Kumw. 4
4
Omuseecha
1Lolakho, oli ne lukoondo lulayi musiime wase,
lola oli ne lukoondo lulayi!
Omoka bulayi nga liuusi,
mu lububi lwowo.
Lichuune liowo likhinakhina oli kumunyele kwe chimbusi,
chichiikha khu mwiikha kwa Kileati.
2Kameeno kowo kali kamawaanga nga chinyaange,
chichesiingile,
mbao etibile akhaba ndala tawe,
choosi chifwaanana.
3Kiminwa kiowo kili nga luusi lubesemu,
ne lilomaloma liowo lisangaasia.
Chisaya chowo mu lububi lwowo chili nga chimbabia che lituunda likomanga.
4Likosi liowo lili nga endeleelwa eya Daudi,
lilayi lundi limiuufu,
ne kamamili mwikosi nga chingabo eelefu.
5Kamaturu kowo kali nga ching'ana chikhwana cha kicheu,
chichaya bimuli.
6Ndaba khu lukulu lwe biiunya bulayi,
khukhwola mu mbeo eye mumakhelebende
sisiilima ne siwao.
7Ewe oli omulayi ng'ali, musiime wase,
se olikho ne bubi bwosi bwosi tawe.
8Yaa mukhaye, yiicha khurure Lebanoni,
yiicha khurure fwembi Lebanoni.
Yiikha khukhwama khu sikulu sia Amana,
khukhwama khu sikulu sia Seniri ne Herimoni,
khukhwama mu mabina ke chitalang'i,
khukhwama khu bikulu bie chingwe.
9Ewe osangaasianga kumwoyo kwase, yaa, mukhaye wase,
osangaasianga kumwoyo kwase ne limoka liowo,
ne kamamili ke mwikosi mwowo.
10Busiime bwowo buli bulayi yaa, mukhaye wase,
Busiime bwowo buli bulayi khukhila endali,
ne kamafura kowo
kakhila sisiindu sing'aa siosi siosi.
11Mukhaaye wase, kumuketu kwe bubuukhi kuli khu minwa kiowo,
bubuukhi ne kamabeele bili khu lulimi lwowo,
chingubo chowo chiunya bulayi,
nga kamafura kamalayi ka Lebanoni.
12Omusiime wase owe kumwoyo, omukhaaye wase ali siluundu sisiekisa,
siluundu sisire, eningilo yabeene.#4.12 eningilo yabeene: liboola lili omukhasi wabene.
13Kimili kiowo kili liruuti lie kimirongooro kie kamatuunda kamakomanga#4.13 kamakomanga: kumurongooro kufwaana kumuchungwa.
ne kamatuunda kamalayi lukali,
ne kamafura kalaangwa hena ne narito.
14Narito ne Safarani ne kumuchai ne bing'aa bulayi,
ne kimirongooro kiosi kiunya bulayi,
ne manemane nende bioosi bing'ailisia bulayi.
15Emoni eye sebele mu siluundu,
esebele eye kameechi ke bulamu,
ne chinjichi chibisia khukhwama mu Lebanoni.
Omukhasi
16Siisimukha, Ewe, ekhuungu eye bunaswa,
Ee, ekhuungu eye siafubo yiicha,
ucha khu siluundu siase,
lekha khuunya khulayi khufundeele.
Lekha omusiime wase eche mu siluundu siewe,
mala alie kamatuunda kasio kamalayi kakhila koosi.
Currently Selected:
Kumw. 4: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
