Arooma 6

Ohaayi mpheya khwa Al-Masiihu

1Apho niri je? Nikhanyarele oretta twampi yoori rehema yeekezeleye? 2Wala hatha vattitthiiru! Fweeyo, nifwiiyeeyo khwa twampi, nanna ni nintakhaaye wiikhala ntwampi nttumpho? 3Ama, mweeyo khamwinjuwa yoori fweeyo noosiweeyo khwa Yinsa Al-Masiihu, noosiwa khwa ofwa wawe? 4Nakataalikha nazikhaniwa ye muufwa khwa njampo la woosa, yoori, nkhama etthiipo Yinsa asisimuwiyeeyo muufwa khwa siifwa ya Paapa, na fweeyo niikhale khwa ohaayi mpheya.

5Nkhama nanna ethiito nikusanyeyaniyeeyo ye khwa ojilattisana ofwa wawe, na theenya ninteela wiiya oolattanana ye, osisimuwa wawe. 6Maana ninjuwa yoori otthu eetthu opule wa raku wafwa na Yinsa vansalapa yoori mwiili wa twampi wiiye wootapanyiwa, na theenya nihirutele wiiya aviitthwaana a twampi. 7Nakataalikha otule afwiiye ataphuliwa twampi.

8Nkhama nafwa na Al-Masiihu, ninkhupalela yoori theenya ninteela wiiya haayi vamote na ye. 9Maana najuwa yoori, asisimuliweevo muufwa, Al-Masiihu khanteela ofwa swaafu kiina; ofwa khuna oshintta theenya khwa ye. 10Maana ye afwaka, afwela twampi swaafu moote khwa mileele; ila ohaayi awe, ohaayi khwa Nluku.

11Khwa nanna etthiipo, mwijoone mwifwiiye khwa twampi, ila mwiri haayi khwa Nluku, nkatthi wa Yinsa Al-Masiihu. 12Nakataalikha mwihilikhelele twampi orutela oshintta mwiili enu onfwaaye, zuurettisakani oshututela tuvela zenu. 13Mwihinkhe phantte za mwiili enu ntwampi, nkhama zaana zohiiyi za shariya. Ila mwimwinkhe Nluku nkhama atthu mwirutiyeeyo muufwa khweetta muuhaayi; na mwimwinkhe mwiili enu nkhama zaana za shariya. 14Maana twampi khinteela wuushinttani theenya mweeyo, mwaasa mweeyo khamwiri vathi wa kano, ila vathi wa rehema.

Mwiitthwaana wa Nluku

15Apho, nisala niretta twampi mwaasa wa yoori khaniri vathi wa kano, ila niri vathi wa nrehema ya Nluku? Hatha vattitthiiru! 16Khamwinjuwa yoori, amana ntthu ajinkha mmakhono wa ntthu yoori asala anshututela nkhama mwiitthwaana, oniiya mwiitthwaana wa othuuto aninshututelaaye: mwiitthwaana wa twampi enuulaaye, ama oshututi onimwettanaaye nshariya? 17Ila nininshukhurwela Nluku, maana mweeyaru pure aviitthwaana a twampi, mwavira mwininshututela Nluku na rooho yenu khwa nanna mwisomisiweezo. 18Mweeyo mwataphuliwa ntwampi, na mwaretteya wiiya amwiitthwaana a shariya.

19Kinttakhula nkhama pinaatamu mwaasa wa otteettheya weenu wa onaatamu. Nkhama etthiipo mwenkheleliyeeyo phantte za mwiili enu sawasawa mmakhono wa zoohifwayi na zootakhala zintanaaye zootakhala. Apho enasaapi eti mwinkhelele phantte za mwiili enu mwijirette wiiya aviitthwaana a shariya onuuttakatthisaanini. 20Wakathi opule mwaari aviitthwaana a twampi mweeyo mwaari ootaphuliwa khwa shariya. 21Mishumo ni muuruliyeeyo khwa vitthu zaya epo mweeyo enuupatthisaanini haaya? Mwiisho aya ofwa. 22Aphano mwalaziwamo ntwampi mwarettiwa oviitthwaana wa Nluku na mishumo mwinshumaaye zinuurettani wiiya a Ttakatthiifu, omwiisho waya ohaayi wa mileele. 23Maana phakari ya twampi ofwa, ila tthuvo ya rehema ya Nluku ohaayi wa mileele khwa Yinsa Al-Masiihu, Mbwana eetthu.

Currently Selected:

Arooma 6: eko

Highlight

Compare

Copy