Arooma 8

Ohaayi khwa Rooho Ttakatthiifu

1Nakataalikha, aphano khayiivo hatha hukhumu khwa apale ari khwa Yinsa Al-Masiihu. 2Maana vakatthi wa Yinsa Al-Masiihu, kano ya rooho ya ohaayi yakitaphula khwa kano ya twampi na ofwa. 3Maana, etile kano yahawahiyeeyo oretta mwaasa wa otteettheya wa onaatamu, Nluku aretta, khumperekha mwanawe, woolattanana pinaatamu wa twampi, nkhama zaakha ya twampi, khwa etthiipo khuttha paathuli twampi vakatthi wa onaatamu. 4Yoori epile ziiyiye shariya khwa oruma wa kano zinifiyele saaneene woonitoshavo fweeyo, nihinlottaaye vitthu za onaatamu, ila khwa rooho.

5Wakhula otule aniikhalaaye khwa vitthu za onaatamu, akhili zawe zinrutela epile pinaatamu antakhaazo; ila otule aniikhalaaye khwa Rooho ya Nluku, akhili zawe zinretta epile Rooho ya Nluku entakhaaye. 6Akhili za onaatamu ofwa, ila akhili za Rooho ya Nluku ohaayi na heeri; 7Akhili za onaatamu eniinanana Nluku, maana khinjittha nkano ya Nluku, wala kinwahi oretta. 8Nakataalikha otule anshinttiwaaye pi vitthu za onaatamu khanwahi ontuvelisa Nluku.

9Nakataalikha, mweeyo khamwishinttiweeni pi onaatamu, ila khwa Rooho, nkhama khweele rooho ya Nluku eniikhala khwa mweeyo. Na nkhama ntthu khana Rooho ya Al-Masiihu, khahi wa Al-Masiihu. 10Ila, nkhama Al-Masiihu ori vamote na-mweeyo, mwiili wafwa mwaasa wa twampi, Rooho eri haayi mwaasa wa shariya. 11Nkhama Rooho ya otule ansisimuliyeeyo Yinsa eri vamote na mweeyo, othuuto ansisimuliyeeyo Al-Masiihu nkhapuri theenya onteela osisimula mwiili enu woofwa, khwa Rooho yawe eniikhalaaye khwa mweeyo.

Aana na Anamarithi

12Nakataalikha, attwiizaku, fweeyo niri nteeni, yoohiikhali khwa nanna ontakhaazo onaatamu. 13Maana, amana mweeyo mwiikhala khwa nanna ontakhaazo onaatamu, mwintta ofwa; ila khwa rooho amana muula tuvela za mwiili, mwiniiya haayi. 14Maana ooshi apale aneettettisiwaaye ti Rooho ya Nluku aana a Nluku. 15Maana mweeyo khamwipokhereeni Rooho yawuurettani oviitthwaana yoori mwirutele woova theenya, ila mwapokhera Rooho yuurettiyeenini wiiya aana khwa wuukaphulani, ethiito ninkhuwelaaye yoori “Aba, Paapa.” 16Rooho ethiito enlawela oshaahiti rooho yeetthu yoori na aana a Nluku. 17Nkhama na aana, apho na anamarithi, anamarithi a Nluku na anamarithi vamote na Al-Masiihu; nkhama khweele ninhoowana khwa ye, yoori theenya nirette phantte ya ottitthimisiwa wawe.

Siifwa entaaye

18Kinkhupalela yoori ohoowa weetthu nasaapi eti, khunlikanisaniwa siifwa enttelaaye othoonyeziwa khwa fweeyo. 19Zumpe zooshi enwejela, na nroromelo nwulweene, yoori aana a Nluku eeye othoonyeziwa. 20Maana zumpe zaretteya ohiina fwayita, woohiiyi khwa otakha waya, ila mwaasa wa niiya ya otule awaatthiiyeemo na nroromelo 21yoori zumpe ziiye zootaphuliwa muuvitthwaana wa ohoocheya aari opattikhanaamo, apwekherelaka otaphuliwa wa siifwa za aana a Nluku.

22Ninjuwa yoori zumpe zooshi zinsisimira na enoona olwaaza nkhama olwaaza wa ovokola. 23Khahi etthiipo paasi, ila fweeyo niriina mwanzo mishumo za Rooho Ttakatthiifu, theenya ninsisimira nkatthi mweetthu, niwejelaka wooshukulikhavo okaphuliwa weetthu nkhama aana, na otaphuliwa sawasawa wa mwiili eetthu. 24Maana khwa nroromelo otthuupo noosurwiwa. Ila nroromelo onooneyaaye khahiyo nroromelo. Paani anwejelaaye etile anoonaaye? 25Ila amana niwejaka etile nihinoonaaye, ninweja na ovilela.

Olompeliwa wa Rooho

26Khwa nanna etthiipo Rooho ya Nluku ennawuni muutteettheya mweetthu, maana khaninjuwa nanna ya olompa saana, ila Rooho ethiito enlompa khwa zwaamu yeetthu na osisimira khwa nanna yoohitaphuleleyi. 27Na otule aninzaanaaye rooho zeetthu, onjuwa shawuri za Rooho, maana Rooho Ttakatthiifu enlompa khwa zwaamu ya atthu a Nluku khwa niiya ya Nluku.

28Ninjuwa yoori apale animphetaaye Nluku na awaakhuweliyeeyo khwa shawuri zawe, zooshi ziniweettettela saana. 29Maana apale Nluku awathawuliyeeyo, awaaphakula yoori alattanane Mwanawe. Ye aretta epo yoori mwanawe eeye wa omwanzo vakatthi wa attwi enkeene. 30Apale awathawuliyeeyo, awaakhuwela; apale awaakhuweliyeeyo, awaahakikhi; apale awaahakikhiyeeyo, awaattitthimisa.

Ozayiniwa na okhupalela pheta ya Nluku

31Apho nilupe niini khwa vitthu zaya epo? Nkhama Nluku ori vamote na fweeyo, paani anttelaaye oshinttanana fweeyo? 32Othuuto ahimwiinaneleeni Mwanawe, anvahiyeeyo khwa fooshi fweeyo, khi enttela orettikhana toovi ohininkhi vamote naye vitthu zooshi? 33Paani ariina ruhusa ya owaalokoveza ananthawuliwa a Nluku? Nluku ti aniwaahakikhaaye. 34Namahukhumu ti paani? Ti Yinsa otule afwiiyeeyo, na theenya khusisimuwa opheya ori nkhono nlume wa Nluku, na onnivekelela fweeyo. 35Paani anwahaaye oniphakulana pheta ya Yinsa? Tafwawuthi, othunku, olupatthiwa ama jala ama owaazu, ajali, ama phanka? 36Nkhama yaatikhiweezo yoori:

“Mwaasa wa wuupheta weeyo, wakhula siikhu nineekesela ofwa,

narettiwa nkhama pwittipwitthi enttelaaye oshijiwa.”

37Ila khwa vitthu zaya epo zooshi naziti wiiya anamashintta, khwa vakatthi wa otule aniphetiyeeyo. 38Maana miiyo kinkhupalela saaneene yoori wala ofwa, ama ohaayi, wala malayikha, wala sheethwani, wala vitthu za nasaapi wala zintaazo wala hatha owahi, 39wala chanka, wala wiicha, wala etthu kiina ya wumpiwa eriina makhaamu ya oniphakulana pheta ya Nluku eriiye khwa Yinsa Al-Masiihu, Mbwana eetthu.

Currently Selected:

Arooma 8: eko

Highlight

Compare

Copy