OKHURULA 16
16
Nyasaye yahana Imana nende tsisindu
1Abandu ba Isiraeli boosi bachaaka oluchendo okhurula Elimu nibatsia niboola mushitsiimi shia Sini shili, hakari wa Sinai nende Elimu, omwesi kwakhabili nikuli ekhumi nakharano. 2Kho mushitsiimi omwo, abandu ba Isiraeli boosi bachaaka okhwiyiniakanila Musa nende Haroni, 3nibaboolela Musa nende Haroni bari, “Bwakhabeele obulayi OMWAMI Nyasaye niyakhakhwiriire mushialo shia Misiri, okhushila okhukhurusiayo, ewa ifwe abeene khwaliitsanga ebiokhulia ebinji nikhwikura. Nibulayi shiina inywe okhukhurusiayo mana mwitse mukhwirire mushitsiimi muno neinzala.”
4 #
Obuch. 16:20-29; Yoh. 6:31 Naye OMWAMI Nyasaye naboolela Musa ari, “Ndalamukwisilia ebiokhulia okhurula mwikulu nibikwa shinga ifula. Buli mundu alatoolanga ebiokhulia ebimuyela okhulia buli nyanga. Ne ndalateema abandu ba Isiraeli endole nikakhaba mbu, banyala okhuliinda amalako kanje. 5Nebutswa khunyanga yakhasasaba, buli mundu alatoolanga ebiokhulia ebianyala okhulia khulwa tsinyanga tsibili.” 6Kho Musa nende Haroni nibaboolela abandu ba Isiraeli bari, “Inyanga yino nibwakheela, mulamanya mbu, tooto yabele OMWAMI Nyasaye owamurusiye mushialo shia Misiri. 7Mukamba namulole oluyali olwa OMWAMI Nyasaye. Yahuliile amakhuwa amabi kamwaboolile khuye. Olwa mukhwiyiniakananga, mubetsanga nimwiyiniakana OMWAMI Nyasaye, shichila ifwe khukholanga butswa aka OMWAMI Nyasaye akhulachilisiye okhukhola!” 8Mana Musa nababoolela ari, “OMWAMI Nyasaye alamuhelesinjia inyama eyimuhela buli khubwile nende emikaate echimuhela buli nibushia, shichila ahulile okhwiyiniakana khwenywe. Olwa mwiyiniakananga khwifwe, mubetsanga nimwiyiniakana khu MWAMI Nyasaye.”
9Musa naboolela Haroni ari, “Boolela abandu Abaisiraeli boosi bekhung'asie halala imbeli ewa OMWAMI Nyasaye, shichila ahuliile okhwiyinikana khwabwe.” 10Ne olwa Haroni yali nashiboolanga, abandu bahenga nashitsiimi, ne nibalola obulafu obwa OMWAMI Nyasaye nibubaloleshela mwileesi. 11Mana OMWAMI Nyasaye naboolela Musa ari, 12“Embuliile okhubuuluula okhwa Abaisiraeli. Obaboolele mbu, khubwile balanyoola inyama yokhulia, ne mukamba eshialo nibushietsanga, balanyoola emikaate chiokhulia. Ne balamanya mbu, isie OMWAMI Nyasaye nisie Nyasaye wabwe.”
13Olwa bwali nibwakheela, tsisindu tsinyinji tsietsa nitsiyeela mukambi ne nitsiama khwiloba liali mukambi liosi pe. Ne olwa bwashia, lime liali niliamile khwiloba liomukambi liosi. 14Kho olwa liime liali niliamile elo liakhamulukha, ebindu ebipapale, ebilafu khandi ebirerere shinga amachina keifula, biamala biloleshe khwiloba mushitsiimi. 15#1 Abakor. 10:3Olwa abandu ba Isiraeli babilola, bareebana abeene khu beene bari, “Bino nibindu shiina?” Shichila shibaali nibabimanyile tawe.
Musa nababoolela ari, “Bino nebiokhulia ebia OMWAMI Nyasaye amuhelesiye inywe okhulia. 16OMWAMI Nyasaye alachile mbu, buli mundu atoolenjekhwo ebiokhulia, ebia anyala okhulia yekure, mutoolenje ebihela indubi khubuli mundu, khubamwamenya ninabo.”
