OKHURULA 25
25
Ebihaanwa khulwokhumbakha Liheema Litakatifu
(Okhur. 35:4-9)
1OMWAMI Nyasaye naboolela Musa ari, “Boolela abandu ba Isiraeli bandeerere ebihaanwa. 2Obukule eshindu eshiomundu yesi yesi achama okhuhaana nomwoyo omulekhuule. 3Ne ebihaanwa biokhoyile okhubukula okhurula khubo nibino; itsahabu, ifetsa nende omukasa. 4Tsingubo tsieikitani, etsia bulu, etsieisambarao, etsia ranzayi, itsieikitani indorotoro nende obwoya bwetsimbusi, 5amaseelo kamakondi, akabashilwe iranji inzakhanyu, amaseelo ketsimbusi, tsimbao tsiemisaala chiemipeli, 6amafura ketsitaha, amalesi khulwa okhukaasia amafura kokhutsushilila nende akokhukaasia obubane bweshing'ari eshilayi, 7amachina kobukusi, namachina kandi akokhura khufodi nende akokhura khushitsengwa shiokhushilifu shieiloloti yabesaaliisi abakhulundu. 8Khandi okhuula Abaisiraeli banzumbashile liheema litakatifu kho mbu, enyale okhumenya mubo. 9Okaasie liheema elo nende ebiokhuliumbakha okhulondana shinga olwa ndalakhumanyia.”
Lisanduku liamalako
(Okhur. 37:1-9)
10“Abaisiraeli bakaasie lisanduku liamalako okhurula kumbao tsiomupeli. Oburambi bube tsisendimita eshikhumi shilala nende ekhumi (110 cm), obuchiikha bube tsisendimita amakhumi kasasaba nende tsisasaba. Ne okhutsia yikulu, bwosi bube tsisendimita amakhumi kasasaba nende tsisasaba. 11Olibashe itsahabu inzeleleshe mukari mwalio, khwikulu walio nende khundulo walio khwosi. 12Olikaasilie tsingara tsine etsiokhulichinga okhurula khutsahabu inzeleleshe eyo, mana ore buli ingara ndala khwikuru, khumakhuru koosi kane. Tsingara tsibili tsibe khulubafu lwalio lulala ne natsio tsibili tsindi tsibe khulubeka lwalio lundi. 13Okaasie tsinyanzo tsiomupeli mana otsibashekhwo itsahabu. 14Khandi winjisie tsinyanzo etsio mutsingara etsili khubuli olubafu lwelisanduku elo khulwa okhulichinganga. 15Tsinyanzo etsio shitsikhoyile okhurusibwa mutsingara tsielisanduku etsio ta, tsilekhwe tsibemwo inziayo. 16Mana ore mwisanduku omwo amachina kabili akehandiichekhwo amalako ako.
17 #
Abaheb. 9:5
“Khandi okaasie eshifuunikho eshieitsahabu inzeleleshe, eshielisanduku elo, eshiobuburambi bwetsisendimita eshikhumi shilala nende ekhumi, ne obubambalifu bwashio bube tsisendimita amakhumi kasasaba nende tsisasaba. 18Mana okaasie abilonje bietsimbaha bibili nibihengaane okhurula khutsahabu eyiraanyilwe. 19Shilala khundulo welisanduku, ne eshindi khundulo ebuleka undi. Obihandie khushifuunikho kho mbu, bibe eshindu shilala neshifuunikho. 20Mana ebilonje bietsimbaha ebio bibambule tsimbaha tsiabio khwisanduku ikulu nitsifwimba eshifuunikho netsimbaha tsiabio etsio, nibihengaane. 21Ore amachina kabili akalikhwo amalako ako mwisanduku omwo mana ofuunishekhwo eshifuunikho eshio. 22Habwenaho niho aha ndalakaana ninawe, ne ikulu weshifuunikho eshio, hakari webilonje bietsimbaha ebio, niho aha ndalakhuhelesilia amalako kabandu ba Isiraeli.
