Arooma 3

Fwayita ya mayaahuuti niini?

1Ena fwayita ni wiiya yaahuuti, ama fwayita ni eriivo va okhiriya? 2Zawaatta, khwa nanna zooshi onaaye fwayita, maana weekhweele mayaahuuti pi yo enkheleliweeyo nttakhuzi la Nluku omwanzo. 3Enlikhisa-ni atthu akina wiiya oohaamineyi? Oohaamineyi waya onfuja waamineya wa Nluku? 4Hatha vattitthiiru! Eeye Nluku weekhweele, na ntthu wooshi woohata. Nkhama yaatikhiweezo:

“Yoori wiiye woohakikhiwa khwa mattakhuzi awo

na oshintte amana olokoveziwaka.”

5Ila, nkhama ohiina shariya weetthu onthoonyeza khwa nanna ya wooneya channu shariya ya Nluku, ninttela olupa ni? Yoori Nluku ti wohiina shariya khwa weettettisa katapu yawe? Kinrumeyela mattakhuzi oonaatamu. 6Wala khahiyo toowo! Eriwaka yaari etthiipo, nanna-ni Nluku aari weettelaaye ophuka olumwenku? 7Ntthu onwahi olupa theenya yoori: “Nkhama ohata waka onthoonyeza channu haakhi ya Nluku, eekezelaka etthiipo siifwa zawe, mwaasa wa niini kiphukiwaka nkhama natwampi?” 8Aphano nihilupaka yoori: “Nirette yootakhala yoori ete yooshapweya?” Akina anikilokoveza olupa etthiipo. Apo aya anlawa aphukiwe na ahukhumwiwe.

Khaavo ntthu wa shariya

9Apho niishelane toovi? Niriiye phantte ya fwayita ti fweeyo? Wala! Ninthoonyeza yoori waaza mayaahuuti mpakha amalapo, ashinttiwa ti twampi. 10Nkhama yaatikhiweeyo yoori:

“Khina eeyiye nashariya, hatha mmote,

11Khaavo hatha mmote enimweleyaaye etile yiiyiyeeyo ya shariya;

khina animweekesaaye Nluku.

12Atthu ooshi athowelela, ajiretta wiiya atthu ohiina fwayita;

khina anrettaaye yooshapweya, hatha mmote.”

13“Khulo zaya khapuri zoohisireliwi,

anttettekha na malimi aya.”

“Maattha a nyookha awuula ari omilomo waya.”

14“Milomo zaya zeetaala laana na owaawa.”

15“Moolu aya anvurumela wuula;

16wakhula vahali anviraavo, anlikhavo ori wootapanyeyavo na fukhara,

17na khanjuwa tarikhi ya heeri.”

18“Yo khanimoova Nluku.”

19Ninjuwa yoori zooshi enlupaaye kano zawooza ooshi apale ari vathi wa kano etthiipo, yoori milomo zooshi zinyamale na olumwenku opatthe ophukiwa mmakhono wa Nluku. 20Nakataalikha, khaavo anttelaaye ohakikhiwa omaasho wa Nluku khwa khaazi za kano. Maana khwa kano najuwa twampi.

Nusura khwa vakatthi wa amini

21Ila apha yajithoonyeza shariya enlankhaaye wa Nluku, woohiiyi mwaasa wa kano. Na tithiito enlawelaaye oshaahiti kano na manapiyu, 22shariya ya Nluku khwa amini ya Yinsa Al-Masiihu khwa apale ooshi aninkhupalaaye. Khawiivo ofwarikhana, 23maana atthu ooshi akosa na ari peetiwene khwa ottitthima wa Nluku. 24Ila ahakikhiwa mahala khwa rehema, ya nusura eriiye wa Yinsa Al-Masiihu, 25Nluku anvaha Yinsa nkhama twaha yoori eeye swamiima nkatthi wa amini, khwa taamu yawe, athoonyezaka shariya. Khwa ovilela, aalikhiye ohukhumu twampi epile zirettiweeyo raku; 26ila nasaapi eti, aretta epo yoori athoonyeze shariya yawe, mwaasa wa wiiya nashariya na namahakikhi wa apale ariina amini khwa Yinsa. 27Eri vayi aphano kiiswa ya ojikhutupula? Yalaziwavo. Wala yaaza vayi? Va oshututela kano? Wala, ila yaaza va amini. 28Maana niniishelana nilupaka yoori pinaatamu onhakikhiwa mwaasa wa amini, khahiyo mwaasa wa khaazi za kano. 29Niri Nluku, Nluku wa mayaahuuti paasi? Ye khahiyo Nluku theenya wa amalapo? Aaa theenya ti wa amalapo, 30maana Nluku mmote paasi, othuuto anttelaaye owaahakikhi khwa amini apale ookhiriya na apale oohikhiriyi. 31Nifuje kano khwa amini? Wala, hatha vattitthiiru, ila nilipisele yoori kano ena fwayita.

Currently Selected:

Arooma 3: eko

Highlight

Compare

Copy