OKHURULA 17

Amaatsi karula mwichina

(Obub. 20:1-13)

1 # Obub. 20:2-13 Abandu ba Isiraeli bamala barule mushitsiimi shia Sini, nibachenda okhulondana shinga olwa OMWAMI Nyasaye yabalachilisia. Bamala bakhupe ikambi Refidimu, nebutswa amaatsi shikaliho akokhunywa tawe. 2Abandu abo bamala babuuluulile Musa nibamuboolela bari, “Khuhelesie amaatsi kokhunywa.”

Naye Musa nabakalusia ari, “Mbushiina muusoolasinjia? Eshichilanga nimuteema OMWAMI Nyasaye wenywe nishiina?”

3Nebutswa abandu bali nobuloho obunji, mana nibatsiililila okhubuuluulila Musa nibaboola bari, “Wakhurusiye Misiri halala nende emiruko chiefwe kho mbu, witse okhwirire mushitsiimi nobulo?”

4Kho Musa nahabila OMWAMI Nyasaye naboola ari, “Iwe OMWAMI Nyasaye, nekhole endie abandu bano? Bali ahambi okhundasa amachina.”

5Naye OMWAMI Nyasaye namuboolela ari, “Bukulakhwo abemilisi ba Isiraeli mana wimile imbeli wabandu, obukule indabushi ya wakhupila amaatsi komwalo kwa Naili. 6Isie ndalasinjila halwanda mushikulu shia Zayuni. Witse okhupe olwanda olwo, amaatsi kalarulamwo ne abandu balanywa.” Musa nakhola ario, abemilisi babandu ba Isiraeli nibalolanga.

7Musa yamala nakulikha habundu tsana mbu, Masa nende Meriba#17:7 Masa nende Meriba: eshisina shiamera kano muluheburania ni okhuteema nende okhubuuluula., shichila abandu ba Isiraeli babuuluula nibeyiniakana khu OMWAMI Nyasaye nende okhumuteema, olwa bareeba bari, “Toto mwene OMWAMI Nyasaye ali ninefwe noho ta?”

Abaisiraeli bakhupana nende Abamaleki

8Mana Abamaleki nibeetsa nibaseera abandu ba Isiraeli nibali Refidimu. 9Kho Musa naboolela Yoshwa ari, “Yahula abandu banyala okhukhupana, mukamba batsie bakhupane nende Abamaleki. Nasi ndalasinjila khushikulu nenjiinjile mwikulu indabushi ya Nyasaye yambelesia.” 10Mana Yoshwa nakhola shinga olwa Musa yali namuboolile. Kho nibatsia okhukhupana nende Abamaleki. Ne Musa, Haroni nende Huri nibaniina khubutenje bweshikulu. 11Olwa Musa yachinguulanga omukhono kulimwo indabushi, abandu ba Isiraeli bahulanga lihe. Ne olwa yeshinjia omukhonokwe hasi, Abamaleki bahulanga lihe. 12Olwa amakhono ka Musa kachoonya, Haroni nende Huri bamala nibabukula lichina nibarechekha, ne Musa niyekhalakhwo. Ne Haroni nende Huri nibatiila emikhonochie okhuula olwa eliuba liayeela. 13Mana Yoshwa nahulila elala Abamaleki.

14 # Okhuk. 25:17-19; 1 Sam. 15:2-9 Kho OMWAMI Nyasaye naboolela Musa ari, “Handika amakhuwa kobuhuli bwelihe lino mushitabu, mana shibe eshitsulilo khubandu ba Isiraeli, khandi oboolele Yoshwa mbu, ndalamulula Abamaleki boosi pe.” 15Kho Musa niyombakhaho eshimalilo shiemisango ne nashikulikha mbu, “OMWAMI Nyasaye yambelesinjia obuhuli.” 16Mana naboola ari, “Eshifune shili mbu, ndiletanga khu OMWAMI Nyasaye. Nebutswa mutsinzibulo tsieimbeli, OMWAMI Nyasaye alikhupa Abamaleki khandi.” #17:16 Nyasaye niye oukhupanilanga isie.

Currently Selected:

OKHURULA 17: OLUPR

Highlight

Copy

Compare