OKHURULA 12
12
Lisabo lia Pasaka
1 #
Abal. 23:5; Obub. 9:1-5; 28:16; Okhuk. 16:1,2 OMWAMI Nyasaye naboolela Musa nende Haroni nibali mushialo shia Misiri ari, 2“Omwesi kuno nikwo okulabetsanga omwesi kwenywe kwambeli, kwomuyika. 3Mulachilisie abandu ba Isiraeli boosi nimubaboolela muri, ‘Khunyanga yekhumi yomwesi kuno, buli omusaatsa yaahule eshimeeme shielikondi noho eshieimbusi, khulwa abomunzuye. 4Ne abomunzuye nibaba nibali batuutu butswa, kho okhuula alie nende omumenyaniwe okhulondana nende obunji bwabandu abo. Mana buli mundu aliekhwo inyama eyo. 5Munyala okhwaahula eshimeeme shielikondi noho shieimbusi, habula okhuula shibe eshiomuyika mulala. Ne khandi shibe eshibulakhwo obulema bwosi bwosi bwosi tawe. 6Mana khubwile bweinyanga yekhumi nakhane yomumwesi okwo, abandu ba Isiraeli boosi basinze ebimeeme biabwe. 7Mana babukule amalasile kabatasiiye okhurula mubimeeme ebio, babashe khubiyindi biemiliango nende hekulu wemiliango chietsinzu tsiababa nibaliiliilemwo. 8Eshilo shieneshio, basambe inyama yeneyo mana bachilie halala nende eliani#12:8 Eliani: tsifwa. lilulu nemikaate chibulamwo limela. 9Shimulaliekhwo inyama eyo niyishili imbisi noho niyiteeshilwe tawe. Habula muchilie niyisambilwe. Mulie kata nende omurwe, nende ebilenje halala nende ebiomunda biayo biosi. 10Shimulalekhakhwo inyama yosi yosi yitoonye okhuula mumabwibwi ta, ne niyiba niyitoong'a okhuula muchisambe yoosi. 11Mulie ebiokhulia bienebio bwangu bwangu, nimusinjiile, khandi nimwifwalile tsingubo tsienywe nende ebilaaro, khandi nimutiilile tsindabushi tsienywe chioluchendo. Elo nilio Lisabo lia Pasaka, elia mulakholanga khulwa okhunzinamila isie OMWAMI Nyasaye wenywe.’
12“Eshilo shieinyanga yeneyo eyo, isie nenzire abaana abasiani ebekulanda ba Abamisiri boosi, nende emiruko chieshisaatsa emikulanda chiabandu ba Misiri boosi. Khandi ndilihelesia abanyasaye ba Misiri boosi eshinyasio. Isie nesie OMWAMI Nyasaye. 13Ne amalasile ako kalaba eshilolelo shiokhumanyia tsinzu tsiamulimwo. Ne olwa ndalalola amatsayi ako, ndalamubirakhwo, olwa ndalaba nindiiranga abaana bambeli ba Abamisiri, shinditsa okhwira abaana benywe tawe. 14#Okhur. 23:15; 34:18; Abal. 23:6-8; Obub. 28:17-25; Okhuk. 16:3-8Okhuula mukholenje lisabo lino shinga omulukha kweidiini, okhwokhwitsulila eshia isie OMWAMI Nyasaye ndamukholela inywe. Mukholenje lisabo elo emiyika chiosi.”
Lisabo liomukaate kubulamwo limela
15OMWAMI Nyasaye naboola ari, “Khulwa tsinyanga musaafu tsilondokhana, shimulaliekhwo omukaate kulimwo limela tawe. Nebutswa mulie omukaate kubulamwo limela. Khunyanga yambeli, murusie mutsinzu tsienywe limela liosi, shichila omundu yesi yesi ouliakhwo omukaate kunyoobeelwemwo limela mutsinyanga musaafu etsio, shialabalwa shinga mulala khubandu banje tawe. 16Ne khandi khunyanga yomusaafu eyo, okhuula mwakaane halala khulwa okhunzinamila. Shimulakholekhwo omulimo kwosi kwosi munyanga tsienetsio tawe, omulimo kwa mulakholanga, nokhuteekha ebiokhulia. 17Mukholenje lisabo elo khulwa okhwitsulila mbu, okhuba khunyanga eyo, nolwa ndamurusia mushialo shia Misiri. Ne khandi mubulamu bwenywe bwosi, okhuula mukholenje lisabo lieinyanga eyo. 18Muchaachenje okhulikhola khubwile khunyanga yekhumi nakhane, eyomwesi kwambeli okhuula khunyanga yamakhumi kabili nalulala, eyomwesi kwenokwo. Mutsinyanga musaafu etsio tsiosi, shimulaliekhwo omukaate kuukaasiliibwemwo limela tawe. 19Ne omundu yesi yesi ouliakhwo omukaate kulimwo limela mutsinyanga musaafu etsio, noho kata limela linyooleshekhwo munzuye, omundu oyo abe Omuisiraeli, noho omucheni owamenya butswa mwinywe, shialabalwa shinga mulala khubandu banje tawe. 20Shimulaliekhwo eshindu shilimwo limela ta, habula mutsinyanga etsio muliitenje emikaate chibulamwo limela.”
