OKHURULA 15
15
Olwimbo lwa Musa
1 #
Obufw. 15:3
Kho Musa nende abandu ba Isiraeli nibembela OMWAMI Nyasaye olwimbo luno bari,
“Ndalamwimbila OMWAMI Nyasaye olwimbo,
shichila amalile okhunyoola obuhuli bwoluyali,
asunduule munyanza tsifarasi nende abelushilanga khutsio.
2 #
Tsits. 118:14; Isa. 12:2 OMWAMI Nyasaye niye omulindi wanje wamaani,
khandi niye oumboniye.
Niye Nyasaye wanje, nasi ndalamwitsoominjia.
Ye ni Nyasaye wa Papa wanje ne ndalemba nindiitsoomia obukhongobwe.
3OMWAMI Nyasaye nomukhupani
ne eliiralie niye OMWAMI Nyasaye.
4“Afuubile amakaari komuruchi wa Misiri nende abelihebe munyanza,
ne abakhongobe abalayi bakwisiibwe munyanza inzakhanyu.
5Tsisiba tsieinyanza tsibafuuniishe,
beyiniishe mulusiba shinga lichina.
6Iwe OMWAMI Nyasaye, amaani komukhonokwo musaatsa nakoluyali,
kakhalakanga abasukubo mubitonye.
7Mubuhulibwo obukhongo, ohulanga abasukubo.
Oburumabwo nabwo bubasambanga shinga obusamba obunyasi.
8Olwa wafuura omuuyakwo khumaatsi, kebunjelesia halala,
kasinjila shilunji shinga lisiisi,
Natsio tsindungu tsiomulusuba lweinyanza tsiahambaana halala.
9Omusuku yaboola ari, ‘Ndalabalondachilakhwo embatiile,
Ndalakabukhasia emiandu chiabwe nembukula ebia ndienya.
Ndalarusia olukanga lwanje muluula, nembukula ebia bali ninabio biosi!’
10Nebutswa wafuura omuuyakwo lulala butswa ne amaatsi nikamila Abamisiri,
beyinikha shinga tsisasi#15:10: tsisasi: neshibia eshisiro muno. mumaatsi kolutungu olukhongo
11“Iwe OMWAMI Nyasaye, ouli shinga iwe mubanyasaye niwiina?
Iwe OMWAMI Nyasaye, ouli nobutakatifu obukhongo shinga obubwo niwiina?
Khandi ounyala okhukhola ebikhole ebikhongo khandi ebiamakana shinga iwe niwiina?
12Olwa wanyiila omukhonokwo omusaatsa, liloba liamila abasuku befwe.
13“Mubuheelibwo oburalilu, wemilila abandu ba wali nonunuule.
Wabemilila namaaniko okhuula mushialoshio eshitakatifu.
14Amahanga koosi akahulila, katechelanga noburi,
tsindenga tsiatiilile Abafilisiti.
15Abemilisi ba Edomu bariire,
Abasaatsa bamaani ba Moabu bareenganga.
Nabo abandu ba Kanani bamalile okhukosia itswoni yabwe.
16Tsindenga noburi biabatiilile.
Olwa balolangakhwo butswa amaaniko,
basinjilanga butswa noburi nibabula oubakhoonya,
okhuula olwa abandubo aba warusia mumbohe babiraho.
17Wabarusiye mumbohe nobareera khushikulushio,
habundu aha iwe OMWAMI Nyasaye waahula okhuba eshimenyoshio,
aha waahula okhuba Ihekaluyo, eya iwe omwene wombakha.
18Iwe OMWAMI Nyasaye, oliba omuruchi emiyika nemiyika.”
Olwimbo lwa Miriamu
19Abandu ba Isiraeli bachenda khwiloba eliumu. Nebutswa olwa Abamisiri namakaari kabwe, netsifarasi tsiabwe nende abelusinjia khutsifarasi balondakhwo, OMWAMI Nyasaye yachelesia amaatsi ne nikabamila boosi nibafwa.
20Kho Miriamu, omukhaana wabwe Haroni, owali omulakusi, nabukula abikhulibwe nachaaka okhukhupa. Kho abakhasi bandi boosi nibabukula ebikhuli biabwe nibamulondakhwo nibashina. 21Miriamu yabarereesilia olwimbo nabo nibongulamwo bari,
“Mumwimbile OMWAMI Nyasaye shichila amalile okhunyoola obuhuli bwoluyali.
Afuubile tsifarasi nende abatsilushilangakhwo Munyanza.”
Amaatsi amalulu
22Kho Musa niyemilila abandu ba Isiraeli okhurula khunyanza inzakhanyu, nibenjila mushitsiimi shia Shuri. Bachenda tsinyanga tsitaru mushitsiimi nibalanyoolanga amaatsi tawe. 23Ne olwa boola Mara#15:23 Mara: eshisina mbu, amalulu., shibanyalilwa okhunywa amaatsi ta, shichila amaatsi kaliyo kali amalulu. Niko akachila habundu yaho nihakulikhwa mbu, Mara. 24Mana abandu nibachaaka okhunyiniakanila Musa nibareeba bari, “Khulanywa shiina?” 25#Sira 38:5Mana Musa nasaaya khu OMWAMI Nyasaye, naye OMWAMI Nyasaye namumanyia eshitonye shiolusaala namuboolela mbu, afuube mumaatsi. Olwa Musa yafuuba olusaala olwo mumaatsi, amaatsi kamala nikakaasa akokhunywa.
OMWAMI Nyasaye yabahelesia amalako kokhumenyela mushitsiimi omwo. Mana khandi nibali ebweneyo, OMWAMI Nyasaye yabateema. 26OMWAMI Nyasaye nababoolela ari, “Nimuba nimutsia okhuhulila nende okhulonda koosi akendolanga mbu nakobulunjishi nende okhulonda amalako kanje, shindakhamuhelesiekhwo eshinyasio shiobulwale shinga eshiandahelesia Abamisiri ta, shichila nisie OMWAMI Nyasaye oumuhoninjia.”
27Olwa barula Mara, boola habundu mbu Elimu, ewa tsisebele ekhumi natsibili tsiali nende emishindu musaafu. Kho nibakhupa ikambi yabwe habwene yaho, ahambi namaatsi.
Currently Selected:
OKHURULA 15: OLUPR
Highlight
Copy
Compare
Share
Want to have your highlights saved across all your devices? Sign up or sign in
