Bar. 12

Bulamu mu bukholi bwa Wele

1Nono, bawandaayase, sikila siisa sia Wele sikali khwifwe, mwekoonjelela enywe ndi, yiaana mwabeene khu Wele nga liiosio lie bulamu, liaanwa khu bukholi bwewe lundi limusiimisia niye. Lino nilio lisaaya lia ng'ali khu Wele nilio mukhoya khurusia. 2Mukhaloonda ke sibala sino tawe, ne lekha Wele amukaluukhasie enywe mukari khulwe khukaluukhasilia elala kamebaasio kenywe. Nio mulanyala khumanya lilienya lia Wele, sili silayi lundi sisiimisia khu niye, mala sisiichufu.

3Ne sikila siianwa sia Wele sie kumwalaalo khwise mboola khu buli mulala khwinywe. Mukheyibaasia khuba be angaaki khukhila nga muli tawe. Ne kakhali mube ne kamebaasio kakolaana mala mwikhalakile mwabeene khuloondekhana khu bukali bwe lisuubila nilio Wele amuelesie enywe. 4#1 Bakor. 12.12 Khuli ne bitonyi bikali mu mubili mulala, ne bitonyi bino bioosi bili ne kimilimo kikiabukhana. 5Mu ngila neng'ene, khwakhaba ne khuli bakali, khuli kumubili mulala mu buambaani ne Kristo, mala fweesi khwaambaasibwa khu buli sia mulala nga bitonyi bibiabukhaane bie kumubili mulala. 6#1 Bakor. 12.4-11 Nono khukhoya khurumikhira biianwa biefwe bibiaukhaane khuloondekhana ne kumwalaalo nikwo Wele akhuelesie efwe. Siianwa siefwe siaba ne sili khung'oola, khwolaana khukhole khurio khuloondekhana ne lisuubila nilio khuli nalio, 7siaba ne sili khukhalabana, khwolaana khukhalabane, siaba ne sili khukhwekisia khwolaana khwekisie, 8siaba ne sili khuramo babaandi kumwoyo khwolaana khukhole khurio. Oyo yesi yesi osaanganga ne babaandi olaana akhole ario mu buaani, oyo yesi yesi oli ne bunyali olaana akhole kimilimo ne kamaani, oyo yesi yesi owekesianga bulayi khu baandi olaana akhole mu busangaafu.

9Busiime khukhwola bube bukwalaafu elala. Biila lili limayaanu, tiila lili lilayi. 10Siimana mwabeene ne mwabeene nga bawandaaye ne wandaaye mu Kristo, mala mube ne silukuluku khukhwekesia buriaani buli mundu no wasie. 11Khola kimilimo ne kamaani ne mukhaba bakara tawe. Kholela Omwami kimilimo ne kumwoyo kwe khu khweana khukali. 12Lekha lilieyikina lienywe limuelesie kumwikhoyo, ba babefwiilisia mu minaanio kienywe, mala saba biise bioosi. 13Saanga mu miaandu kienywe ne bakristo basienywe bakhali nabio tawe, ne yikula chingo chenywe chakaanile bakeni.

14 # Mat. 5.44; Lk. 6.28 Reeba Wele abiite chikhabi abo bamunyaasia enywe, yee mureebe ababiite chikhabi, akhabalaama tawe. 15Sangaala ne nabo bali basangaafu, lila ne nabo balikho ne balila. 16#Chis. 3.7 Menya mu buambaani, buli mulala ne owasie. Mukhaba be kisuunia tawe, ne fukiilila kimilimo kie khukhweboombia. Mukheyibaasia mwabeene nga be limanya tawe.

17Omundu yesi yesi ne akhukholele kamabi, okhamuruungia ne kamabi kakaandi tawe. Khaka khukhola niko buli mundu ebaasia ali kali kamalayi. 18Khola koosi niko onyala lubeka lwowo omenye mu muleembe ne buli mundu. 19#Likh. 32.35 Basaale base, mukharuungia bubi khu bubi tawe, ne kakhali lekhela lirima lia Wele likhole lirio. Sikila liiandiko liboola lili, “Omwami aboola ali, Ndeyacha, ndaruungia.” 20#Chis. 25.21-22 Ne khali, nga liiandiko liboola: “Omusiku wowo aaba ne ali ne njala, mue alie, aaba ne ali ne bulesia, muelesie sie khunywa, sikila khulwe khukhola murio, mulamuambia chisoni,” 21mukhalekha kamamayaanu kamuula enywe tawe, ne khali muule kamamayaanu khulwe khukhola kamalayi.

Buriaani khu bemeelesi be sibala

Currently Selected:

Bar. 12: LUBUKUSU

Highlight

Copy

Compare