Imesa yomukaate Omutakatifu kwokhuhaanila Nyasaye
(Okhur. 37:10-16)
23“Ne okaasie imesa okhurula khumusaala kwomupeli, eyoburambi buhela tsisendimita amakhumi munane namunane, obuchiikha bwayo bube obuhela tsisendimita amakhumi kane natsine, ne obwiyinikhu bwayo bube tsisendimita amakhumi kasasaba natsisasaba. 24Ochifuunishe nende itsahabu inzeleleshe, khandi ochibotokhasiekhwo itsahabu. 25Ochibotokhasiekhwo olubao lwobubambalifu obuhela tsisendimita amakhumi kasasaba natsisasaba, mana obotokhasie khululika lwalwo itsahabu inzeleleshe. 26Okaasie tsingara tsine tsieitsahabu mana ore buli ingara khutsimbeka tsine, etsiebilenje biayo bine bili. 27Tsingara tsiokhwinjisibwamwo tsinyanzo tsiokhuchinga imesa etsio tsirebwe ahambi nolubaho olubotokhasibwe olwo. 28Okaasie tsinyanzo tsiomusaala kwomupeli mana otsibashekhwo itsahabu. Tsinyanzo etsio nitsio etsilekhoonyelungwa okhuchinga imesa eyo. 29Okaasie tsisahani, nende ebikombe biokhura obubane khu mesa eyo, khandi okaasie tsinyungu nende ebikaye khulwomusango kwokhutsushililwa. Ebindu ebio biosi bikaasibwe okhurula khutsahabu inzeleleshe. 30#Abal. 24:5-8Orenjeshe imesa eyo imbeli welisanduku liamalako, ne emikaate emitakatifu chiokhuuhaanila isie okhuula chirebungwe khumesa okhwo buli lwosi.
Eshichibi shieitaha
(Okhur. 37:17-24)
31“Okaasie eshichibi shieitaha okhurula khutsahabu inzeleleshe. Oshikaasie hasi washio nende mumbafu washio okhurula khutsahabu eiyiraanyilwe. Khandi ebimuli biokhushing'ona, halala nende ebikombe biashio nende emikhono chiabio, biosi bikaasibwe okhurula khutsahabu eyiraanyilwe. 32Mana orekhwo emikhono chisasaba kho mbu, chitaru chibe khulubeka lulala, nachio chitaru chibe khulubeka lundi. 33Buli mulala kumikhono chisasaba echio, kukhoyile okhuba nende ebimuli bieing'ono indayi bitaru, ebifwana shinga eshimuli eshimulikha. 34Ne khumukhono kweshichibi eshio khwosi khube nende ebimuli bieing'ono indayi bine, ebifwana shinga eshimuli eshimulikha. 35Ne hasi wa buli omukhono, khumikhono chisasaba echio, eshimuli shibetsenjeho shilala shilala. 36Ebimuli ebio, emikhono nende eshichibi eshio bikhoyile okhukaasibwa okhurula khutsahabu inzeleleshe eyiraanyilwe. 37Mukaasie tsitaha musaafu mana mutsiachishe khubichibi kho mbu, tsiashenje nitsikhosia imbeli washio. 38Okaasie amahana kamanda, halala nende ebikaye biashio okhurula khutsahabu inzeleleshe. 39Wikhoonyele tsikilo amakhumi kataru natsirano tsieitsahabu inzeleleshe khulwa okhukaasia eshichibi shieitaha eshio nende ebindu biayo biosi. 40#Ebikh. 7:44; Abaheb. 8:5Oteeme olole mbu, okaasia ebindu ebio shinga olwa ekhumanyiye khushikulu.
Currently Selected:
OKHURULA 25: OLUPR
Highlight
Copy
Compare
Share
Want to have your highlights saved across all your devices? Sign up or sign in