Lisabo lia Pasaka yambeli
21Mana Musa nalanga abemilisi ba Isiraeli boosi ne nababoolela ari, “Buli mulala khwinywe alobole eshimeeme shielikondi noho eshieimbusi, mana ashisinze kho mbu, abeinzuye bakhole lisabo lia Pasaka. 22Mubukule eshiangwe mana mwinishe mushindu shia mutatsiliyemwo amalasile mana mubashe amalasile keshimeeme ako khubiyindi nende hekulu wemiliango chienywe. Ne omundu yesi yesi shialarulakhwo munzu omwo eshilo ta, okhuula mulinde bushie kho murule. 23#Abaheb. 11:28Olwa OMWAMI Nyasaye alaba nabiranga niyera abekulanda ba Abamisiri, alalola amalasile khubiyindi biemiliango ne shialafuchilila omumalaika wokhwira okhwinjila mutsinzu tsienywe niyera abekulanda benywe tawe. 24Inywe nende abolwibulo lwenywe muhulile amalako kano mana mukalondenje emiyika chiosi. 25Mana olwa muliula mushialo eshia OMWAMI Nyasaye atsia okhumuhelesia, okhuula mukhole lisabo elo. 26Ne olwa abaana benywe balimureeba bari, ‘Lisabo lino likholungwa khulwa shiina?’ 27Nenyu mulibakalusinjia muri, ‘Omusango kwelisabo lia Pasaka kuno khukukholanga khulwa okhuhelesia OMWAMI Nyasaye oluyali, shichila yabura khutsinzu tsia Abaisiraeli ne niyeera abekulanda ba Abamisiri nnende okhuhonokosia abaana babwe.’ ”
Olwa abakhongo ba Abaisiraeli bahulila amakhuwa ako, benamia emirwe chiabwe nibamwinamila OMWAMI Nyasaye. 28Mana nibatsia okhukhola shinga olwa OMWAMI Nyasaye yali nalachile Musa nende Haroni.
Okhufwa khwabekulanda ba Abamisiri
29 #
Okhur. 4:22,23 Mana mushilo hakari, OMWAMI Nyasaye niyera abaana abekulanda ba Abamisiri boosi, okhuchaachila khumwana womuruchi wa Misiri, owali niyalaamilwa obwami okhuula khumwana womundu omuhambe, owali nali mubuhambe mushialo shia Misiri. Kata ebikulanda biemiruko biosi bierwa. 30Mana omuruchi, abakhalabanibe boosi nende Abamisiri boosi nibabuukha mushilo hakari. Okhwikhuula nikhubaho okhukhongo muno okhuba shiyaliho inzu kata ndala yomwana omusiani alaali nafwilemwo tawe. 31Eshilo shieneshio butswa, omuruchi wa Misiri yarumana mbu Musa nende Haroni balangwe. Olwa betsa, yababoolela ari, “Inywe nende abandu benywe rule mushialo shianje mutsie. Tsie nemiruko chienywe mwinamile Nyasaye wenywe shinga olwa mwaboola. 32Bukule emiruko nende biayo bienywe biosi mana mutsie shinga olwa mwaboola, khandi siesi musabilekhwo ikhabi.”
33Abamisiri banichilisia abandu ba Isiraeli okhurula mushialo shiabwe bwangu mbu benyoshe nibababoolela bari, “Chame mutsie, nimulatsia ta fwesi khulafwa.” 34Kho abandu ba Isiraeli nibabukula obusie bwabali nibanyoobile nibubulamwo limela, nibabura mubindu biabanyoobelangamwo nende okhuboya ebindu ebio netsingubo tsiabwe, nibetuukha khumakeka. 35#Okhur. 3:21,22Abaisiraeli bali nibakholile shinga olwa Musa yali nababooleele, khandi bali nibasabile ebiuma bieifetsa nende bieitsahabu halala netsingubo okhurula khubandu ba Misiri. 36OMWAMI Nyasaye yali nakholile Abamisiri okhuhelesia Abaisiraeli oluyali nende okhubahelesia biosi ebia Abaisiraeli babasaba. Nolwa Abaisiraeli barulilamwo Misiri nobuyinda bwa Abamisiri bario.
