Arooma 7

Nlattaniso wa harusi

1Attwiizaku, kiniwuuzani mweeyo nkhama atthu mwinjuwaaye kano. Mweeyo khamwinjuwa yoori kano ena owahi khwa ntthu amana eeya haayi paasi? 2Eri toono, khwa kano muukha wooraliwa oniiya vamote na mannawe amana nlume aya eeya haayi; ila amana nlume aya afwa, muukha otule oniiya wootaphuliwa khwa kano ya oraliwa. 3Tiito, amana muukha araliwa ti nlume nkina nalelo mannawe ari haayi, ontthanttiwa nkhama namararuwa. Ila mannawe amana afwa, ye oniiya wootaphuliwa khwa kano etile na hatha nkhama eetta oraliwa ti nlume nkina, khantta oraruwa.

4Apho attwiizaku, mweeyo theenya mwafwa khwa kano, vakatthi wa mwiili wa Al-Masiihu, yoori mwirette phantte ya nkina, opule osisimuwiyeeyo muufwa, yoori nipatthe wiiyana mishumo khwa Nluku. 5Maana wakathi opule naari weettettisiwaaye pi vitthu za onaatamu eetthu, khwa tuvela za twampi zithoonyeziweeyo ti kano zaari okhola khaazi nkatthi wa mwiili eetthu, khwa nanna naari wiimaazo mishumo za onilawana muufwa. 6Ila nasaapi, nifwelaka etile raku yaanifukiyeeyo, nataphuliwa nkatthi wa kano, yoori ninrumeyele Nluku khwa nanna pheeya ya Rooho na woohiiyi nanna ya mwentto opule wa raku wa kano zawaatikhiwa.

Wuumanana twampi

7Apho, nilupe niini? Niri kano twampi? Hatha vattitthiiru! Khwa hakiikha, akaari oteela ojuwa niini twampi woohijuwisiwi ti kano. Maana weekhweele, akaari oteela ojuwa niini omaashokopho, eriwaka kano khayaalupiye yoori: “Ohiiyane omaashokopho.” 8Ila twampi yajipatthisa kiphenyo elankhiyeeyo va oruma, khukipatthisa miiyo wakhula nanna ya tuvela ya omaashokopho. Woohiivo kano, twampi eniiya yoofwa. 9Raku miiyo kaari wiikhala woohiina kano, ila wakathi otiiyeevo oruma, twampi khwaaza okikhola khaazi miiyo khufwa. 10Miiyo khusophela yoori oruma otthuupo waahitiweeyo otana ohaayi, weekhweele wakitiisela ofwa. 11Tiito twampi, khupattha kiphenyo etiisiweeyo ti oruma, khukittettekha na khwa oruma otthuupo khukuula.

12Khwa hakiikha kano Ttakatthiifu, na oruma pi woottakatthifu, shariya na oshapweya. 13Na aphano, etile yooshapweya yaretteya wiiya etthu enuulaaye khwa miiyo? Hatha vattitthiiru! Ila yoori twampi ejithoonyeze nkhama twampi, ye yatana ofwa khwa miiyo vakatthi wa etthu yooshapweya, yoori khwa vakatthi wa oruma ejithoonyeze khwa nanna yootepa woopisa.

14Ninjuwa yoori kano pi za nroho; ila miiyo ki pinaatamu woottettheya na koozanyisiwa nkhama mwiitthwaana wa twampi. 15Miiyo khinikeeleya etthu kinrettaaye, maana akinretta etile kintakhaaye, ila etile kihintakhaaye. 16Na, nkhama kinretta etile kihintakhaaye, kinkhupalela yoori kano ti yooshapweya. 17Khwa etthiipo enthoonyeza yoori khahi miiyo kinrettaaye, ila twampi yiikhaliyeeyo nkatthi mwaka. 18Miiyo kinjuwa yoori khina etthu yooshapweya eniikhalaaye nkatthi mwaka, olikha toowo, khwa onaatamu aka. Maana kinaaye niiya ya oretta etthu yooshapweya, ila akinwahi oretta. 19Maana akinretta yooshapweya etile kintakhaaye, ila yootakhala kihintakhaaye, eto kinkhanyarela oretta. 20Ila nkhama kinretta etile kihintakhaaye, khahi miiyo kinrettaaye, ila twampi etile eniikhalaaye nkatthi mwaka.

21Aphano, kinsikana kano eniikhalaaye khwa miiyo: kitakhaka oretta yooshapweya, zootakhala ziniiya vamote na miiyo. 22Maana nkatthi wa ohaayi aka, kinaaye tuvela ya kano ya Nluku; 23ila kinoona khwa phantte za mwiili aka, kano kiina enuumananaaye kano eriiye nkatthi wa akhili zaka, enikiretta onapherezu wa kano za twampi ziriiye phantte za mwiili aka. 24Ntthu fukhara kiriizo! Paani anttelaaye okitaphula mwiili opu onfwaaye? 25Kininshukhurwela Nluku khwa Yinsa Al-Masiihu, Mbwana eetthu! Khwa nanna za akhili zaka, kimwenyewe kinrumeyela kano ya Nluku, ila mwiili aka, onrumeyela twampi.

Currently Selected:

Arooma 7: eko

Highlight

Compare

Copy