekhoonyela amachina ekhumi nakabili. Buli elala mushilenje shia buli oluyia, khumbia ekhumi natsibili tsia Isiraeli. 5Kho naruma abaraaka, ne nabo nibakholela Nyasaye emisango emisambe nende chiokhureera omulembe nende echiokhukhupila Nyasaye orio. 6Naye Musa nabukula inusu yamalasile nara khushikaye, ne akali nikatoonyile namiitsa khushimalilo shiemisango. 7Kho nabukula eshitabu shiamalako aka OMWAMI Nyasaye ne nashisooma nomwoyo omukhongo. Nabo abandu nibakalusia bari, “Khulahulila nikhukhola koosi aka OMWAMI Nyasaye aboolile.”
8 #
Mat. 26:28; Mrk. 14:24; Luka 22:20; 1 Abakor. 11:25; Abaheb. 10:29;
Abaheb. 9:19,20 Mana Musa nabukula amalasile akali khushikaye ako nakamiitsa khubandu naboola ari, “Kano niko amalasile kasiiliisia indakano hakari wanje ninenywe khumakhuwa kamwakhetsuba ako.”
9Kho Musa, Haroni, Nadadu, Abihu nende abemilisi amakhumi musaafu ba Isiraeli abo nibatikulukha nibatsia khushikulu, 10ne nibalola Nyasaye wa Isiraeli. Ne hasi webilenjebie, eshindu shialiho eshifwana shinga obwelu obwakaasibwa okhurula khumachina keisapiri, akobukondo bweisambarao, nishifwana shinga likulu elibulakhwo amaleesi. 11Nyasaye shiyasaalisia abemilisi babandu ba Isiraeli abo tawe. Balola Nyasaye khandi nibalia nende okhunywa halala ninaye.
Musa nali khushikulu shia Sinai
12OMWAMI Nyasaye naboolela Musa ari, “Tikulukha witse khushikulu ewa endi, ne shinga lwolaba noli wendi yino, ndalakhuhelesia amachina kabili, akalikhwo amalako koosi akehandiiche khulwa ameebaalo khubandu banje.” 13Mana Musa nende omukhoonyiwe Yoshwa nibarula nibatikulukha khushikulu shia Nyasaye. 14Musa naboolela abemilisi ba bandu ba Isiraeli ari, “Mukhulinde mukambi muno okhuula olwa khuchelela. Haroni nende Huri balatong'a hano ninenywe. Omundu yesi yesi mwinywe nali nobuyingani hakariwe nende owashie, banyala okhuyila obuyingani bwabwe obwo khu Haroni nende Huri.”
15Mana Musa natikulukha natsia khushikulu shia Sinai ne amaleesi nikafuunikha eshikulu eshio. 16Oluyali olwa OMWAMI Nyasaye nilwikha khushikulu shia Sinai eshio, nalio lileesi nilishifuunikha khulwa tsinyanga tsisasaba. Khunyanga yomusaafu, OMWAMI Nyasaye nali hakari welileesi elo, yalanga Musa. 17Oluyali olwa OMWAMI Nyasaye lwalolekha imbeli wabandu ba Isiraeli shinga omulilo okwakhanga khubutenje bweshikulu eshio. 18#Okhuk. 9:9Naye Musa, niyenjila mwileesi elo, natikulukha khushikulu eshio. Kho namenya khushikulu eshio khulwa tsinyanga amakhumi kane, eshilo neshiteere.
Currently Selected:
OKHURULA 24: OLUPR
Highlight
Copy
Compare
Share
Want to have your highlights saved across all your devices? Sign up or sign in