Abaisiraeli barula Misiri
37Abaisiraeli bachaaka oluchendo lwabwe khubilenje okhurula Ramesesi nibahenjile Sakotsi. Abasaatsa bonyene Abakhasi nende abaana nibabulakhwo, bali ebikhumila ebikhumi bisasaba (600,000). 38Okhumeetakhwo, Abaisiraeli batsia nomukanda omukhongo kwabandu abalaali Abaisiraeli tawe, nende amakondi amanji, tsimbusi halala nende tsing'ombe tsinyinji. 39Banyooba emikaate chibulamwo limela okhurula khubusie bwabali nibarusiye Misiri, shichila bali nibalondilwe okhurula Misiri bwangu muno, mana shibaali nende ebise bihela okhunyooba obusie bwotekhwamwo emikaate chilimwo limela ta, kata shibaali nibabukuulekhwo ebiokhwikhoonyela khuluchendo tawe.
40 #
Obucha. 15:13; Abagal. 3:17 Abaisiraeli bamenya Misiri khulwemiyika ebikhumila bine nende amakhumi kataru. 41Ne inyanga yeneyo ya bosiliakhwo emiyika ebikhumila bine nende amakhumi kataru eyo, niyo eya barulilakhwo Misiri. 42Olwa OMWAMI Nyasaye yalinda abandu ba Isiraeli nabarusia Misiri mwali mushilo. Okhuba mbu OMWAMI Nyasaye yahonga nalindile abandu ba Isiraeli okhurula Misiri, eshilo shieneshio shiamala nishikholwa eshiahule shia OMWAMI Nyasaye. Mana khushitsulilo shieshilo eshio, buli muyika abandu ba Isiraeli bekhalanga meeso nibalakonakhwo tawe.
Amalako okhulondana nende Pasaka
43OMWAMI Nyasaye yaboolela Musa nende Haroni ari, “Kano niko amalako ka mwitsa okhwikhoonyelanga olwa muba nimukhola lisabo lia Pasaka. Ne omurende yesi yesi shialaliakhwo lisabo lino ta, nebutswa, 44Omusumba wa mwakula anyala okhuliakhwo lisabo lia Pasaka lino nikaba mbu, ashebwa. 45Omundu witsile okhumenyakhwo ninenywe hatuutu butswa noho owamulanjile mbu amukholelekhwo emilimo hatutu butswa, shialaliakhwo lisabo lienywe lia Pasaka tawe. 46#Obub. 9:12; Yoh. 19:36Lisabo lino okhuula liliilwe munzu eyikaasibwe okhuliilwamwo. Ebiokhulia biliibwa mwisabo lino shibilarulakhwo munzu wa bikasiliibwe omwo tawe. Ne olwa mulia inyama yelisabo lino, shimulamenenekhwo ebikumba bieshimeeme shielisabo lia Pasaka tawe. 47Aboluyia lwa Isiraeli boosi okhuula bakholenje lisabo lia Pasaka lino obulachweya tawe. 48Nebutswa omundu omusinde shialaliakhwo lisabo lino tawe. Omundu oulali Omuisiraeli niyetsa okhumenya mwinywe naba niyenya okhuliakhwo lisabo lino khulwa okhuhelesia OMWAMI Nyasaye oluyali, okhuula abe niyashebwa khandi abandu beinzuye boosi okhuula babe nibashebwa. Omundu oyo nende ebeinzuye nibamalile okhushebwa, bulaano balaba nibali shinga abebule babandu ba Isiraeli ne banyala okhuliakhwo lisabo lia Pasaka. 49Lilako lieshishebo lino okhuula lilondwe nende abebule ba Isiraeli boosi halala nende abandu bandi boosi abetsa okhumemya hakari munywe.” 50Abandu ba Isiraeli boosi bahulila khandi nibalonda amakhuwa ka Musa nende Haroni bali nibababooleele, mana nibakhola shinga olwa baboolelwa. 51Ne khunyanga yeneyo, OMWAMI Nyasaye yarusia tsimbia tsiabandu ba Isiraeli boosi okhurula mushialo shia Misiri.
Currently Selected:
OKHURULA 12: OLUPR
Highlight
Copy
Compare
Share
Want to have your highlights saved across all your devices? Sign up or sign in
