Kumw. 5
5
Omuseecha
1Ningila mu siluundu siase,
musiime we kumwoyo kwase, mukhaye wase,
Mbuusia manemane yase ne bing'ailisia bulayi biase,
ndia lisasara liase ne bubuukhi bwase,
ese nywa endali ne kamabeele kase.
Omukhasi
Lia, enywe basaale, ne nywa;
nywa lukali, enywe basiime!
Sitonyi sia khane
Omukhasi
2Nga yaba nengonile, kumwoyo kwase kwanaania,
mala naroora ndi, omusiime wase alikho akhong'oonda khu muliango.
Omuseecha
“Njikulileo yaa,
omusiime owe kumwoyo kwase, oli nga liuusi.
Kumurwe kwase kwanyirire khubeela luume,
ne lichuune liase lianyirire sikila kamame.”
Omukhasi
3Abeele nefuulile,
siina sikila nefware lundi?
Abeele nesiingile bikele,
siina sikila mbilabuusie lundi?
4Omusiime wase aatiila khu sikhomekho sie kumuliango,
kumwoyo kwase kwekhoya.
5Nenyokha khukhwikulilao omusiime wase,
ne kamakhono kase kechuule kamafura kamalayi,
ne chinjala chase chiroonya busa,
nga natiila khu sikhomekho sie kumuliango.
6Nekulila omusiime wase,
ne kakhali omusiime wase aba achiile,
nekoomba khuulilakho kumumilo kwewe.
Namuyiima ne se namunyoola tawe.
Namulaanga, ne se angobosia tawe.
7Baliindi baliindanga lukoba luboofu banyoola,
bakhupa mala nang'ukha,
baliindi chana bandabulaka chingubo.
8Bakhaana ba Yerusalemu, mwekongochela,
ne munyoola omusiime wase,
muboolele muli ndwala sikila busiime.
Bakhasi babaandi
9Ee, omulayi lukali mu bakhasi,
omusiime wowo ali nasi khukhila omusiime okundi?
Omusiime wowo ali nasi khukhila omusiime okundi,
nio okhwekoonjeelele efwe orio?
Omukhasi
10Omusiime wase omumiliiu lundi omubesemu pe,
amanyikhaane mu baandu chielefu ekhumi.
11Kumurwe kwewe kuli kumulayi nga esahabu endayi lukali,
ali ne lichuune lilayi,
limali nga nasimali.
12Chimoni chewe chili chindayi nga che liuusi,
a sebele, esiingile eng'oonile bulayi.
13Chisaya chewe chili nga biluundu bilayi,
kiminwa kiewe kili nga bimuli biroonya biiunya bulayi.
14Kamakhono kewe kakhomela bulayi,
mala afwara chimbete ching'enang'ena che bukusi bukali.
Kumubili kwewe kuli kumumiufu nga kumusaanga,
kukwarerwamo kamabaale kang'enang'ena.
15Bikele biewe bili nga chinjeko che libaale liwaanga,
chichasimikhwa mu maloo ke esahabu.
Lukoondo lwewe luli nga Lebanoni
lulayi nga kumutarakwa.
16Lilomaloma liewe lilayi lukali,
mala ali osiimisia lukali.
Bakhaana ba Yerusalemu,
Oyuno ali omusiime wase,
lundi omusaale wase.
Bakhasi
Currently Selected:
Kumw. 5: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
