Arooma 2

Ophuka wa shariya ya Nluku

1Nakataalikha, weeyo oniwaaphukaaye azaawo, khunswamiheya; maana onjihukhumu weeyo omweenyewe khwa epile omphukaazo, woone yoori weeyo, omphukaaye, onretta vitthu etthiipo. 2Fweeyo ninjuwa yoori ophuka wa Nluku pi wa haakhi khwa apale anrettaaye vitthu zaya etthiipo. 3Oo, weeyo pinaatamu, oniwaaphukaaye atthu apo anrettaaye vitthu epo khupe na weeyo orettaka etthiipo, onoona yoori onsaleela ophuka wa Nluku? 4Ama talili weeyo ontarawu maali za emaani yawe, ovilela na olevelela, ohijuwaka yoori okemaani wa Nluku onuulawana muuthupwiya?

5Ila mwaasa wa ohilikhiseyi na olipa rooho yawo, oneekezela katapu khwa weeyo enttelaaye osaruwa siikhu ya katapu ya Nluku, wakathi onttelaaye ojithoonyeza ophuka wawe wa shariya. 6Nluku onttela omwinkha wakhula ntthu khwa khiima ya wakhula etile arettiyeeyo. 7Ye oniwenkha ohaayi wa mileele apale aari okhanyarelaaye oretta zooshapweya, eekesaka siifwa, hishima na ohifwi. 8Ila eniiyavo katapu na hukhumu khwa apale ojikhupali, ankatthalaaye haakhi na khusala alottela vitthu zohiiyi za shariya. 9Eniiyavo miswipa na othunku khwa anaatamu ooshi anrettaaye zootakhala: waaza mayaahuuti, theenya khwa amalapo; 10ila ottitthima, hishima, na heeri yiiye vamote na ooshi apale anrettaaye zooshapweya: waaza mayaahuuti mpakha amalapo. 11Maana Nluku khaninthawula ntthu.

12Wooshi otule ankosaaye woohiina kano onteela opwetheya woohiina kano; na wooshi otule ankosaaye ajuwaka kano, khwa kano onteela ophukiwa. 13Maana khahi apale ansiilaaye kano eeyiyeeyo anashariya omaasho wa Nluku, ila apale anshututelaaye kano pi anttelaaye wiitthiwa anashariya. 14Weekhweele, amana amalapo ohiina kano, aretta epile enrumaazo ephattu yaya, enretteya wiiya kano khwa yo, eeyaru pure ohiina kano. 15Anthonyeza yoori matakhelo a kano pi oopharisiwa nroho mwaya, tiito eninkhaaye oshaahiti theenya wa akhili zaya na wuupuwela waya, alokovezanaka na akiselanaka. 16Zooshi epo zinttela wooneya siikhu Nluku amphukaavo siiri za anaatamu, khwa Yinsa Al-Masiihu, nkhama etthiipo enlupaazo hapari zaka zooshapweya.

Mayaahuuti na kano

17Apho, weeyo onjilupeza oyaahuuti, onjilipisana kano na onjikhupalina Nluku. 18Weeyo onjuwa niiya ya Nluku na onjuwa othawula etthu yooziti olikana, maana wanozeliwa kano. 19Weeyo onjuwa yoori khweele oniweettettisa ananhooni, nuuru ya apale aariiye n'yiiza, 20namanozela wa alolo, mwanliimu wa asimaana, maana awaamo nkano mwawo mattakhuzi oojuwa na a haakhi. 21Khi aphano? Weeyo oniwaasomisaaye akina, ohijisomisaka omweenyewe? Weeyo, ontafusiraaye monkoni wa wiiya, khi wiiya? 22Weeyo onlupaaye yoori mwihiraruwe, khi oraruwa? Weeyo eniwiphiraaye sanamu, khi wiiya vitthu za nnyupa woosifwiwamo? 23Weeyo onjikhupalanaaye kano, ila onintarawu Nluku khwa ohishututeli kano zawe! 24Nkhama yaatikhiweezo yoori: “Nzina la Nluku linkhufurweliwa pi amalapo mwaasa wa mweeyo.”

25Okhiriya ona fwayita amana oshututela kano, ila amana weeyo ohishututeli kano, okhiriya wawo onretteya wiiya ohikhiriyi. 26Khi apale oohikhiriyi anshututela menttezi a kano, khansuhi otthanttiwa nkhama anamakhiriya? 27Otule ahikhiriyeeni khwa mwiili, ila anshututelaaye kano, ye onteela wuhukhumuni mweeyo, mwiriina kano zawaatikhiwa na mwikhiriyiyeeyo, ti namakhijilela kano. 28Nakataalikha, khahiyo yaahuuti khaamili otule eeyiye yaahuuti ojeru paasi, wala khahiyo okhiriya khaamili khwa otule akhiriyiyeeyo ojeru paasi na mwiili. 29Wala! Yaahuuti ti otule eeyiye yaahuuti nkatthi mwawe, na okhiriya khaamili pi opule wa nroho, onrettiwaaye ti rooho ya Nluku, ohinrettiwaaye ti kano zawaatikhiwa. Na siifwa ampwekherelaaye atthu apo khinlankha mmakhono wa anaatamu, enlankha wa Nluku.

Currently Selected:

Arooma 2: eko

Highlight

Compare

Copy