Arooma 1

Hapari zooshapweya khwa atthu ooshi

1Miiyo Paawulu, karumeya wa Yinsa Al-Masiihu, kakhuweliwa yoori kiiye aswihaapa, kithawuliweeyo yoori kilaleye hapari zooshapweya za Nluku, 2etthiipo Nluku ahitiyeeyo asulani khwa manapiyu awe nkatthi wa Zawaatikhiwa Ttakatthiifu, 3monkoni wa Mwanawe, othuuto nkhama pinaatamu, atiiyeeyo khwa ojama wa Daawuuda, 4na khuthoonyeziwa khwa Rooho ya ottakatthifu wiiya Mwaana wa Nluku na owahi wakathi asisimuwiyeeyo muufwa. Ye ti Yinsa Al-Masiihu Mbwana eetthu, 5khwa ye na mwaasa wa nzina lawe, napwekhera rehema na owaaswihaapa, yoori nikhuwele khapila zooshi wiiya atthu oshututi ontaaye khwa amini, 6na mweeyo theenya mwiri phantte ya apale akhuweliweeyo yoori eeye a Yinsa Al-Masiihu.

7Kiniwaatikhela atthu ooshi ariiye Rooma eeyiyeeyo aphetani a Nluku na akhuweliweeyo yoori eeye attakatthiifu:

Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Paawulu ona niiya ya othotola ojama wa Nluku wa Rooma

8Khapula ya zooshi, kininshukhurwela Nluku aka, khwa Yinsa Al-Masiihu, khwa mooshi mweeyo, maana olumwenku wooshi entta olaleyiwa amini mwiriinaaye. 9Nluku, kininrumeyelaaye na rooho yaka yooshi kitafusiraka hapari monkoni wa Mwanawe, shaahiti aka yoori wakhula wakathi kinuufikhirini mweeyo, 10khwa lompa zaka, kinveka yoori enasaapi eti khwa otakha wa Nluku, kifukuleliwe tarikhi ya oteela wuuthotolani. 11Kintakha owoonani mweeyo, kuufiselakani tthuvo kiina za nroho yoori kuukhomaazeni. 12Eto, ti yoori miiyo na mweeyo niiye woolipiseleya saaneene khwa amini. 13Kintakha mweeyo attwiizaku mwijuwe yoori kaaza raku owaza shawuri za oteela owoonani, ila khusala kitapwateliwa mpakha apha. Niiya kiriina otakha wuurula mishumo vakatthi venu mweeyo, nkhama kinuurulaazo vakatthi wa amalapo akina aya.

14Maana shuruthi yaka owaatafusirela apale oosilimu na apale oohisilimu, apale aakhili na oohijaliwi. 15Tiito miiyo kalikanana wuutafusirelani hapari zooshapweya theenya na mweeyo mwiriiye Rooma.

16Khinkipatthisa haaya olaleya hapari zooshapweya, maana owahi wa Nluku oniwoosurwaaye ooshi apale ankhupalaaye, amwanzo mayaahuuti mpakha amalapo. 17Maana khwa hapari zooshapweya ti enjithoonyezaaye shariya ya Nluku khwa amini, nkhama yaatikhiweezo yoori: “Nashariya oniikhala khwa amini.”

Katapu ya Nluku khwa anaatamu

18Nakataalikha, katapu ya Nluku enjithoonyeza pinkuuni khwa vitthu zooshi zootakhala na vitthu zohiiyi za shariya za anaatamu anvithaaye haakhi khwa vitthu zohiiyi za shariya. 19Maana etile entakhaaye ojuwiwa khwa Nluku ti ya wooneya khwa yo, maana Nluku awaathonyeza. 20Maana thanku wumpiwa wa olumwenku makhaamu oohooneyi a Nluku, owahi wawe wa mileele na ephattu ya o Nluku awe, onooneya saaneene, na onjuweya khwa vitthu za wumpiwa. Khwa nanna ethiito atthu apo khanswamiheya. 21Maana yo anjuwa Nluku, ila khuhimwinkhi siifwa ansuhaaye na khuhinshukhurweli, ila wuupuwela waya waretteya wiiya woohiina fwayita na rooho zaya zoololo zariipa. 22Ajoonaka nkhama aakhili, khupe aretteya wiiya alolo. 23Apatilisa siifwa ya Nluku ahinfwaaye khwa ratarato yoolattanana ntthu anfwaaye, na nkhama ya anyannyi, nyama za moolu mane na zoojipurula vathi.

24Tiito Nluku awenkhiyeeyo oretta khaapa twayifu, nkhama tuvela za twampi za nroho mwaya, yoori atapanye mwiili aya atthaaporu. 25Apatilisa haakhi ya Nluku khwa ohata, aaputu na arumeyela vitthu za wumpiwa, khunlikha otule ompiyeeyo, othuuto ansuhaaye ottitthimisiwa khwa mileele. Amiina!

26Mwaasa wa ethiito, Nluku khuwaalikhela tuvela zaya zoopatthisa haaya. Hatha aakha aya azukulisa mwentto wa khaapa ya ephattu khwa mwentto nkina woohiiyi opule weephattu. 27Khwa nanna etthiipo, alume nayo, alikha oretta khaapa yeephattu na aakha, khwiiya awiitaala tuvela mmote na nzaawe. Arettaka vitthu zoovonyeya, olalisana alumeru na apwekhera eenyeweru hukhumu eniwaasuhaaye khwa vitthu zaya epo anrettaazo.

28Olikha toowo, moone yoori atarawu ojuwa wa Nluku, ye awaalikhela akhili zaya zoovonyeya, yoori arette vitthu zihinrettiwaazo. 29Yo ajiretta wiiya awiitaala nasipu zooshi zohiiyi za shariya, zootakhala, omaashokopho na ottettekha. Pi awaatta nrima, husuti za wuula, ohitakhani, ohata na vitthu zootakhala. Amwanomwaano, 30anamatarawu, maatuwi a Nluku, oohileleyi, ooveyisa na oojinkhelela, anwazaaye ohata wa oretta zootakhala, woowakhijilela apapazaya, 31alolo, manaafikhi, oohiina pheta na ajamaazaya, wala huruma na azaaya. 32Eeyaru pure oojuwa oruma wa shariya wa Nluku, yoori atthu anrettaaye vitthu nkhama epo ansuhi ofwa, khahiyo orettaru paasi, ila theenya aniwaattottopela apale anrettaaye.

Currently Selected:

Arooma 1: eko

Highlight

Compare

Copy