17Kho abandu ba Isiraeli nibatoola ebiokhulia ebio, abandi batoola ebinji, nabo abandi nibatoola bitiiti. 18#2 Abakor. 8:15Nebutswa olwa babichelaasia mundubi, banyoola mbu, shialikhwoho owali natoolile ebinji okhushila oundi ta, shichila boosi bali nibatoolile butswa ebibahela. 19Musa nababoolela ari, “Mulie ebiokhulia ebio biosi, mulabileshekhwo biola mukamba tawe.” 20Nebutswa abandi shibaakhola shinga olwa Musa yali nababooleele ta, bamala babiishekhwo ebindi khulwa inyanga yilondakhwo. Ne inyanga yalondakhwo eyo, ebiokhulia ebio biali nibiamilemwo tsinyende khandi nibihunyanga obubi, mana Musa nabasinyishila. 21Mana bamala bachaache okhutoolanga mumabwibwi, buli mundu eshimuhela okhulia butswa khulwa inyanga ndala. Ne lwomubasu kwalulanga, ebiokhulia biatong'anga khwiloba biakhamulukhanga.
22Ne khunyanga yakhasasaba, buli mundu yatoolanga ebiokhulia ebimuhela okhulia khulwa tsinyanga tsibili. Mana abemilisi babandu ba Isiraeli nibeetsa okhuboolela Musa mbu, abandu batoolile ebiokhulia bihela ebimwelo bibili. 23#Okhur. 20:8-11Kho Musa nababoolela ari, “OMWAMI Nyasaye alachilisiye mbu, mukamba ni inyanga indakatifu yokhuhuluukha, eya ye omwene yeyahulila. Khulweshio, musambe ebiamwenya okhusamba, ne muteshe ebiamwenya okhuteekha. Ne ebitong'a mubibiishe, namubilie mukamba.” 24Bakhola shinga olwa Musa yali nababooleele. Ne ebiokhulia bia babiikha inyanga eyo, shibiabolakhwo, noho kata okhukwamwo tsinyende tawe. 25Mana Musa nababoolela ari, “Mulie ebiokhulia biatoonyile, shichila inyanga yino neisabato eya OMWAMI Nyasaye Nyasaye, eyaahulwa khulwa okhuhuluukha. Khulweshio, shimulanyoolakhwo eshiokhulia elwanyi weikambi tawe. 26Mulatoolanga ebiokhulia khulwa tsinyanga tsisasaba. Nebutswa khunyanga yokhuhuluukha yomusaafu, ebiokhulia ebio shibilabetsangaho tawe.”
27Mana khunyanga yomusaafu, abandu bandi barula nibatsia okhutoola ebiokhulia, ne nibalabinyoolayo tawe. 28Kho OMWAMI Nyasaye nareeba Musa ari, “Mulakhaya okhuhulila amalako nende amebaalo kanje okhuula liina? 29Mukhoyile okhwitsulila mbu, isie nesie OMWAMI Nyasaye wenywe, owaraho inyanga yomusaafu mbu, abandu bahuluushenje. Ne nishio eshiachila nimboola mbu, khunyanga yakhasasaba mutoolenje ebiokhulia bia munyala okhulia khulwa tsinyanga tsibili. Omundu yesi yesi shialarulakhwo aha aba nali khunyanga yomusaafu ta, buli mundu yekhalenje butswa hangowe.” 30Kho, abandu ba Isiraeli shibakholanga emilimo khunyanga yomusaafu tawe.
31 #
Obub. 11:7,8 Abandu ba Isiraeli bakulikha ebiokhulia biatoolungwa ebio mbu, imana. Ebiokhulia ebio, bialinji shinga olufwa olutiiti olulafu. Ne noliakhwo, eshiuya shiabio shialinji shinga emikaate bikaasiliibwemwo obuushi. 32Kho Musa nababoolela ari, “OMWAMI Nyasaye alachile mbu, khubukulekhwo imana yino khubiishe kho mbu, khulimanyisinjiakhwo abaana befwe, bamanye mbu bino nibio ebiokhulia ebia OMWAMI Nyasaye yakhuliisia olwa khwali nikhuli mushitsiimi, nakhurusinjia mushialo shia Misiri.” 33#Abaheb. 9:4Mana Musa naboolela Haroni ari, “Bukula tsindubi tsibili, oremwo imana mana orenjeshe imbeli ewa OMWAMI Nyasaye, imana eyo ibiishilwe abaana baliibulwa inyuma, bosi balichilolakhwo.” 34Kho shinga olwa OMWAMMI yali nalachile Musa, Haroni yarenjekha imana eyo imbeli welisanduku lieindakano, mana niyibiikhwa obulayi. 35#Yos. 5:12Abandu ba Isiraeli bamala balie imana eyo khulwemiyika amakhumi kane, okhuula olwa boola Kanani, ewa bamala bamenye. 36Eshichelo shiabachelelangamwo shiahelananga nende tsindubi amakhumi kabili.
Currently Selected:
OKHURULA 16: OLUPR
Highlight
Copy
Compare
Share
Want to have your highlights saved across all your devices? Sign up or sign in
